椰絲麻蓉冰皮月餅

        長期性都唔知過時過節係幾時，只係知道就快到某個節日，正確日子都唔太清楚，到將近殺到埋身先 “驚覺” 要過節！

 

        得番一個禮拜時間，乜都無預備，無買到材料整月餅，所以求求其快手整幾個冰皮叫做應吓節啦！仙姐早前出咗五仁月食譜，下年一定要整呀！！

 

 

月餅餡

材料：
開邊綠豆      80 克
水                 180 毫升
糖                 50 克
吉士粉          1 湯匙
低筋麵粉      1 湯匙
水                 2 湯匙
白芝麻         50 克
椰絲             15 克

- 綠豆清洗後用清水至少浸 3 個鐘，瀝乾水份倒入煲內，加水，用中火煮爛成綠豆蓉。

- 加糖煮溶至略乾身，用 2 湯匙水加吉士粉同麵粉開成芡，倒入煲內煮至稠身，攤凍。

- 芝麻洗淨後瀝乾水份，放白鑊炒香至金黃，攤凍後倒入攪拌機內打爛成芝麻粉。

- 綠豆蓉、芝麻粉同椰絲拌勻成糰，用保鮮紙包好，放雪櫃內雪至略硬身。

- 拎出餡料分成細份，每份重 36 克，滾圓備用。

月餅皮

材料：
糕粉             50 克
糖霜             25 克
椰漿             60 毫升
水                60 毫升
麻油             5 克

- 糕粉與糖霜混合，加入其餘濕材料攪拌成糰。

- 將粉糰分成細份，每份重 24 克，分別滾圓備用。

 

組合

- 戴上手套，粉糰放掌心內壓平壓薄，將餡料放上包好，捏緊收口

- 薄薄滾上適量粟粉，放入 63 克月餅模內壓花即成。

 
以上材料份量可做月餅 8 個。

 

 

 

七星伴月哦，呵呵！！^^

 

 

 

 

 

 

其實餡料都只不過係自己亂溝出嚟，但估唔到味道好好，

非常香濃，Charmaine 媽咪試過都讚，仲話好食過

嗰兩間大品牌出品，真係過獎、過獎！！

 

 

 

 

 

Notes：
- 當綠豆蓉開始煮到收水時，必然邊煮邊攪拌，以免黐底。

- 其實餡料做好之後可以即時包上月餅皮，但雪至略硬身會比較容易控制，易包好多。

- 唔同牌子糕粉受水性不一，可因應情況酌量加水及粉，水亦可用奶代替。

- 為方便開料，做好 8 個月餅後會尚餘少量餅皮及餡料。

- 包餡方法，可參閱《抹茶紅豆冰皮月餅》內示範短片。