味噌涼瓜

       十五中秋當然要煮齋啦，買咗苦瓜今晚做餸，但買完先至後悔！

 

       屋企幾乎所有嘅醬料都唔可以用嚟煮齋，因為大部份生產商都一定會用五辛做材料，增加醬料香味之餘，食落更加惹味。清炒又唔多掂，同樣唔落得蒜頭同乾蔥頭，真係要名符其實嘅 “清炒” 至得囉！唔通要用茄汁嚟煮苦瓜，又或者好似整關東煮咁齋用豉油去煮！？提到關東煮，即刻諗到解決方法，就係用白味噌，應該係屋企唯一可以煮齋嘅醬料，即管一試吧！

 

材料：
苦瓜
薑片
辣椒乾

調味料：
白味噌
香菇粉
鹽

- 苦瓜洗乾淨，開邊去瓤去蒂後切件；辣椒乾切粒。

- 味噌同香菇粉用少量熱水攪拌至完全溶解。

- 煲內煮滾適量水，加入味噌同其他材料，翻滾後轉中慢火煮至苦瓜腍身。

- 試味後酌量加鹽調味。

估唔到味道都唔太差喎，辣辣哋都幾好食。

如果唔係煮齋的話，用鰹魚昆布味噌煮應該仲正！