2014年9月19日星期五

豆漿乳酪 Soy Yoghurt

        上網搵 vegan 食譜及奶類製品代替品時,無意中發現原來用豆漿都可自製乳酪,唔一定要用牛奶,咁就又一天大喜訊哦!而且製作方法都好簡單,所以我又趁高興玩吓先。
 
       自家製作乳酪,最重要係控制好溫度,40 - 50 之間係最理想,最適合乳酸菌發酵。噚晚煮完飯之後,用溫度計度吓電飯煲個溫度,啱餘溫正正就係 40 ,咁我就索性放入去發酵過夜。因為呢次係第一次實驗,所以無自己煮豆漿,免得失敗時浪費我啲時間同功夫,買咗盒原味「鈣思寶」嚟做試驗。結果係點?係成功嘅,不過效果唔太理想,都幾稀!可能自己煮豆漿會好啲,商業產品就梗係水份多過黃豆㗎喇!之但係咁,我就從中明白到兩樣嘢:點解好多食譜都會落粟粉去整,同埋好多時整 homemade yoghurt 都會做多重功夫,將佢整成 Greek yoghurt 囉,唔係自己落手落腳整過都唔會知箇中因由!
 
 

材料:
豆漿             500 毫升
原味乳酪      1/2 湯匙

- 將豆漿加熱至約 40 ,與此同時,將容器消毒,以減低雜菌同時生長。

- 用小量豆漿加乳酪混合拌勻,之後倒回豆漿內,攪拌均勻。

- 容器蓋好,置於溫暖地方發酵 4 – 6 個鐘。

- 若豆漿完全凝固的話,即表示發酵完成。

 
 
今朝打開個蓋,輕輕搖動容器,見到豆漿完全凝固哂,
非常開心,實驗成功嘛!之但係用匙羹一攪,
發覺好稀,唔似買現成乳酪咁稠身。因為
我係由佢自生自滅咁發酵過夜,所以
其實係發酵過度,味道好酸!
 
 
 
 
 
 
咁鬼稀,唔怪得要落粟粉 埋芡!我買返嚟做種嗰盒
乳酪,已經係正式奶製品,但係成份都照樣有粟粉!
Youtube 度睇到有個方法係加腰果落去豆漿度
一齊攪打成糊狀之後先加乳酪種,目的都係
一樣,成品質地真係稠身好多,下次又
可以呢個方法,又或者將多餘
水份濾走做成希臘式乳酪都得。
 





啱今晚又要整 muffin,即刻用咗啲豆漿乳酪嚟整,
效果點樣就要等聽日食過先知喇!






Notes
- 容器消毒方法,可參考《玻璃樽消毒方法》,但我自己就偷懶,倒啲滾水落去燙過就
   算,網上見好多網友都未必會做呢個步驟。

- 其實乳酪種用嘅份量並無硬性比例,份量多就可以加快發酵速度,但就要小心容易發
   酵過度變得太酸。我呢次慌死會失敗,同樣 500 毫升「鈣思寶」就落足一湯匙乳酪,
   仲要發酵長過 6 個鐘,最終變得過酸。

- 如果係純素飲食 (vegan) 嘅朋友,可以買現成豆漿乳酪做起種。



12 則留言:

  1. 自己整無防腐劑,品質會無買回來的咁好,不過就最健康最安全。

    回覆刪除
  2. 好叻啊, 我以為做yoghurt 要個原味yoghurt 種先整到呢?

    回覆刪除
    回覆
    1. 唔好咁講,我都係上網跟人學咋!

      妳講得無錯呀,第一次係要先買個現成乳酪返嚟做起種,之後就可以用番自己整嘅乳酪做種,除非妳係買乳酸菌嚟整啦!

      刪除
  3. 俾個讚你先~連乳酪都自己整,仲要有心機研究改良方法!

    回覆刪除
    回覆
    1. 多謝妳呀!其實最主要都係因為我接受唔到奶類製品味道,所以咪試試各種代替品囉!

      刪除
  4. 回覆
    1. Cecilia,妳係指乳酪定係 muffin 呢?

      刪除
  5. 第一次聽可以用豆漿做乳酪.

    回覆刪除
    回覆
    1. 係呀,之前我都唔知,但原來其實外國已經好多人唔再食用奶類製品,bagel 店仲一定有豆腐 cream cheese 供食客選擇㖭!

      刪除