2014年10月16日星期四

辣炒秋葵鮮淮山

        呢碟餸都真係 黏鬥黏,潺鬥潺,切完秋葵之後再切鮮淮山,攪到成隻手都係潺,黐黐立立,好似有啲唔知咩喺手咁,哈哈哈哈!!!

        好多人都唔多鍾意食秋葵,我估可能係煮得太過耐,煮到太軟身、太過黏,其實秋葵原本係可以生食,不過我自己就未試過,無論係炒定係灼熟,一、兩分鐘就得㗎喇!
 

材料:
冬菇
秋葵
洋蔥
蒜片
鮮淮山

調味料:
紹酒
豆瓣醬


麻油

- 冬菇洗乾淨,用清水浸至軟身,去蒂後切片;秋葵洗淨、切蒂;洋蔥去衣後切粗條。

- 鮮淮山洗淨後切去外皮,略沖水後切粗條,之後立即浸入清水內,落鑊前瀝乾水份。

- 燒熱油,爆香冬菇、洋蔥同蒜片,灒酒,加入豆瓣醬兜炒。
 
- 加少少水將洋蔥煮至微微軟身。

- 將秋葵同鮮淮山落鑊,快手兜炒幾下,落鹽、糖調味,兜勻後熄火。

- 灑上麻油,拌勻後上碟。


咗冬菇之外,樣樣材料都好爽口。
 





又係有齊多種顏色嘅素食,健康之選。
 
 
 
 
 
Notes
- 鮮淮山切開後需立即用清水浸過面,避免接觸到空氣氧化變色。
 
- 秋葵落鑊後切勿加熱太耐,否則變得太軟身,除失去爽脆口感外,仲會增加黏液。


11 則留言:

  1. 我都試過煮秋葵, 我麻麻地, 太黏. :p

    回覆刪除
    回覆
    1. 係啦,大部份人都係咁,其實炒一陣就得㗎喇,仍然好爽口,唔會太黏㗎!

      刪除
  2. 未煮過同食過秋葵呢,因為聽人講好黏……你咁講完,有機會試下先~~

    回覆刪除
    回覆
    1. 妳試吓啦,真係唔會好黏㗎,不過一定唔可以煮得耐囉!

      刪除
  3. 我就咁"淥"一下就食了!

    回覆刪除
  4. 秋葵很有益,我都鍾意食,白灼,煮咖喱都得。

    回覆刪除
    回覆
    1. 係呀,我之前都用佢煮過一次咖喱,真係好好食。

      刪除
  5. 回覆
    1. 哈哈,妳又再食多次都係頂唔順嗎?

      刪除