泡菜雜菜鍋

        知道有韓國部隊鍋呢樣嘢好耐，但就唔太清楚其實係乜，睇相咪又係一貫韓國泡菜鍋咁一鍋紅湯，加多個即食麵落去。咁啱 Maangchi 姨上個禮拜教整呢個韓國部隊鍋，佢話自己都未試過呢個菜式，只不過不斷有讀者叫佢教整，佢先至飛返韓國去唔同食肆試菜，之後再教網友整。

 

        睇番佢個網頁，原來呢個菜嘅來歷係源自於韓戰之後，美軍將午餐肉、香腸、火腿、茄汁焗豆等罐頭醃製食物帶入韓國，呢類罐頭食品對於當時嘅韓國人嚟講相當新鮮，於是韓國人就開始將佢哋加入傳統泡菜鍋內。

 

       清楚知道咗之後，我更加唔會試囉，就算係 Maangchi 姨都坦言佢唔覺得咁樣嘅煮法會好味，吸引唔到佢！喺我眼中韓國飲食都比較著重天然食材，又有自己一套嘅養生食療，甚至會用到中藥材入饌，就連一般煮餸或醃泡菜都會用梨去代替砂糖提供甜味。呢個部隊鍋無啦啦走去加啲罐頭食物及即食麵落去，最頂癮嘅仲係茄汁焗豆，真係想像唔到個味道有幾好食囉！

 

        雖然我自己就唔會整呢款部隊鍋喇，但睇完Maangchi 姨點整個湯底，又覺得幾吸引喎，就用自己鍾意嘅食材，再參考個湯底部份用料整個泡菜鍋啦！

 

材料：
娃娃菜
白蘿蔔
青口
京蔥
洋蔥
豆腐
粉絲
泡菜

調味料：
韓國辣椒醬
韓國辣椒粉
泡菜醃汁
蒜蓉
魚露
糖

- 娃娃菜洗乾淨後切細；蘿蔔去皮後切粗粒；青口解凍後洗淨備用。

- 京蔥切去綠色部份及最外層，略沖洗後切粗片；洋蔥去衣後切粗絲。

- 豆腐切件；粉絲用清水浸至軟身；泡菜切細。

- 先將蘿蔔、部份洋蔥及豆腐落煲，加適量清水煲滾，之後轉中慢火煲至蘿蔔腍身。

- 調味料混合後，加適量熱湯拌勻，倒入湯內煮滾。

 

- 加入娃娃菜、京蔥及剩餘嘅洋蔥，翻滾後落埋青口、粉絲同泡菜，煮兩分鐘即可。
 
 

之前整芝麻豆腐雪糕時，將豆腐面同底比較硬嘅部份

切走，加埋入呢個泡菜鍋內，一啲都唔浪費哦！

 

 
 
 
 

味道超正，酸辣得嚟又食到蘿蔔同洋蔥

嘅清甜，仲有魚露嘅鹹鮮味。