2014年12月29日星期一

送給表姐銀婚紀念的栗子蛋糕

        早前表姐喺 Facebook 度留 message,邀請我出席佢同表姐夫銀婚紀念晚宴,原來佢哋當年係正正年尾最後一日結婚,25 年前嘅事,我真係一啲印象都無,所以佢話當晚順便一齊倒數㗎喇!
 
        唔知係咪心有靈犀,我發覺自己咁耐都無試過整栗子蛋糕,諗住今次試吓整,送俾表姐同表姐夫做賀禮,趁老表入嚟學琴時同佢傾過,點知佢話原來佢家姐係超愛栗子蛋糕,嘩,咁唔整都唔得啦!!
  
 
        整蛋糕時真係勁多甩漏:打好個海綿蛋糕麵糊,倒咗落個模度先記起唔記得落油;切開蛋糕,抹好哂 cream 之後先發覺唔記得搽糖水;手指餅入咗爐焗,喺廚房出番嚟見到袋糖霜先醒起唔記得灑兩次糖霜就入爐,救命呀!!!好彩整好個蛋糕都叫做見得吓人咋! ^^"






用糖水煲好栗子肉做餡。
 





我最怕揸唧袋,揸住佢都唔係好識點用隻手,所以再做多轉
手指餅圍邊時,搵老表出馬代我唧,我都費鬼事再做,
專責記住灑糖霜好過。估唔到老表都有份
為家姐個蛋糕出番分力哦,呵呵!
 





加咗幾粒 Winnie 俾我嘅銀珠做裝飾後,成個
蛋糕靚哂,當堂貴氣咗好多哦!
 





要多謝老表返到屋企幫我影番張切件照。
 





        可能整好哂之後,我同老表兩個喺度影相都玩咗一大輪,跟住佢又要坐長途車先返到去代我拎俾表姐,所以 cream 都有啲瀉。雖然個樣就唔多好喇,不過好彩味道搭夠,表姐打電話同我講話個蛋糕好味,咁就真係放心喇,希望表姐同表姐夫收到我份小小心意啦!


13 則留言:

  1. 回覆
    1. 唔係喇,睇實物其實好樣衰㗎!!

      刪除
  2. 我都係嗰句,真係整得好 pro 呀!

    回覆刪除
    回覆
    1. 小月呀,呢個世界有兩樣嘢叫化妝同攝影,好大威力㗎,一個醜女都可以變成美女!! XD

      刪除
    2. 但都要有幾分姿色先得咖,唔通好似我咁都可以咩>=<

      刪除
    3. 唔係呀,妳的自家出品都唔錯喎!

      刪除
  3. Kestrel:祝福您:新年進步!身體健康!

    回覆刪除
    回覆
    1. 小月,我都祝妳生活愉快、身體健康,兩位公子永遠孝順,妳自己就可以放開懷抱開心過日子!

      刪除
    2. 多謝您呀!承您貴言喇!

      刪除
  4. 個cream係有D瀉,但除此以外,其餘做得好好呀~~睇落就知好味!
    祝Kestrel新年快樂!心想事成!

    回覆刪除
    回覆
    1. 係囉,送禮俾人就唔多好喇!!

      多謝艾華斯哦!

      刪除
  5. 真係做得好pro! Kestrel, 新一年祝你生活愉快,身體健康!

    回覆刪除
  6. 拍馬都唔稱得上 pro 呀,睇實物好核突㗎!!

    多謝妳呀 Cici,我都祝妳廚藝高超!

    回覆刪除