味噌薑蔥蠔

        趁得閒繼續追番啲 “舊聞” 先！

 

        冷宮長期塞到爆，唔單只有幾多位佳麗都數唔清，就連個樣都唔記得咁滯，摷摷吓先發現原來仲有啲韓國急凍蠔都唔記得咗！整蠔最緊要係夠快手，如果唔係就縮哂水兼韌到咬唔爛，所以都係揀啲超簡單方法煮穩陣啲。

 

 

材料：
急凍生蠔
洋蔥
京蔥
青蔥
薑

調味料：
味噌
味醂

日式料理酒

- 生蠔用膠袋裝好，綁緊袋口，放入凍水內解凍，然後用少許生粉洗擦，沖水瀝乾。

- 洋蔥去衣後切粗絲；京蔥切去根及綠色部份，切粗片；青蔥切段；薑切絲。

- 味噌先用小量熱水開勻，然後與味醂及料理酒混合，備用。

- 燒熱油，放洋蔥同薑絲落鑊爆香，之後加入京蔥兜炒，灒酒。

- 兩樣蔥都炒至微微軟身後就放入生蠔，快手兜炒。

 

- 將蔥段加入，倒入調味料，兜勻後即可上碟。

 

 

 

咁樣整法超香、超惹味，所以要我放棄

唔食五辛都真係有點難度！！

 

雖然只係急凍貨色，但蠔嘅鮮味都非常濃，咁嘅價錢，抵食喇！