黃豆粉紅豆鬆餅 Kinako & Azuki Muffin

        年年入冬都係嗰句：天氣凍有乜好，人都懶啲！今年都仲未講過，但依兩個禮拜呢句說話就大派用場喇，真係懶到唔多願郁，朝早瞓醒之後都唔願落床，攪到一日都無得幾多時間用，就連 blog 都好耐無 update 到，積積埋埋有好多篇都未寫，要加把勁慢慢追番哂至得囉！

 

        先同大家分享今日新鮮熱辣出爐嘅 muffin 先啦！早幾日發覺包日式黃豆粉又過咗期，根據上次經驗，可以變到好濃油膉味，趁佢只係剛剛過咗期個零兩個月，而且味道又完全無變時要快手用埋佢。今早起身之後就煮好日式紅豆餡，加埋黃豆粉一齊整個和風 muffin 啦！

 

 

材料：
低筋麵粉          230 克
日式黃豆粉      20 克
泡打粉             2 茶匙
鹽                    少許
糖                    80 克
雞蛋                 2 隻
橄欖油             80 克
乳酪                100 克
紅豆餡            150 克

- 粉類過篩 2 次；將所有乾料放入兜內混合好；全部濕料攪拌均勻。

- 將濕料倒入乾料內，用膠刮快手攪拌均勻。

- 將麵糊勺入模內，放入已預熱至 200 ℃ 嘅焗爐內，焗約 20 分鐘即成。

以上材料份量可做鬆餅 10 個。

 

 

        記得之前睇電視節目講過，紅豆越大粒越難煮得腍，但唔知點解依家好似周圍都無細粒紅豆賣。我前一晚將紅豆洗淨後用清水浸過夜，之後水滾後落煲煲半粒鐘後熄火，原煲焗至完全涼透後就將紅豆隔清水份，放入冰格雪硬，將紅豆水煲番滾之後，整嚿紅豆冰毋須解凍，直接倒入水內煮，煮得幾分鐘之後就已經煮到爛哂喇！

 

 

加咗黃豆粉落去之後，味道特別香濃，

跟用花生粉效果差唔多。

 

 

 

 

Notes：
- 紅豆餡製作方法，請參閱《日式紅豆餡》。

- 若果無黃豆粉的話，可用全低筋麵粉製作。

- 記得麵糊切忌過度攪拌，避免產生筋性，成品口感變得紮實。