山合桃無花果裸麥包 Pecan Fig Rye Bread

        今日呢個裸麥包效果非常好，包質非常軟熟，簡直係撳扁咗都識彈回原形！！應該係我歷來咁多人手做麵包之中最理想的一次哦！

 

        又用老麵，又低溫發酵過夜，跟住又翻麵，加上今日天氣比較潮濕，成功造就出一個超鬆軟麵包。

 

 

材料：
山合桃           適量
無花果乾       適量
高筋麵粉       200 克
裸麥粉           50 克
麥芽粉           1 克
老麵              50 克
鹽                  4 克
糖                  15 克
橄欖油           10 克
即用酵母       1克
水                  約 150 毫升

- 山合桃放入已預熱至 140 ℃ 嘅焗爐內焗 15 分鐘至香味出，攤凍後切細備用。

- 無花果乾切成細粒；將其餘材料全部攪拌成糰。

- 將麵糰拎出，放上已灑粉嘅枱面，繼續搓揉及摔打成光滑麵糰，然後包入合桃及
  無花果。

- 將麵糰滾圓，放入已灑粉嘅兜內，用保鮮紙封好，發酵至一倍大後，放入雪櫃
  發酵過夜。

- 第二日將麵糰拎出室溫，繼續發酵至兩倍大。

- 麵糰排氣後翻麵，上下左右向內摺入，收口向下，靜置 20 分鐘。

- 再次排氣，壓平麵糰後上下兩邊向內摺入，之後再對摺，捏堅收口。

- 將麵糰略為搓長，放上已墊入爐防黏蓆嘅烤盤上，發酵至兩倍大。

- 發酵完成後麵糰表面噴水、割紋，並將焗爐預熱至最高溫度。

- 將爐溫調低至 220 ℃ ，放入烤盤、噴蒸氣，焗 20 分鐘。

- 10 分鐘後再次噴蒸氣，焗好出爐之後放上架上放涼。

 

唔使食落口，淨係切都已經 feel 到有幾軟熟喇！

 

 

 

 

 

 

我係用麵包機攪好個麵糰後先至繼續人手做埋餘下工序，

因為衰偷懶，包入合桃都掉理入部機代勞，點知

原來部機威力都幾強大，攪到啲合桃

都好碎，見都見唔到！！

 

 

 

 

 

Notes：
- 老麵製作方法，請參閱《發酵老麵》。

- 由於加有裸麥粉嘅麵糰會相對比較濕，所以建議先預留起部份水作調節用。

 

- 翻麵時麵糰摺入後毋須刻意捏緊收口，避免排出空氣。

 

- 若焗爐無噴蒸氣功能的話，可直接用噴水壺向爐內噴水，製造水氣。