菠菜煙肉批 (純素批底) Spinach Pancetta Quiche (Vegan Pie Crust)

        早一、兩個禮拜，老表同我講話佢睇到某藝人教整菠菜煙肉批，俾佢提醒咗我，原來我都好耐無整批喇，而且我一直都好想試試型仔廚師個 vegan pie crust 做法，所以禮拜二嗰日就的起心肝去 take action。

 

        整呢款 pie crust 簡單好多，又唔使雪，因為係第一次試做，所以我都好醒目咁預先留起 10 毫升水作調節，後尾發覺真係有點乾，諗住逐少加水去攪，點知一下子失控倒多咗少少，咪睇拘拘嗰 5 毫升水，咁就真係出事喇！個麵糰濕過頭，但我又唔想額外加粉，於是繼續攪拌，咪攪到個麵糰 over mix，食落口感比較實，有啲地方仲硬硬哋㖭呀，唉！！！！ 

 

 

 

批底

材料：
低筋麵粉      125 克
鹽                 少許
水                 約 40 克
橄欖油          25 克

- 麵粉過篩後與鹽混合，之後加水同油，用膠刮攪拌成糰。

- 批模搽油，用牛油紙墊底，放上麵糰，輕手推開壓入模內。

- 於麵糰表面用叉插孔，鋪上牛油紙，壓上重物，放入已預熱至 180 ℃ 嘅焗爐內
  焗 10 分鐘。

- 出爐後移開重物及牛油紙，放涼。

 

餡料

材料：
菠菜          4 棵
煙肉          適量
蘑菇          數粒
乾蔥頭      1 粒
雞蛋          2 隻
水             150 毫升

調味料：
鹽
胡椒

- 菠菜洗乾淨、略榨乾水份後切細；煙肉切碎；蘑菇洗淨後切片。

- 乾蔥頭去衣後切碎；雞蛋拂打成蛋液，加水混合。

- 燒熱油，將乾蔥蓉及煙肉爆香，加入蘑菇片同炒。

- 將菠菜加入炒至軟身，加鹽同黑椒調味，盛起攤凍。

 

組合

- 將已經放涼嘅材料平均放入批底內，倒入蛋液。

- 放上烤盤，放入已預熱至 200 ℃ 嘅焗爐內，焗 20 - 25 分鐘至蛋液完全凝固。

- 出爐後立即脫模，放架上放涼。

 
以上材料份量可做直徑 7 吋圓批 1 個。

俾番型仔廚師個 video 大家參考吓啦！

炒好哂餡料之後，睇見都想即刻食，於是就同自己講，

要試吓味先知味道夠唔夠嘛，於是食吓食吓，

差啲食哂，幾驚到頭來變咗要焗個大

蛋撻呀，哇哈哈哈 ~ ~ ~ ~ XD

除咗個批底衰咗之外，餡料其實好好食，蛋漿

又無焗得太老，真係美中不足！！

 

 

 

 

Notes：       
- 製作批底時，最好預留少部份水以調整麵糰軟硬度。

- 焗批底時記得用叉插孔，壓上重物，以防批皮因受熱而脹起。

- 雞蛋與水比例為 1：1.5，即 1 隻雞蛋 (50 克) 加 75 毫升水。