2015年4月19日星期日

好耐無蒸蛋糕

        原來已經成兩個禮拜無 update blog,做我哋呢行,一有長假期的話,個 schedule 就會打到亂哂,因為學生們會出外旅遊或趁假期補課,又或者係加堂準備考試,所以都會比較忙;加上上個禮拜又中招,今次雖然無失聲,但就勁咳勁流鼻水,仲肌肉酸痛兼頭痛,攪到乜都無心情做,連 blog 都唔願寫,所以嚟緊一有時間就會進行 清貨,疲勞轟炸大家哦,呵呵! ^^"
 
        先嚟講吓早前喺 Facebook「素食青年」群組的分享,之前上載咗蒸蛋糕嘅相,估唔到有咁大反應,當晚九點幾十點先 upload 相片,唔夠兩個鐘已經超過 130 like,仲水蛇春咁長嘅留言要求分享食譜,真係完全估佢唔到呀,因為覺得蒸蛋糕都係啲比較簡單易做嘅糕點,而且大部份人都會比較鍾意西式糕點多過中式蛋糕。後來睇清楚哂所有留言就明白箇中原因,大部份素友都話細個時必定食過,依家已經好耐無食,好想自己能夠整到嚟食,追尋番兒時味道,兒時回憶!
 
 
其實都已經好耐好耐無蒸蛋糕喇,每次食完之後
都好滿足,真係重溫番兒時味道㗎!
 
 
 
 
 
 
表姐成日都話蒸嚫蛋糕都發現個底會有糖沉底,我以前
試過好幾次,後來就試借鏡整西式海綿蛋糕方法,
座暖水打發雞蛋同糖,果然成功,之後
就再無出現過沉底嘅情況。
 
 
 
 
 
 
一路蒸,一路睇住麵糊膨脹,感覺好開心!
 
 
 
 
 
 
蛋糕其實發得都唔錯,不過就自己懶,無溝到中筋粉去整,
全用低筋粉就算,所以蛋糕質地比較乾同嚡,唔夠軟熟。





食譜請參閱《家鄉蒸蛋糕》。



10 則留言:

  1. 我細個都好少食蒸蛋糕呢,但蒸蛋糕的確方便D呢~~

    回覆刪除
    回覆
    1. 妳梗係八、九十後喇!! ^^

      查實如果嗰個人話細個時食過蒸蛋糕的話,都應該曝露咗自己年齡喇,哈哈!!

      刪除
    2. 哈哈,原來係咁架~我的確係八十後^^

      刪除
    3. 聽妳講就知啦!妳細個嗰陣時經濟已經比我哋嗰陣時好好多,父母都買得起西點俾妳食,唔使食中式蛋糕喇!我記得我讀中學時同同學講我未食過「KFC」,佢覺得好出奇,有咩可能呀!?但係窮就係窮,自己清楚知道家庭環境係點,從來都無要求過任何嘢!

      刪除
  2. 好番哂未呀?您要保重身體呀!

    回覆刪除
    回覆
    1. 未呀,仲有咳同流鼻水,不過又唔敢再食藥囉,因為真係好散,加上今日天氣又翳焗,喺街行時真係腳步浮浮兼 "wing wing 哋",幾驚喺街度暈低呀!!

      多謝小月妳關心呀! :)

      刪除
  3. 小時候cici係唔食蒸蛋糕嘅,雖然嫲嫲成日蒸。原因好簡單“因為唔靚囉”哈哈!

    回覆刪除
    回覆
    1. 我從來都唔會做呢啲行為,除非真係我完全入唔到口啦,好似牛同奶製品就係其一喇!

      刪除