2015年4月29日星期三

自製米粉及年糕

         之前都已經跟過兩個食譜去整韓國年糕,但始終都係唔夠滿意,質感硬係差啲,原來整嚫韓國食品最好都係跟番 Maangchi 姨嘅方法比較穩陣,包無失手,今次即管又試吓跟佢嘅做法,果然一擊即中,完全就係跟賣返嚟嘅年糕一模一樣咁煙韌!

        睇番 Maangchi 姨個網頁,有更加詳細解說資料,原來整年糕一定要用短身米至整得到,唔可以用長身米,短身米即係珍珠米、上海米之類;而長身米就係粘米、絲苗、泰國香米之類,難怪上兩次用粘米粉整唔到啦!!呢次醒咗喇,跟 Maangchi 姨用珍珠米打成米粉,之後再整成年糕,真係估都估唔到原來自己都可以做得到咁幼細嘅粉。至於之後整年糕,佢就係教用樁嘅方法去做,我當然無佢咁好精力慢慢樁啦,用麵包機代勞咪得囉,快靚正呀!!


 


自製米粉

材料:
珍珠米

- 先將米洗乾淨,然後用清水浸過夜。

- 翌日將浸發好嘅米倒入篩內,徹底瀝乾水份。

- 將米放入攪拌機內攪打成幼細粉狀,過篩即成。


自製年糕

材料:
米粉     240
        1/2 茶匙

         160 – 180 毫升
麻油     適量

- 先將水煲滾;與此同時,將米粉同鹽混合好。

- 滾水倒入米粉內,邊倒邊攪拌,直至拌成粉糰。

- 用微波爐保鮮紙包好攪拌碗,留一缺口疏散水蒸氣,放入微波爐用高火加熱 2 分鐘。

- 將粉糰反轉,輕輕攪拌,再加熱 2 分鐘,之後放入麵包機內攪拌成光滑粉糰。

- 取出粉糰,放上已塗麻油嘅枱面上,搓成粗身長條狀,然後切片即可。


浸發好嘅珍珠米記得要完全瀝乾水份先好放
攪拌機內攪打呀,否則就會黏成糰!
 
 
 
 
 
過篩後剩落嚟嘅粗粒可以放番入攪拌機內再打成粉狀。
 
 
 
 
 
之前兩次都係整成條狀,今次就試整片狀,原來一啲
都唔易呢,因為一切就變形,好樣衰哦!
 
 
 
 
 
煮韓式年糕,韓國辣椒醬係當中嘅靈魂哦!
 
 
 
Maangchi 姨親自教大家啦!
 

 

Notes
-
做好嘅米粉及年糕可以放冰格保存,年糕用之前需蒸熱至軟身,方便做形。

- 最好先預先留起少部份水,唔好一次過全部倒入,因唔同米種會有唔同受水性。

- 粉糰亦可以放入已墊紗布嘅蒸籠內蒸約 25 分鐘,但水用量需增至 240 毫升。

- 大家亦可參考另外兩個較容易做的方法,但質感有異:

  初試年糕製作


 

 

10 則留言:

  1. 回覆
    1. 係?但係用糯米粉整咪會好軟身,好似湯丸、糯米糍質地?我仲以為係用上海米整咋!

      刪除
  2. 嘩~~你有咩唔係自己整架,連米粉都係,太強啦!

    回覆刪除
    回覆
    1. 哈哈,妳又唔好講到我好似好怕用街買現成品咁,只係一來貪得意,二來經濟好多呀,依家買包韓國年糕都廿幾三十蚊包,我覺得唔多值囉!

      配鹹豬手一齊食嘅酸椰菜我就無辦法整喇!!

      刪除
    2. 我真心覺得你好強!自問無咁好心機呢~~

      刪除
    3. 咁又唔好咁講,我最多都只係比妳較為有多點心機啫,唔算係強,比我強十萬倍嘅人多的是,如果妳都有心機整的話,一定都可以做到,甚至好過我哦!

      刪除
  3. 回覆
    1. 哎呀,妳唔好咁講啦,我都只不過係專揀啲容易做嘅嘢去試整咋!

      刪除
  4. 連米粉同年糕都自己整,好勁呀

    回覆刪除
    回覆
    1. 其實真係唔難㗎,有麵包機幫手就更加輕鬆哦!

      刪除