2015年7月16日星期四

赤味噌煮雜菜

        我多數都會用赤味噌嚟煮餸或燜餸,好少用嚟整麵豉湯,因為味道比較濃、比較鹹,唔係咁適合我口味。
 
        呢個煮雜菜其實同西式煮法都差唔多,一樣有落茄膏,只不過加咗少少赤味噌提味。
 
 

材料:
洋蔥
薯仔
番茄
茄子
秋葵

調味料:
茄膏
赤味噌


- 洋蔥去衣後切塊;薯仔刨皮、番茄同茄子去蒂,沖洗乾淨後切件。

- 燒熱油,爆香洋蔥,之後落薯仔一齊兜炒片刻,加茄膏一齊爆香。

- 加適量水煮滾,然後轉中慢火煮至薯仔半腍。

- 加入茄子,煮至自己喜歡嘅軟腍程度。

- 味噌用少量熱水開勻成糊狀,加入鍋內兜勻。

- 翻滾後轉用慢火煮數分鐘;與此同時,洗淨秋葵、切段。
 
- 秋葵落鍋,兜炒約 1 分鐘即可,加適量鹽、糖調味。



雖然係第一次咁煮,但味道都唔錯,有點和風風味哦!
 
 
 
 
 
 
煮多咗留隔夜撈烏冬,又攪掂一餐,
夜返懶煮都唔使食街外嘢!






Notes
-
秋葵切忌煮得太耐,否則口感唔夠爽之餘又會產生大量黏液。
 
- 味噌落鍋後勿煮過久,味道及風味全失。


8 則留言:

  1. 秋葵生食都得架。 如果煮得耐,D潺走哂出來,會好難食。

    回覆刪除
  2. 味噌呢樣嘢,由日本運來,都賣得幾貴,但我家鄉就係很普通的粗糧,家家户户D長輩個個都識整,但不是個個都整得好味,但每年都會整夠一年用,係咸餸的一種,有錢的人就用來蒸肉煮菜,窮人就拍D薑蒜清蒸後,落D熟油就係一樣送飯的咸餸了。等下次返鄉下攞D出來,跟您煮吓先。

    回覆刪除
    回覆
    1. 但係我見過有網友自己整味噌都幾麻煩喎,又要發酵好耐,所以我就無起心整!

      妳家鄉長輩整多少少拎落嚟香港賣賺錢都得喎,妳自己實唔會買味噌啦!!

      刪除
  3. 回覆
    1. 其實我由細到大都唔係太好食肉,反而如果餐飯無蔬菜就食唔落!

      刪除
  4. 回覆
    1. 秋葵超有益呀!妳梗係又煮過龍喇!!

      刪除