與 blog 友交流煮食心得，分享生活點滴。
呢兩個禮拜「先施百貨」喺我屋企附近個屋邨商場度擺展銷場，真係估唔到呢間老牌百貨公司都會去到入嚟屯門嘅屋邨商場擺攤位，唔通「領匯」真係有啲 "偈仔" ？
原本諗住去睇吓有無銀包啱，點知整吓整吓最終又係變咗買同食有關嘅用具，由細到大，真係從未諗過自己會成日買埋哂啲廚房用具、餐具、砂煲 "冷" 罉之類嘅嘢。
今日去買餸經過商場時就買咗呢兩個密氣玻璃樽。
原本呢兩個玻璃樽係用嚟裝茶葉嘅，所以好密氣。
我見到都幾靚，而且價錢又唔貴，兩個夾埋 $50 都唔駛，真係抵到爛！
不過我唔會要嚟裝茶葉 o架，係有其他用途，到時再為大家報導。
另外再買多兩個相同牌子嘅膠蓋玻璃樽，呢兩個仲抵呀，$12 一套兩個，
雖然唔及果兩個玻璃樽咁密氣，不過都唔係太差，用嚟裝啲唔怕
翻潮嘅食材都 OK o架！
天氣咁熱，真係無乜胃口食飯，所以今晚煮咗魚湯米線，濕濕哋，容易入口之餘，番茄酸酸哋嘅味道，可以引起食慾。
材料：
米線
番茄
冬瓜
紅衫魚
蔥花
薑片
- 先煲滾水，落少少鹽，將米線煮腍，之後過冷河，瀝乾水備用。
- 紅衫魚刮淨鱗、洗乾淨後瀝乾水，待用。
- 燒熱油鑊，爆香薑片，之後將魚落鑊，煎到兩面金黃色後，就可以加水煮湯。
- 冬瓜去皮、去瓤，切粗粒。
- 番茄洗淨，去蒂後切件。
- 當魚湯煲至奶白色時，先加入冬瓜粒，煲至腍身。
- 待冬瓜煲腍後，就可以落埋番茄一齊煲。
- 當番茄都煲出味後，加鹽調味，跟住就將米線加入，再煲番滾就可以熄火，食時
可以灑上蔥花。
最初構思呢個魚湯時，都係抱住實驗心態，因為從來都未試過用番茄煲冬瓜，但出到嚟個效果又幾好喎，加埋魚湯一齊都好夾，好清甜。其實我今晚係唔記得咗落鹽調味 o架！
P.S. 平日去街市買魚時，幾乎檔檔都一定有紅衫賣，仲梗會有 $10 份果隻，但唔知點解今日啲紅衫好似失哂蹤，檔檔都無一份一份果隻賣，就算係 "段秤" 果種都鬼死咁細條，我又唔係蒸嚟食，無理由走去買啲 "段秤" 嘅貴紅衫嚟滾湯 o架！不過好彩喺街市兜咗幾個圈後，突然有檔無端端拎咗兩條出嚟賣，勁新鮮，又大條，都只係賣 $15 份咋，我見到當然買到買唔切啦！唔知係咪因為休魚期呢？
喺呢度都想請教各位 blogger，其實除咗紅衫，仲有無其他平、靚、正嘅魚可以用嚟滾湯 o架？我淨係識得用紅衫，如果有朝一日我要滾魚湯，但成個街市都無紅衫的話，咁我都可以有其他選擇嘛，唔通真係無得賣就 "企咗喺度" 咩！
上次買咗個大南瓜煮西汁蘋果南瓜炆肉排，因為實在太大個，明知一定食唔哂，所以切起咗 1/4個留用，正當我諗緊用嚟整乜好時，突然諗起好似有個食譜係用嚟整 muffin，於是就走去搵吓，睇吓自己有無記錯，點知真係俾我搵到喎，所以咪就照住食譜整咗呢個南瓜合桃鬆餅囉！
材料：
低筋麵粉 120克
泡打粉 1/2茶匙
牛油 70克
鹽 1/4茶匙
黃糖 55克
雞蛋 1隻
南瓜肉 120克
合桃 50克
牛奶 2湯匙
以上材料份量可做約 6 個鬆餅。
食譜參考自 Rachel Yau 嘅《精巧甜品 DIY 3》
- 南瓜肉切細粒，蒸熟備用。
- 合桃洗乾淨，用抹手紙索乾水份後，放入焗爐烘香，用180 °C 焗約 8 分鐘，之
後切碎。
- 所有粉類過篩 3 次。
- 牛油於室溫放軟後，加入黃糖打發至淡啡色。
- 加入雞蛋，並將牛奶逐少加入，拌勻。
- 跟住拌入麵粉、泡打粉同鹽。
- 最後將南瓜粒同合桃粒輕手拌入麵糊內。
- 將麵糊倒入模內至 8 分滿，放入已預熱至170 °C 嘅焗爐內焗 25 分鐘至熟。
出爐啦，顏色焗得好靚呀！
另外再整多 9 個細嘅，今次用呢隻錫紙模好方便，好易甩模，但係就
唔知係咪同用防黏模整雪芳蛋糕嘅道理一樣呢，個蛋糕無發得咁好，
用紙模果啲發得靚好多。
唔知點解，啲南瓜粒同合桃粒會向下沉，所以喺表面睇得唔清楚，切
開裡面就見得一清二楚，南瓜嘅橙色仲好吸引 o添！
因為用咗黃糖而唔係白糖，所以唔會太甜，味道啱啱好。腍身嘅南瓜同鬆脆嘅合桃放埋一齊，令到個鬆餅食落好有層次感。今次又係用咗電動打蛋器攪拌，所以好鬆呀！
Notes：
- 原食譜係用松子仁，但因為屋企無買到，所以我就用咗合桃代替。
- 原本 Rachel 係用原黑糖，但我見屋企果包黑糖非常之深色，怕整完出嚟之
後會變咗 "包公" 咁樣，唔靚仔，所以改用較淺色嘅黃糖 ( brown sugar ) 。
記得以前媽咪間唔中就會煮啲用西汁做嘅菜式，可能覺得甜甜酸酸，小朋友多數都會鍾意食，而我事實上又真係幾鍾意呢隻醬汁呀。讀初中時，因為唔係喺番屋企附近嘅學校讀，所以返唔到屋企食 lunch，於是媽咪就每朝早都提早一啲起身煮飯俾我帶番學校食。每次到咗 lunch time 時我都好期待打開個飯盒，睇吓有咩好餸食，如果係西汁煎雞扒的話，我就會好開心 o架啦，因為媽咪真係整得好好食。 但係因為已經好耐無食媽咪煮嘅餸，所以幾乎將西汁呢樣嘢遺忘咗！直到早幾個星期，Louisa 親自煮碟西汁煎大蝦俾我食，我先至記得番原來呢個世界上係有一種醬汁叫做「西汁」，反正好耐都無食過喇，今晚就用西汁煮肉排啦！
材料：
腩排
南瓜
蘋果
乾蔥頭
月桂葉 (Bay Leave)
檸檬皮
醃料：
生抽
鹽
糖
紹酒
粟粉
油
調味料：
鹽
糖
檸檬汁
紹酒
茄汁
喼汁
OK 汁
黑椒粉
- 腩排洗乾淨，用抹手紙索乾水份後，就加入生抽、鹽、糖同埋紹酒，拌勻後先醃
半個鐘，之後就加埋粟粉同油一齊醃。
- 南瓜去皮去瓤；蘋果去皮去芯，全部切件備用。
- 乾蔥頭去衣後洗淨，將當中三分之一切成細件，其餘原粒留用。
- 燒熱油，先放乾蔥頭同月桂葉落鑊爆香，之後加入肉排，灒酒，然後加鹽、糖、
檸檬皮及少少水拌勻，冚蓋後轉細火慢慢炆腍。
- 當肉排開始炆腍嘅時候就加埋蘋果同原粒乾蔥頭一齊炆，並加入檸檬汁、茄汁、
喼汁同 OK 汁。
- 見蘋果都煮腍時，就可以加埋南瓜落去，灑上黑椒，繼續以中火慢慢炆。
- 當南瓜都煮腍時，就可以上碟喇！
噚日喺街市見到有日本南瓜，賣 $5 一個，老實講，正宗日本南瓜又點會賣咁平呢？不過見到顏色好靚、好吸引，仲勁大個 o添，所以咪買個返嚟囉！
我專登將個蒜頭同個南瓜擺埋一齊，等你哋可以知道個南瓜有幾大。
啲瓜肉都好金黃色呀！
- OK 汁份量唔好落太多，因為味道頗酸。
其實手頭上都有好多唔同嘅麵包食譜，但係睇見有好多都好似好難整，尤其係仙姐果隻17小時中種，好多 blog 友都話無 KA / KM 就唔好整，真係嚇怕咗我，所以搵來搵去，最終都係揀番雪媽媽個食譜，好似比較易做啲，較為適合家庭製作及初學者。
材料：
高筋麵粉 160克
裸麥粉 90克
暖水 160毫升
乾酵母 ( Instant Yeast ) 4克
鹽 2克
糖 20克
橄欖油 12克
合桃 35克
紅莓乾 15克
橙皮乾 10克
- 先將酵母溶於溫水內，拌勻、靜止10分鐘。
- 將所有粉類材料、鹽同糖倒入不銹鋼盤內，加入酵母水，用手搓成粉糰，之後
取出，放喺枱面上，繼續搓至麵糰光滑。
- 逐少加入橄欖油，然後不斷搓揉同摔打麵糰，直至拉開麵糰時出現薄膜為止。
- 將麵糰滾圓並黏緊收口， 放喺已搽油嘅不銹鋼盤內，然後用保鮮紙冚住發酵約
45分鐘。
- 當個麵糰發大咗差唔多兩倍時，可將手指沾上高筋麵粉，之後插入麵糰，如果個
窿無即時收縮，就代表第一次發酵完成。
- 用拳頭打扁個麵糰，將裡面嘅空氣排出，然後將麵糰拎到枱面上分割成 4 小份，
將小麵糰滾圓後，冚上保鮮紙鬆弛 10分鐘。
- 將麵糰用擀麵棍擀平薄，然後放上合桃、紅莓乾同橙皮乾，將麵糰包好收口並再
次滾完。
- 將滾圓後嘅麵糰放喺已經鋪上防黏紙嘅焗盤上，放入焗爐內作最後發酵。
- 當麵糰發酵到大約兩倍大時，就篩少少高筋麵粉喺麵糰上面。
- 之後放入已預熱至200 °C嘅焗爐內內焗 25 - 30分鐘至熟。
參考食譜：《自家製麵包》by 雪媽媽
麵包果然好食，比想像中還要好，外皮焗到有少少香脆，包心裡面軟熟，加埋合桃同乾果一齊食，甜甜哋，好好食，真係諗唔到咁好食。
Notes：
- 可用電動打蛋器嘅搓麵糰槳攪成麵糰雛形，咁就可以慳番唔小力。
- 想清楚睇到麵糰搓柔時嘅各種形態，可睇番上次個法式小餐包各個步驟。
P.S. 之前睇過唔少書都話裸麥粉係比較濕潤，今次自己就完全體會得到，個麵糰搓來搓去都仲係好濕，所以我間中都落咗少少高筋粉落個麵糰度，咁樣會好少少。
星期二果日雖然心情唔係咁好，情緒有啲低落，但係一早 plan 好咗果日會整好多嘢食，所以照舊依計劃行事。第一樣要預備嘅係呢個柚子沙律。
其實今次已經係第二次整 o架喇，睇番篇舊 blog，原來啱啱好係一年前整過呢個柚子沙律 o架 (今個星期二係 4 Aug，之前整嘅係上年 5 Aug )！又會咁 "橋" 嘅？雖然都係跟番 Jacky Yu《囍宴》個食譜嚟整，不過今次就好食得多，一來有經驗嘛，梗會做得好過上次啦！二來就係今次買到個勁多汁嘅泰國金柚，唔似上次咁，好似 Lily 咁講比較乾、無乜汁，而且今次味道就更加 "迫真"，因為今次卒之買到金不換喇，加埋落去味道真係完全唔同 o架，即刻有東南亞 feel 好多！
材料：
泰國金柚
金不換
乾蔥頭
馬蹄
椰絲
蝦米
花生
沙律汁：
青檸汁
魚露
辣椒汁
砂糖
- 泰國金柚剝皮後拆肉，撕成柚子碎。
- 馬蹄去皮，拍扁後切碎。
- 乾蔥頭去衣，洗淨後切圈備用。
- 椰絲放入焗爐內烘香；花生可同時放入焗爐內烘至乾身，就比較容易
去衣，之後再放白鑊內炒香，攤凍後就可以壓碎佢。
- 蝦米預先洗淨，用熱水浸至軟身，之後用抹手紙索乾水份後就放落油鑊
度炸脆，瀝乾油備用。
- 金不換洗乾淨之後剪成幼絲。
- 沙律汁材料全部拌勻待用。
- 將柚子碎、馬蹄碎、乾蔥圈同金不換放入大碗內，加入沙律汁拌勻後，
灑上烘香椰絲、炸脆蝦米同花生碎就可以享用。
Notes：
- Louisa 話買金柚要揀三角嘜牌，因為係最好食喎！
- 怕生乾蔥頭味道會太刺激的話，可以先用凍水浸約半個鐘，咁就可以減
少紅蔥頭嘅辛辣味。
- 批好皮但又唔係即刻用嘅馬蹄，可以先用水浸住，以防變色。
- 原本 Jacky 係用新鮮椰絲烘香，但我唔知邊度有得賣，所以用咗普通乾椰絲。
- 食譜話如果鍾意食辣就可以加入紅辣椒，不過我怕太辣，所以只係用咗辣椒汁
代替。
P.S. 原本我已經搭 Louisa 買定金不換同青檸 o架喇，點知走果陣時淨係記得拎金不換而唔記得拎青檸走，後尾喺街市見到有得買，但要成 $2.5 一個，咁都無辦法啦，就算貴都唯有照買啦！點知返到屋企睇番食譜，原來青檸汁要成 5 湯匙咁多，但我又唔想為咗粒咁細嘅青檸仔又落多次街，果日大風大雨呀，好彩雪櫃有兩個檸檬，咁咪唯有切半個檸檬榨汁代替青檸汁囉，反正味道唔差得太遠。真係激死人呀 ~ ~ ~！
前日瞓醒覺前，我發咗一個夢 …………
我喺條街度慢慢踱步，一路行，一路搵緊我老豆，後尾見到表姐 Flora，我就問佢有冇見過我老豆，佢無出聲，跟住就指咗一個方向，於是我就跟住果個方向慢慢行，繼續搵我老豆。 行到咁上下，又再次遇到 Flora，今次唔係我問佢嘢，而係佢向我揮手，示意我行過去佢果邊。當我差唔多行到去佢身邊時，佢突然指向另一方向，於是我就下意識咁即刻望過去，見到果邊有條長龍喺度等緊車，心諗，表姐梗係想話俾我聽，我老豆喺度排隊等緊車，於是我就一步一步慢慢行過去搵佢。越行越近條人龍時，我就越嚟越清楚睇到果啲人嘅樣，仲發現原來有個女人坐咗喺個龍頭度，個心仲喺度諗，點解佢咁正，可以坐喺度等車嘅！話口未完，原來果個女人係媽咪嚟 o架！！我當然即刻一枝箭咁撲過去啦！跑到去佢身邊之後，心情非常非常之激動，乜嘢都無講就即刻跪咗喺地下，伏咗喺媽咪個膝頭上面係咁喊、係咁喊，喊得好厲害，一句嘢都無講過，但係果啲喊聲已經充份話到俾佢聽，我係幾咁掛住佢，而媽咪亦好似 sense到我嘅感覺咁，即刻放咗隻手喺我膊頭上面，輕輕咁喺我膊頭上面掃吓掃吓，佢呢個動作，令到我更加激動，更覺可憐，越喊越大聲，越喊越厲害，就係咁樣，我就喊醒咗喇！ 果然，真係好連戲，俾我見番哂正話嘅情景，我一樣都係伏喺度喊，不過今次唔再係伏喺媽咪個膝頭度喊，而係伏喺自己個枕頭度狂喊，因為其實根本已經瞓唔番，只係自己情緒亦未平伏到，不受控咁狂喊，仲喊到不斷抽搐，真係唔知點解會咁樣！除咗媽咪啱啱離開我果段日子會成日喊之外，近排已經好少喊得咁犀利，仲以為時間真係可以將唔開心嘅記憶慢慢沖淡 o添，但原來係唔會囉！個心仲係好難受。真係唔係講笑，如果唔係因為有信仰支持自己，我諗我好大機會已經唔喺度！ 瞓醒起身梳洗之後，就如常落街買餸。其實當時仲係落緊細雨嘅，不過我就刻意唔帶遮，一心要行我想行嘅 "避雨路"。媽咪以前曾經教過我：「嗱，如果突然間落雨而你又無帶遮的話，就記得行我依家帶你行呢條路喇，一路都有簷蓬擋雨 o架！只係要過馬路時，或者簷蓬與簷蓬之間要淋少少雨啫！」當我一路行緊呢條 "避雨路" 時，感覺就好似媽咪一直都陪喺我身邊，繼續帶我行到商場為止。雖然一切都只係我自己想像出嚟，但係我己經覺得好滿足、好安慰，個心舒服咗好多、好多，喺呢一刻，我深深明白到，知足係幾咁可貴，只係行過一條好普通嘅路徑，已經可以咁心滿意足！ 其實我一直都好驚時間真係會將我對媽咪嘅記憶、印象慢慢沖淡，所以喺屋企每個角落，我都會擺放媽咪嘅相喺度，等我可以成日見住佢，以免時間耐咗，連媽咪個樣都唔記得咗。畢竟，學 Li Kien 話齋，能夠記住一個人始終係一件好事。 究竟，我幾時先至可以見番媽咪呢？成世人都無乜慾望、無乜願望嘅我，睇嚟，呢個就變成咗我呢世人唯一嘅宏願！ 葉師兄教過我，誦完經之後可以補充多句：「求菩薩保祐，願我臨終無障礙。」呢樣嘢對我嚟講真係好重要，當然，自己都要修得到先得！
當個人醒咗之後，發覺眼尾真係有眼淚，而自己亦怪責自己，呢兩年嚟其實都好少夢到媽咪，就算夢到都只係普通生活片段，從無傾過心事，表達自己對佢嘅思念，點解呢次唔好好把握機會，淨係識得喺度喊呢？卒之一句說話都無講過就醒咗！反正都唔係完全醒哂，於是我就不斷叫自己快啲瞓番，希望能夠延續到個夢，再次見番媽咪，咁就可以同佢傾偈。
噚日我哋成班人喺 Louisa屋企一齊開 party、整嘢食，除咗我同 Louisa 一家四口之外，仲有 Winnie、Li Kien 同 Danny。
同 Arthur、Louisa 上完堂之後，食咗兩盒刺身做 lunch 之後就開始郁手整嘢，準備晚餐，估唔到一做就做到夜晚 9 點幾，未停過手，都幾攰呀，好彩有 Winnie 幫手咋，唔係就死得囉！真係好佩服 Louisa 一個人都可以做到咁多嘢，唔駛人幫，佢仲話唔覺好辛苦 o添，強呀！
呢個係我喺屋企整好拎過去嘅柚子雪芳蛋糕，專登整俾 Louisa 試味嘅。
Louisa 見到我整咗個雪芳蛋糕咁靚，佢又心郁郁想整番個，於是就整咗呢個班蘭雪芳蛋糕。有冇覺得個形狀怪怪哋咁呢？因為焗果陣發得太勁囉，你哋睇吓下面張相就知喇！
嘩，發到咁勁嘅，簡真係個原子彈磨菇雲咁呀！唔通用貝印 (KAI) 模係唔同啲！
倒扣攤凍之後就好好多喇，收縮咗唔少。
所以個形狀咪變成咁樣囉！
呢個係個雪芳模裝唔哂啲麵糊，另外用個長模裝住嚟焗。
顏色一樣咁靚，食落有香濃椰汁味同班蘭味。
好啦，跟住到戲肉，即係夜晚果餐喇！
我同 Winnie 一齊整嘅香橙甘荀湯。清清哋，加上香濃橙味，正！
主角出場喇，就係 Louisa 整嘅海鮮意大利飯。原本佢係諗住整西班牙炒飯 (Paella) 嘅，不過因為用太多料，好麻煩，所以咪簡化成煮 risotto 囉！不過一樣咁好味，啲飯索哂啲海鮮嘅鮮甜味，好好食。
Louisa 喺廚房洗洗吓蝦時，專登走出嚟叫 Winnie 影低呢隻巨型大蝦。
Louisa 整嘅雞柳串燒。
呢個係我點嘅餸，由 Louisa 煮嘅青咖喱雜菜，啲豆角係我老豆個朋友自己種嘅。
繼續係 Louisa 整嘅，聰明嘅你，一睇啲紋就知道係點整啦！咪就係用 Le creuset grill pan 豬煎扒囉！豬扒好鮮味，好嫩、好 juicy，唔知係咪真係用 Le creuset grill pan 煎出嚟嘅豬扒特別好食呢！
又係我同 Winnie 一齊整嘅麥皮雞翼。本來係烤到好脆 o架，不過影得相嚟攪到腍番哂，真係可惜！
要令呢餐飯食得開心又完滿，又點少得好食嘅 dessert 呢！呢個 Gâteau classique au chocolat 係我同 Winnie 夾手夾腳一齊整嘅，不過做唔到裂面、收腰，唯有放多啲色彩鮮豔嘅水果上去轉移視線喇！
比起上次整俾 Arthur 做 birthday cake 果個蛋糕，今次呢個啲朱古力味香濃好多，因為今次嘅可可粉同朱克力我都係用 Valrhona，而且仲用咗 72% 嘅朱古力整 o添！
當然唔少得 Louisa 個班蘭戚風啦！
今餐食得豐富又開心，最重要係自己有份整，唔係好似平時咁喺度等食。鍾意整嘢食嘅人，有份參與製作係開心好多 o架！所以我都同 Louisa 講，我哋得閒就攪吓呢類 party，除咗有餐食，仲可以加快縮短我哋個 " To Do List " o添，真係一舉兩得呀！
