冬瓜粒番茄魚湯米線

        天氣咁熱，真係無乜胃口食飯，所以今晚煮咗魚湯米線，濕濕哋，容易入口之餘，番茄酸酸哋嘅味道，可以引起食慾。

材料：
米線
番茄
冬瓜
紅衫魚
蔥花
薑片

- 先煲滾水，落少少鹽，將米線煮腍，之後過冷河，瀝乾水備用。

- 紅衫魚刮淨鱗、洗乾淨後瀝乾水，待用。

- 燒熱油鑊，爆香薑片，之後將魚落鑊，煎到兩面金黃色後，就可以加水煮湯。

- 冬瓜去皮、去瓤，切粗粒。

- 番茄洗淨，去蒂後切件。

- 當魚湯煲至奶白色時，先加入冬瓜粒，煲至腍身。

- 待冬瓜煲腍後，就可以落埋番茄一齊煲。

- 當番茄都煲出味後，加鹽調味，跟住就將米線加入，再煲番滾就可以熄火，食時
  可以灑上蔥花。

        最初構思呢個魚湯時，都係抱住實驗心態，因為從來都未試過用番茄煲冬瓜，但出到嚟個效果又幾好喎，加埋魚湯一齊都好夾，好清甜。其實我今晚係唔記得咗落鹽調味 o架！ 但係出奇地鮮味，唔講都真係完全唔知無落度鹽，一啲都唔覺 "寡"，可能係紅衫魚始終係海魚，有一定鹹味，再加上今日買到果兩條魚非常新鮮，眼仔碌碌，好晶瑩剔透，所以啖湯都特別鮮味啩！

P.S.  平日去街市買魚時，幾乎檔檔都一定有紅衫賣，仲梗會有 $10 份果隻，但唔知點解今日啲紅衫好似失哂蹤，檔檔都無一份一份果隻賣，就算係 "段秤" 果種都鬼死咁細條，我又唔係蒸嚟食，無理由走去買啲 "段秤" 嘅貴紅衫嚟滾湯 o架！不過好彩喺街市兜咗幾個圈後，突然有檔無端端拎咗兩條出嚟賣，勁新鮮，又大條，都只係賣 $15 份咋，我見到當然買到買唔切啦！唔知係咪因為休魚期呢？

          喺呢度都想請教各位 blogger，其實除咗紅衫，仲有無其他平、靚、正嘅魚可以用嚟滾湯 o架？我淨係識得用紅衫，如果有朝一日我要滾魚湯，但成個街市都無紅衫的話，咁我都可以有其他選擇嘛，唔通真係無得賣就 "企咗喺度" 咩！