雙果煲螺頭

        一向以來，煲湯都係我嘅弱項，雖然話就話將所有材料放哂落煲就攪掂，但係我就唔係好識得去配搭食材煲湯，又或者中藥材嘅運用，所以好多時都只係煲番以前飲過媽咪煲嘅湯，如果唔係就要去參考食譜書啦！

        之前睇過方太一本專教煲湯嘅食譜，見到有個湯好特別，用水果煲螺頭。平時聽到煲螺頭湯都係會用啲比較傳統嘅中藥材，好少聽到用水果煲，所以今日就試吓參考呢個食譜嚟煲螺頭湯。

材料：
急凍螺頭
蘋果
雪梨
豬腱
南杏
北杏
蜜棗
陳皮
薑片

食譜參考自方太《輕鬆煲靚湯》。

- 螺頭解凍後先切去內臟，洗乾淨；煲滾水，放薑片，將螺頭放入汆水，盛起用水
  沖洗，備用。

- 豬腱洗乾淨，汆水後用水沖洗。

- 蘋果、雪梨去皮，切開 4 份後去蒂、去核，待用。

- 南、北杏同蜜棗用水浸十零分鐘，略沖水；陳皮用熱水浸軟後，去瓤、洗淨。

- 將所有材料全部凍水落煲，大火煲滾後，轉中小火繼續煲 20 分鐘，之後轉大火
  煲多 1分鐘，就放回真空煲內。

- 飲用前，將湯煲番滾之後再煲多 20 分鐘，加鹽調味就可以。

Notes：
- 若螺頭表面有黑色物質，可用牙刷刷去洗淨。

- 因大部份食材嘅甜味都只會溶喺凍水內，所以最好凍水落料。