2009年8月17日星期一

簡易壽司 DIY

        天氣真係變幻莫測,一係就由朝到晚都落雨,一係就熱到標汗,想唔病都幾難!雖然上次整冬瓜粒番茄魚湯米線時話濕濕哋易入口,但係其實食湯麵熱辣辣,一樣食到成身汗,所以最好都係食啲唔駛煮嘢,整壽司就最適合不過!


        細個果陣,媽咪間中會整壽司俾我食,因為我勁鍾意食嘛! 之後比較大個啲就幫手一齊整,係好開心親子活動呀!到讀高中時,媽咪已經淨係負責買料,之後所有步驟都放手交哂俾我做,由洗洗切切到包壽司都係自己一手包辦,諗番起,應該係我最早入廚整嘅一樣嘢!


        本來諗住可以去「惠康」度買啲三文魚返嚟包入壽司度嘅,但係呢輪間惠康大翻新,原本已經係一間勁大嘅超級廣場,依家仲封埋商場外向街果條走廊嚟擴大面積,"大興土木",要等到 9 月中先至完全裝修好 ( 依家好慘,行上去買嘢不單只無冷氣,仲沙塵滾滾,長期都好似彌漫薄霧咁款,最慘係啲收銀阿姐,無冷氣咁熱仲要戴個口罩防塵,真係難頂!) ,攪到依家咗個熟食、燒臘同魚生壽司 counter咁唯有到時先再整過三文魚壽司囉!咁今次就食住蟹柳先啦!



材料:
珍珠米
漬蘿蔔
蟹柳
溫室青瓜
壽司紫菜
白醋


- 先洗好米,放入飯煲內煮熟。與此同時,將解柳放於飯煲內蒸架上蒸熱。


- 飯煮好後,將飯打鬆,加入少量白醋拌勻,攤凍備用。


- 青瓜洗乾淨,與漬蘿蔔一齊切成幼條。


- 壽司蓆上放上紫菜,然後將飯均勻鋪上,稍為壓平。


- 將蟹柳、青瓜同漬蘿蔔放於飯面上。


- 將壽司蓆捲起,邊捲邊用手按住中間材料,並將壽司壓實。


- 捲好後,將壽司兩端稍為用力壓一壓,以確保飯同紫菜黐實。


- 最後就可以將壽司切件,配以酸薑、醬油同 wasabi 一齊享用。





        今日整呢個壽司其實非常之唔正宗,用哂
啲代替品去整:壽司米變珍珠米、壽司醋變白醋,連壽司醬油都係自己調配!因為唔想為咗整一次半次壽司就走去買咁多 "專業" 用料返嚟,如果真係整每樣嘢都咁講究,用齊所有正宗材料,睇怕我屋企都唔可以住人,要讓位俾啲食材 "入住" 至得喇!所以就地取材,屋企有咪就用咪,好方便,反正我都係咁食落肚 o架啦!



Notes:
- 壽司材料可隨個人喜好而變更。


- 最好每一次落刀切壽司之前都先用食水將刀蘸濕,咁樣啲飯就無咁易黐住把刀,
  切口都會整齊平滑好多。


- 係放紫菜上壽司蓆之前,可以先鋪上一張保鮮紙,以防止飯粒或材料直接黏
  蓆上,保持壽司蓆清爽乾淨,咁就唔怕影響壽司外觀。



P.S.  今日去過超市睇個好幾個牌子嘅壽司醬油,原來其實同普通醬油無乜太大分別,只不過係學 Louisa 咁講味道會啲,同埋加多糖及味醂入去,所以我就試用屋企樽濃縮冷麵醬油加糖及味醂調味,做成壽司醬油。味道都 OK 喎,可能樽冷麵醬油同樣都有加入昆布、木魚製造,所以好鮮味。咁就唔駛又專登走去買支壽司醬油放喺屋企喇。


        唔怪得之 Louisa 都話,日本人所謂嘅秘製醬汁,咪又係不外乎醬油、糖、味醂同清酒!我以為照燒汁係咁啫,原來連壽司醬油都係咁!其實可能只要有支「萬字醬油」同味醂就已經可以變化出好多種日式醬汁喇,呵呵!


2 則留言:

  1. 唔知點解我煮親d飯都好淋, 而紫菜又唔脆, 有咩技巧呢?
    [版主回覆08/27/2009 01:21:00]        我 諗妳應該係落得太多水煮飯,應該比平時煮飯少 啲水,因為珍珠米 / 壽司米煮好之後都係比較濕同黏,之後又要加壽司醋 o添!         至於紫菜就應該好難會脆啦,因為無論點乾 嘅飯都無可能完全一 啲水份都無,包壽司時又要用少少力將飯同紫菜壓實,所以唔多唔小都一定會腍囉!

    回覆刪除
  2. 【★↙孤戀花↘★】▁▂▃▄▅▆▇2010年7月2日 下午5:59

    D漬蘿蔔係咩味架?好5好食架?我見好多人包壽司都會落軟定硬?
    [版主回覆07/03/2010 01:37:00]        咩味呀?Hm............我都唔知點形容俾妳聽喎!呢隻味好似係我 哋中菜中係無 o架喎!不過都係同醃菜果類味道啦,有少少甜 o架,不過就係腍身,唔似中國 嘅菜甫咁樣爽脆 o架!         好唔好食?我唔知點答妳喎,我用得就梗係會話好食啦,口味呢樣 嘢好難講,人人唔同,好似一般人都好鍾意西點落牛油、芝士,覺得好香,但我自己就驚得好緊要,味道稍為濃 啲我就即刻反胃兼作嘔,臭到想死!         妳可以去超市度買 嚿細 嘅 嚟試 吓先啦!整壽司時一定會落佢,因為貪佢顏色靚之餘,仲夠哂和風嘛!

    回覆刪除