簡易壽司 DIY

        天氣真係變幻莫測，一係就由朝到晚都落雨，一係就熱到標汗，想唔病都幾難！雖然上次整冬瓜粒番茄魚湯米線時話濕濕哋易入口，但係其實食湯麵熱辣辣，一樣食到成身汗，所以最好都係食啲唔駛煮嘅嘢，整壽司就最適合不過！

        細個果陣，媽咪間中會整壽司俾我食，因為我勁鍾意食嘛！ 之後比較大個啲就幫手一齊整，係好開心嘅親子活動呀！到讀高中時，媽咪已經淨係負責買料，之後所有步驟都放手交哂俾我做，由洗洗切切到包壽司都係自己一手包辦，諗番起，應該係我最早入廚整嘅一樣嘢！

        本來諗住可以去「惠康」度買啲三文魚返嚟包入壽司度嘅，但係呢輪間惠康大翻新，原本已經係一間勁大嘅超級廣場，依家仲封埋商場外向街果條走廊嚟擴大面積，"大興土木"，要等到 9 月中先至完全裝修好 ( 依家好慘，行上去買嘢不單只無冷氣，仲沙塵滾滾，長期都好似彌漫薄霧咁款，最慘係啲收銀阿姐，無冷氣咁熱仲要戴個口罩防塵，真係難頂！) ，攪到依家無咗個熟食、燒臘同魚生壽司 counter，咁唯有到時先再整過三文魚壽司囉！咁今次就食住蟹柳先啦！

材料：
珍珠米
漬蘿蔔
蟹柳
溫室青瓜
壽司紫菜
白醋

- 先洗好米，放入飯煲內煮熟。與此同時，將解柳放於飯煲內蒸架上蒸熱。

- 飯煮好後，將飯打鬆，加入少量白醋拌勻，攤凍備用。

- 青瓜洗乾淨，與漬蘿蔔一齊切成幼條。

- 壽司蓆上放上紫菜，然後將飯均勻鋪上，稍為壓平。

- 將蟹柳、青瓜同漬蘿蔔放於飯面上。

- 將壽司蓆捲起，邊捲邊用手按住中間材料，並將壽司壓實。

- 捲好後，將壽司兩端稍為用力壓一壓，以確保飯同紫菜黐實。

- 最後就可以將壽司切件，配以酸薑、醬油同 wasabi 一齊享用。

        今日整呢個壽司其實非常之唔正宗，用哂啲代替品去整：壽司米變珍珠米、壽司醋變白醋，連壽司醬油都係自己調配！因為唔想為咗整一次半次壽司就走去買咁多 "專業" 用料返嚟，如果真係整每樣嘢都咁講究，用齊所有正宗材料，睇怕我屋企都唔可以住人，要讓位俾啲食材 "入住" 至得喇！所以就地取材，屋企有咪就用咪，好方便，反正我都係咁食落肚 o架啦！

Notes：
- 壽司材料可隨個人喜好而變更。

- 最好每一次落刀切壽司之前都先用食水將刀蘸濕，咁樣啲飯就無咁易黐住把刀，
  切口都會整齊平滑好多。

- 係放紫菜上壽司蓆之前，可以先鋪上一張保鮮紙，以防止飯粒或材料直接黏喺
  蓆上，保持壽司蓆清爽乾淨，咁就唔怕影響壽司外觀。

P.S.  今日去過超市睇個好幾個牌子嘅壽司醬油，原來其實同普通醬油無乜太大分別，只不過係學 Louisa 咁講味道會濃啲，同埋加多咗糖及味醂入去，所以我就試吓用屋企樽濃縮冷麵醬油加糖及味醂調味，做成壽司醬油。味道都 OK 喎，可能樽冷麵醬油同樣都有加入昆布、木魚製造，所以好鮮味。咁就唔駛又專登走去買支壽司醬油放喺屋企喇。

        唔怪得之 Louisa 都話，日本人所謂嘅秘製醬汁，咪又係不外乎醬油、糖、味醂同清酒！我以為照燒汁係咁啫，原來連壽司醬油都係咁！其實可能只要有支「萬字醬油」同味醂就已經可以變化出好多種日式醬汁喇，呵呵！