奇異果醬西多士

        都有好一段時間無整西多喇，因為我自己比較鍾意食歐陸麵包，所以好少買白方包，即使有喺屋企，有時又懶，嫌麻煩，就咁搽果醬食鬼咗佢就算，難得今日比較得閒，又有隔夜方包，咪又玩吓囉！

 

        西多係煎而唔係炸㗎！有睇開我個 blog 嘅 blogger 都知道，我最憎就係炸嘢，炸完嘢之後，果鑊油都唔知點處理好，倒又唔係，唔倒又唔係，好煩！而且炸嘢之後通常啲油都彈到周圍都係，仲要嘥時間做善後工作，食幾多都保唔番呀！

 

 

材料：
白方包
雞蛋

奇異果果醬

- 先用果醬搽勻喺麵包上，然後疊上另一塊麵包喺面，輕輕力將佢壓一壓實，等兩
  塊麵包可以好穩陣咁黐實。

- 準備好所有麵包後，將麵包皮切去，備用。

- 雞蛋拂打成蛋液，將麵包均勻醮上蛋液。

- 燒熱油，放麵包落鑊，用中慢火煎到每面都金黃色就完成。

 

Notes：
- 做好用隔夜 (甚至隔兩、三晚 ) 麵包嚟整，因為麵包變得比較乾身、硬淨，易於切
  去麵包皮及煎完之後會較挺身。

 

- 如果唔想炸，好似我咁煎的話，記得要有耐性用中慢火慢慢煎，因為會好易燶。

 

- 如果唔食果醬的話，可以用花生醬同芝麻醬代替，都係唔錯嘅選擇。

 

- 切咗出嚟嘅麵包皮，可以用嚟整香脆多士條，放白鑊內炒至香脆就得，

  唔駛浪費食材。