合桃黑包

        依家每個禮拜都要去將軍澳坑口間琴行教琴，琴行附近就係東港城同蔚藍灣畔商場，所以好多時我都會提早去到行一陣或者食 lunch (of course，其實已經係人哋嘅 tea 啦)。

        今日喺 Taste 裡面間 A1麵包見到我嘅至愛 — 合桃黑包做緊優惠價，原本 $13半個、$24 一個，減到 $11半個、$22 一個，呢個時候，梗係買都買唔切啦！係我屋企附近海趣坊間 A1 成日都無貨，個 sales 話俾我聽呢個包係全店最好賣嘅，好多時一出爐無幾耐已經買哂，佢話叫我下次打定電話俾佢哋預留，我就一定會買到 ( 嘩，駛唔駛咁誇張呀！不過我喺東港城呢間都好少見到)，呢個包又真係好好食嘅，難怪會有咁多 fans。

        同裸麥合桃提子包一樣，第一次食呢個包都係媽咪喺海趣坊間 A1 麵包新開張無幾耐果陣。當時我哋食完之後都覺得非常好食，所以之後間中被我 "吼" 到徬晚時份開始做特價 ($10 半個 )，我都一定會買。我第一次嘗到黑麥包嘅美味，就要多謝媽咪買俾我食啦，果然係知我者莫若母！自此之後就愛上咗黑麥包，所以點解我會叫 Lily 去 Pumpernickel 買個正宗黑麥包俾我試哩！      

        因為佢係用黑麥粉做，所以好有嚼勁 (突然間覺得自己好文雅，應該口語化啲，係 o趙頭 )、好有麥香，而且啲合桃係全去衣 ( 真係去得好乾淨，一啲衣都無，全粒都金黃色 )，所以絕對無任何 Lily 怕嘅苦澀味。因為黑麥包 texture 比較 heavy，所以食兩三塊都已經好飽肚 lu！

黑麥小紅莓提子包 & 朱古力撻

        最近，屋企附近嘅蝴蝶村商場，同其他領匯旗下嘅商場一樣大興土木，裝修後引入連鎖式店舖，提升商場級數，將會有大家樂、迴轉壽司……。

        對我嚟講，最有建設性嘅舖頭就係美心西餅，因為我經常買麵包食呀嗎！同埋咁多間集團式餅店中，美心嘅糕餅係最好食。果然係新屎坑三日香，一開張就迫到人山人海，我影呢張相時已經係揀無咁多人嘅時候影啦。

        我都無諗過呢間屋村舖都一樣會用水晶吊燈做裝飾，以為淨係大商場同人流旺嘅分店先會用呢款裝修。既然新開張，梗係要幫襯吓啦，於是我就睇中咗呢個新輕樂 — 黑麥小紅莓提子包。

        平時食慣嘅黑麥包通常都係比較重身、比較硬淨，而美心呢個就名符其實的 "輕" 同軟，所以只係抱住即管試吓嘅心態，並無抱太大期望，但係一食落口，個包嘅 texture 都唔差喎，有種好實在、煙煙韌韌嘅口感，都幾好呀，當然，同正式嘅黑麥包相比，梗係差啲啦。小紅莓同提子酸酸甜甜，都幾好味呀。

        講完麵包，就講吓西餅。其實我一向對西餅都無乜熱衷，尤其係果啲用好多 cream 做嘅餅，就真係多謝夾盛惠啦。不過有一隻就幾好食，就係朱古力撻啦。

        我諗都唔係淨係我鍾意食，應該有好多人都鍾意，因為有次我同 Winnie 出街，本來想買番個嚟食，過吓口癮，點知我哋搵咗幾間分店都買哂呢款，所以好可能呢隻朱古力撻係最受歡迎西餅之一。

        個餅本身唔會太甜，朱古力味香濃，我特別鍾意佢裡面嘅質地，睇落似蛋糕，食落口似餅，但又無餅咁乾硬，有番些少蛋糕嘅鬆軟，好特別，介乎係兩者之間，撻底鬆脆香口，所以我好鍾意食。坦白講，如果唔係因為曾經喺學生屋企食過，我根本唔會試呢個其貌不揚嘅朱古力撻！呀，遲啲請教吓明仔，睇吓佢識唔識整呢種質地嘅餅先。

套裝碗碟？

        噚日又係去新港城教琴，行商場時又再走入上次買疏乎厘杯果間 Concept度，睇吓執唔執到荀嘢。今次買咗兩隻碟同一隻碗：

        同啲碗碟影完相，之後睇番先發覺原來我買果 3隻碗碟睇落去好似係一 set咁，但其實當時買果陣根本無留意到佢哋嘅色彩係咁 match，因為佢哋三隻係分別擺開，並唔係擺埋一齊 o架，所以證明我係比較鍾情於深色嘅嘢。

        下次再去就見唔到呢間舖喇，因為我聽到個老闆娘話會摺埋呢間舖，搬過去紅磡蕪湖街果頭，因為租金平啲，同埋人流都多啲喎。

芫荽紅蘿蔔煲粉葛

        今日又係十五齋期，所以煲齋湯。

材料：
粉葛
紅蘿蔔
芫荽
扁豆
赤小豆
蜜棗
鹽

        粉葛去皮、洗淨切片；紅蘿蔔刨皮、滾刀切件；芫荽洗淨備用；扁豆及赤小豆洗淨、隔晚浸透；蜜棗用熱水浸軟、略洗。水煲滾後，將所有材料放落煲，用中火煲約 15分鐘後就放番落真空煲，晚飯前再拎番出嚟煲幾個字，落鹽調味，啲湯就可以飲啦。

        咪以為煲齋湯無落肉會好 " 寡 "，因為粉葛同紅蘿蔔都好甜，加埋幾粒蜜棗就已經好夠味、好清甜，再加上芫荽嘅香味 ( 其實我係唔鍾意芫荽果陣味，但係煲完湯之後就無咁濃，又接受到喎，仲幾清香 o添！呢招係我同屋企人返新會時，喺老表屋企學到嘅，果次個工人係煲粉葛鯪魚，加埋啲芫荽落去煲，我哋又覺得幾特別、幾好飲，所以返到嚟香港都試著唔少次咁煲啦 )，呢個湯係諗都諗唔到咁好飲。

橄欖油潤膚露

        朝早走咗去海趣坊間華潤堂買猴頭菇，俾錢時喺收銀處見到擺咗好多貨品喺度做 promotion，其中睇到呢支橄欖油潤膚露：

        間舖就寫住呢支嘢原本賣 $3X，依家特價 $13.9，你信唔信呀？依家啲商舖超市奸到死，mark 到個價鬼死咁高嚟減番落佢做特價，你估啲市民白癡嘅咩！雖然十零蚊支潤膚露唔慌好得去邊，不過見佢十零蚊支，買嚟玩都抵啦，況且又未試過用橄欖油之類嘅潤膚露，即管買嚟試吓，睇吓佢有幾 "潤 "！

        老實講，我啲咁嘅超乾皮膚，都用過無數咁多種潤膚 / 護膚產品，有啲甚至係醫生寫紙去買，效果都差唔多，無乜太大幫助，我又唔捨得好似明仔咁買埋哂啲名牌貴貨，閑閑哋都幾百一千，貴都唔緊要，最怕就係咁貴買咗返嚟都係無乜用，咁就揼心！

        講番支潤膚露，原來佢唔只有橄欖油成份，仲有蘆薈 o添，聽落好似唔差，不過我都唔會抱太大期望。啲顏色好似凡士林潤膚乳，連啲香味都有幾分似，不過就無佢咁 "杰"，比較稀啲。初初搽落手度都覺得幾潤，但係過咗一陣就同其他牌子嘅潤膚露一樣，好快趣就變乾，所以始終都係 Neutrogena 隻 hand cream叫做較為好啲，不過我啲皮膚咁乾，用乜都係咁上下，始終一入冬就爆拆，啲手指就裂開哂，都捱咗三十幾年啦！

雪菜豆渣炒肉鬆

        見仲有好多豆渣剩，當然要繼續幫佢哋 "搵出路啦"，突然諗起阿馳個女友煮過一味類似雪菜毛豆炒肉鬆，於是就照板煮碗，用豆渣代替毛豆。

材料：
豆渣
雪菜
免治豬肉

醃料：
生抽
糖
鹽
粟粉
油

調味料：
蠔油
糖
辣豆板醬

        用醃料將豬肉醃好；豆渣白鑊炒至乾身；雪菜用水浸約 15 分鐘，減低鹹味。先將豬肉炒至 8 成熟，盛起備用。加少少油，爆香雪菜，加入豆渣炒熱，再加埋啲爆香咗嘅肉碎，兜均，最後加上調味料就完成。由於我屋企無普通豆板醬，只有泰式豆板醬，所以煮出嚟有少少東南亞風味，幾特別。記得唔好落鹽，因為雪菜同蠔油已經夠鹹啦！

裸麥合桃提子包

        今日教琴前喺德福行咗一陣，見到間新開戲院「德福MCL」裡面有間 cafe，於是就八卦入去睇吓，原來係 A1 Bakery 集團嘅 Das Gute，咁啱又我食開果隻裸麥合桃提子包又做緊特價 ( 原本 $19，依家賣 $16)，所以就買嚟做今晚嘅晚餐。

        第一次食呢個包係媽咪喺海趣坊間 A1新開張時買嚟試嘅，果陣都係第一次知道有裸麥呢樣嘢，外表睇落去好似好硬、好實，但係食落去又唔係喎，軟熟得嚟又好有質感。

        我鍾意佢除咗個包質之外，就係佢裡面嘅提子乾同合挑特別多，而啲合桃仲好鬆，唔會腍哂，食落口有好多種層次，所以每逢見到佢做特價我都會買嚟食，有時 "為食" 起上嚟，忍唔住口，唔減價都照買。(咁為食，點儲錢啊！)

紫菜豆乳味噌

        煮豆漿時，特登留起一啲豆漿唔落糖，用嚟煮呢個日式味噌湯。

材料：
無糖豆漿
味噌
紫菜
肉丸

調味料：
糖
鹽
雞粉

        先洗淨紫菜同肉丸，肉丸最好切十字花，一來靚啲，二來可以快熟啲同易啲出味。將豆漿煲滾 (小心會滾瀉 )，加入味噌，邊煲邊攪，直至所有味噌溶哂落水，亦可避免豆漿黏底。之後加入肉丸，直至肉丸脹大後就加埋紫菜落去，滾幾滾後，試一試味先好加調味料，因為唔同牌子、唔同品種嘅味噌，喺味道上有好大分別，所以一定要試啱自己口味。

麻蓉糯米糍

        今日整完薑汁豆漿，所以又有好多豆渣等我去處理，其實之前已經想整糯米糍好耐，見 Winnie 整芒果糯米糍又幾成功，所以就 "的" 起心肝去整，決定用之前煮芝麻糊時預先打好咗嘅黑芝麻粉同今日煮豆漿剩低落嚟嘅豆渣做餡。

材料：
糯米粉
黑芝麻粉
豆渣
砂糖
水
橄欖油
椰絲

        預先將豆渣放白鑊炒乾，之後加埋黑芝麻粉、橄欖油同砂糖一齊炒至乾身，咁就完成咗啲餡料啦。

        跟住就搓糯米粉糰，其實都唔難。先將糯米粉過篩，放入不銹鋼兜內，逐少咁加水，然後攪拌至適當黏度，就可以將粉糰攞出嚟搓，一直搓到柔軟而唔黏手就 OK，就好似呢舊咁樣：

        將粉糰分割成若干小粉糰後，記得鋪上濕毛巾，如果唔係果啲未用嘅粉糰就好容易變得乾硬。

        將小粉糰壓平 (唔好太過薄，如果唔係就好易穿)，包入芝麻餡後收口、搓圓，變成一粒大芝麻湯丸。

        煲滾水，將大湯丸放入滾水內煮至浮起後，再煲多3分鐘，盛起瀝乾水份後，趁熱轆上椰絲，然後放上模紙上攤凍，食得啦！

        雖然睇見都幾得，但係一食落口就……… 之前炒芝麻餡時，試過甜味已經好夠，比起我接受到嘅程度仲要再甜啲，但係食落口就一啲味都無，我老豆都話乜味都無，好奇怪！Winnie 食完之後，佢話俾我聽搓粉糰時係應該同樣要落糖嘅，可能就係呢個原因，餡料嘅味被個皮溝淡咗。

        另外，個皮都比較硬，我拎俾 Winnie 之前因為怕會變壞，所以放咗喺雪櫃度，到俾咗佢之後，佢諗住自己都無再放入雪櫃，都應該解凍哂啦，於是就咁食，點知一咬落去，成舊糯米糍粉碎咗！！佢話太乾硬啦，佢上次整芒果糯米糍一樣有放喺雪櫃度，但都唔會咁乾硬，所以我估係大家嘅做法唔同。佢係有加芒果汁落去搓皮，同埋係蒸熟咗先至包餡，所以可能咁樣整個皮會軟熟啲。Winnie 話佢後尾用微波爐叮番熱，變番軟後就好食好多啦，所以之後 Lily 入嚟學琴時，我都叮番熱先俾佢試食，佢話可能係個皮厚過頭，連我老豆都話叮熱之後好食好多，仲軟過當日整好後即食，不過 Lily 食完一粒之後，佢問我介唔介意俾佢食埋剩低果粒，佢話佢好想食喎，我當然無問題啦，起碼證明都唔係真係咁難食啫，哈哈！

        唔緊要，繼續努力，下次再試過，煮嘢食係要試好多次先可以做到最好。下次試吓用 Winnie 嘅方法去整，睇吓又成唔成功先。

Scone

        今次個 scone 都係 "黑玫瑰" (La Rose Noire) 嘅出品，佢吸引我買嘅原因除咗係減價之外，就係因為佢夠大！你哋唔好以為我用 close up 影佢影到咁大，而係事實上佢真係好大 o架，我屋企隻飯碗都唔係好放得落，好 "抆水" 咋！

        不過大還大，好食先至係最緊要，我就覺得始終唔及 A1啲 scone咁正，唔夠A1果啲咁鬆，比較偏向麵包質感，難怪 A1 果啲賣咁貴啦！

P.S.  La Rose Noire 呢個減價 $10兩個，原價好似係 $6個；但 A1果啲就細佢好多，大約 3/4隻手掌咁大度，賣 $5.5 一個，"吼" 到佢打烊前做特價就賣 $12 三個。