2008年11月10日星期一

橄欖油潤膚露

        朝早走咗去海趣坊間華潤堂買猴頭菇,俾錢時喺收銀處見到擺咗好多貨品喺度做 promotion,其中睇到呢支橄欖油潤膚露:


        間舖就寫住呢支嘢原本賣 $3X,依家特價 $13.9,你信唔信呀?依家啲商舖超市奸到死,mark 到個價鬼死咁高嚟減番落佢做特價,你估啲市民白癡咩!雖然十零蚊支潤膚露唔慌好得去邊,不過見佢十零蚊支,買嚟玩都抵啦,況且又未試過用橄欖油之類嘅潤膚露,即管買嚟試吓,睇吓佢有幾 "潤 "!


        老實講,我啲咁嘅超乾皮膚,都用過無數咁多種潤膚 / 護膚產品,有啲甚至係醫生寫紙去買,效果都差唔多,無乜太大幫助,我又唔捨得好似明仔咁買埋哂啲名牌貴貨,閑閑哋都幾百一千,貴都唔緊要,最怕就係咁貴買咗返嚟都係無乜用,咁就揼心!


        講番支潤膚露,原來佢唔只有橄欖油成份,仲有蘆薈 o添,聽落好似唔差,不過我都唔會抱太大期望。啲顏色好似凡士林潤膚乳,連啲香味都有幾分似,不過就無佢咁 "杰",比較稀啲。初初搽落手度都覺得幾潤,但係過咗一陣就同其他牌子嘅潤膚露一樣,好快趣就變乾,所以始終都係 Neutrogena 隻 hand cream叫做較為好啲,不過我啲皮膚咁乾,用乜都係咁上下,始終一入冬就爆拆,啲手指就裂開哂,都捱咗三十幾年啦!


1 則留言:

  1. hi!路過睇到你寫和媽媽的點滴,有共鳴,我也要差不多2年才ok啲。一齊努力活得開心啲,她們會知道的。
    p.s.你的皮膚超乾,是全身皮膚or只是手部?
    如果是全身,屈臣氏有隻Aqueous Cream BP,牌子是Adams(不是Watson's牌),$40.-500g可用2個月,沖完涼,個身重係濕ge時候,攞一pat搽勻全身,再用水係咁意淋一淋,用毛巾" 按 "(不是抹)乾全身就ok,個身會好似有一層膜咁,會潤全日。隻cream是皮膚科E生介紹的,無任何藥性(有都唔會咁平la ),以前我淨係識搽,後尾睇蘇施黃教這方法,你可先試吓,如果重係唔夠潤,這牌子重有另一隻cream(包裝1模1樣),好似豬油膏咁,個sales話係愛嚟沖涼,不過我就未試過。沖ge時候,小心跣親。
    [版主回覆03/01/2009 00:24:00]        我都用過 蘇施黃介紹果隻 cream 嚟沖涼,係我媽咪個 friend 睇完蘇施黃個節目之後,專登買俾我先,但係都係差唔多。
            大家都有著相同經歷,自然更清楚彼此感受,好多謝妳 嘅鼓勵,共勉之!

    回覆刪除