蝦米淡菜冬瓜粒湯

        無論煲湯抑或滾湯，都係我嘅弱項，無乜 idea，所以就即刻向喺電視台教煮餸嘅方太求救，當然唔係直接搵佢啦，只係喺佢寫嘅食譜度搵靈感啫。

        星期五果日喺荃灣公共圖書館度搵到本未有人借過嘅新書《方太與亞玲 — 輕鬆煲靚湯》(我係第一個借呀 )，發覺裡面介紹嘅湯水都幾啱我口味，而且有部份湯水都好簡單易煲，於是就借咗本書返屋企慢慢睇，今晚滾嘅湯就係喺呢本書度學返嚟。

材料：
冬瓜
蝦米 (食譜上係用金華火腿，但我手上無火腿，於是就參考另一個湯，用蝦米代替)
淡菜
薑
蔥

調味料：
鹽
雞粉

        蝦米洗淨後用熱水浸透 (蝦米水記得同樣可以用番嚟滾湯)；淡菜用水浸軟、洗淨備用；冬瓜去皮、去瓤洗淨，切粒。煲滾水，先加入蝦米、淡菜及薑滾出味，之後加埋冬瓜粒，當冬瓜煲腍後，加入小量鹽同雞粉調味，灑上蔥花就 OK 啦！

        方太原本喺佢篇自序度寫明：「我特別注重材料的原味，所以沒有加入任何現成清湯或味精，因為只有清水和材料共煮熬成的湯，才是真正好喝的湯。」但係因為我試過味道唔係好夠，於是就落咗少少雞粉去調味。

        啖湯都幾清甜，幾好飲呀！