與 blog 友交流煮食心得，分享生活點滴。
平時早餐多數會食麵包、蒸包、麥皮、或者煮個麵，但有時時間比較趕嘅時候，我就會食穀物早餐，貪佢夠快夠方便，倒出嚟、加盒鈣思寶就食得，非常方便。而喺咁多種穀物早餐中，我最鍾意就係呢隻桂格燕麥方脆。
咁多間超市一向都賣開 $24.9 - $26.9，但早前喺百佳俾我見到呢隻孖裝，只賣 $47.9，即平均只係 $23.9 咋，仲有隻量杯送 o添！
呢隻燕麥方脆真係好好食，好香脆，又唔會好似一般 cornflake 咁甜，健康好多，除咗加奶一齊食，仲可以就咁當零食嚟食，非常方便，包裝盒上都寫住可以即食 o架！
因為我不嬲都唔飲奶，加上以前又未有鈣思寶，所以都無食穀物早餐嘅習慣，但係媽咪唔知點解會無端端買呢隻嘢俾我食呢，唔通佢都係睇到包裝盒上寫住可以唔加奶即食，所以就買俾我當做健康零食？
星期一買咗棵西芹，用咗一半嚟煲素西湯，留起咗一半今日用嚟炒魚柳。
材料：
西芹
腰果
白魚柳
尖青椒
蒜片
雞蛋
粟粉
醃料：
鹽
糖
胡椒粉
即磨五色胡椒
調味料：
鹽
糖
蠔油
紹酒
麻油
西芹洗乾淨後切段備用；魚柳洗乾淨，用抹手紙索乾水份，之後加醃料醃好；腰果洗淨、用滾水煲幾分鐘，之後同樣用抹手紙索乾水份，然後炸至金黃色，而我就梗係用焗爐烘焗啦，唔駛落油嘛！青椒就洗乾淨，切去頭尾及內裡的核，之後切細段。
雞蛋拂打成蛋液，將醃好咗嘅魚柳先撲上粟粉，再蘸上蛋液，放平底鑊內，將兩面略為煎香，盛起備用。
跟住爆香青椒同蒜片，贊少少酒，炒兩炒後先盛起青椒，蒜片留鑊內。落西芹兜炒，加少少水，冚鑊蓋煮到稍為軟身後，就可以將煎香咗嘅魚柳回鑊，並加入調味料，兜炒均勻之後，熄火，最後加埋腰果落去兜兩兜，就即刻盛起。
記得熄咗火先落腰果，如果唔係啲腰果就會好快變腍，唔好食 o架喇！
材料：
佛手瓜
豬腱
南北杏
沙參
玉竹
麥冬
蜜棗
佛手瓜先去皮，略沖洗，開邊後切去核，然後切件備用；豬腱洗淨、汆水，用凍水沖洗多餘血水；南北杏、沙參、玉竹、麥冬同蜜棗都用熱水浸約 1個鐘後洗淨備用。煲滾水後，將所有材料一次過放入煲內，煲約 15分鐘後就可以放番落真穿空煲，飲之前再稍為煲一煲，加鹽調味就可以噹喇！
一個比較清淡滋潤嘅老火湯，最啱依家初春時候飲 o架喇！
每逢初一、十五，我都會更換佛壇上用嚟供佛嘅水果，咁啱噚日就係十五，所以要換過啲新喇。之前用嚟供佛嘅蘋果已經放咗喺度足足十五日，一定變得又腍又粉，唔慌好食啦！喺呢個時候，我通常都會用嚟煮餸，因為唔需要爽口嘛，但今日就例外，我為咗用焗爐嚟做 "實驗" ，所以用佢嚟整蛋糕，而 "實驗品" 就係肉桂焦糖蘋果蛋糕喇。
嘩，蛋糕面焗到金黃色，好靚啊！
食譜係嚟自呢本《曲奇蛋糕 Cook得起》。
材料：
牛油 105克
砂糖 110克
雞蛋 2隻
麵粉 100克
泡打粉 1茶匙
蘋果 2個
肉桂粉 適量
先將蘋果批皮、切粒；喺平底鑊內放入 20克牛油同 25克砂糖，將所有糖都煮溶後就加入蘋果，用慢火炒至蘋果完全吸收哂牛油同砂糖，並且變成金黃色，再灑上肉桂粉，拌勻備用。
將剩低嘅牛油於室溫下放至軟身後，將佢壓成忌廉狀，跟住加入剩低果 85克糖落去，用拂蛋器打到變成奶白色。雞蛋拂打成蛋液後，分兩次加入牛油糖內，攪拌均勻後，將麵粉、自發粉篩入並攪勻，最後加一半焦糖蘋果落去撈勻，然後就可以倒麵糊入蛋糕模內，喺麵糊面頭舖埋剩低果一半焦糖蘋果，跟住灑上肉桂粉，就可以放入焗爐，用180℃火焗大約 30分鐘就完成。
因為我個蛋糕焗盤比較大，所以啲麵糊撻喺底，焗出嚟嘅蛋糕都比較扁！
明仔果然無介紹錯喎，銀寶牛油真係無乜奶味，但焗出嚟嘅蛋糕又好香呀！蛋糕好鬆軟，加上我本身好鍾意肉桂，所以我覺得呢個蛋糕幾好食，而且個蛋糕底仲焗到有少少脆 o添！
Note:
1. 放蘋果落焦糖度煮時要小心，因為溫度好高，加上蘋果有水份，一遇到油就彈到飛起，我隻手都燙嚫呀！
2. 整蛋糕最好用低筋麵粉，如果無嘅話，可以好似我咁加啲粟粉落去，因為粟粉可以降低筋性。我睇過書話個比例大約
係 8 : 2，即 80克中筋麵粉就落 20克粟粉，夾埋總共100克粉。
3. 可能我唔係食得太甜啦，若果跟足食譜份量去做，我覺得甜過頭，真情好似食緊砂糖咁甜，所以糖嘅份量可以減少啲。
首先喺呢度同明仔講聲多謝，因為佢星期三晚喺 MSN 度話俾我聽屈臣氏啲 Lindt 朱古力減到好平，$8.8 減到 $5，所以我第二日就去睇吓，點知行過幾間都掃清哂，得番啲牛奶朱古力，後尾發現原來 Market Place by Jason 都係賣 $10 兩排，於是就買咗兩排啦，之後再喺第二間屈臣氏度買多 4 排其他味道。因為我知道 Market Place by Jason 其實即係 "高檔" 惠康，所以我就八卦走去惠康睇吓有無做特價，果然都係賣 $10 兩排，我留意咗好耐，發覺原來呢幾間大型連鎖店係會跟住其他舖做特價爭生意嘅！
