自製咖啡濃縮液 Extrait de Café

        喺圖書館度搵到本《基礎糕點大全》， 非常實用，裡面教授好多基本烘焙資料、工具、方法、以及食材運用，由最基本嘅篩粉、打發、擠花等講起，介紹各式麵糊、麵糰、餡料做法，以至朱古力、堅果等食材嘅應用，最後更介紹糖漬及果醬做法，非常詳盡，簡直就係一本烘焙工具書。

 

        書內介紹咗一樣自製材料，係其他書好少會講到，就係自製濃縮咖啡喇。我一睇到就即刻好有興趣喇，因為好多時整西點都會用到咖啡香精先會有明顯咖啡味，但大家都知道，呢啲化學嘢食得多無益，而且呢個咖啡濃縮液做法非常簡單，所以即管一試吧！

 

 

材料：

糖                100 克
水                150 毫升
即磨咖啡粉    50 克

- 先將小量糖放入煲內，用大火加熱至糖溶。

- 將糖醬煮到冒出大氣泡並變成焦糖色後就離火。

- 小心慢慢將水倒入糖醬內，邊倒邊攪拌。

- 放番上火加熱，之後將咖啡粉加入。

- 用大火煮至大滾後即刻熄火。

 

 

 

 

 

- 先用網目較大嘅篩將咖啡液過濾，之後再用細網目嘅篩過濾。

- 完全攤凍後即可入樽保存。

食譜出自辻點心專門學院嘅《基礎糕點大全》。

 

 

 

 

 

 

 

Notes：
- 原食譜標示用意式烘焙咖啡豆磨碎製作，我自己用即磨咖啡粉代替。

- 煮焦糖時要邊煮邊搖晃煲身，從而令到糖醬能夠均勻受熱。

 

- 將水加入焦糖漿時要非常小心，因為高溫會令水急劇濺出。