雲呢嗱糖

整西式甜品，好多時都會用到雲呢嗱籽，當籽被刮出之後，剩番低嘅雲呢嗱枝你會點處置呢？掉咗去！？咁未免太浪費吧！我諗好多朋友都會用嚟整雲呢嗱糖，我自己都唔例外。

 

雖然打開個糖盅時會聞到香濃嘅雲呢嗱味，但係其實用嚟整完嘢食之後，成品一啲雲呢嗱味都無，可能係因為經高溫加熱後會將味道破壞或者揮發。

所以之前整完焦糖豆漿布甸用剩嘅雲呢嗱枝，我選擇將佢放入咖啡糖內。

一杯咖啡嘅溫度高極有限，應該會無咁大剎傷力，希望下次
飲咖啡時會聞到淡淡嘅雲呢嗱味啦！

新買保溫袋

上星期趁「JUSCO」感謝日，又走去「Living Plaza」買嘢，目標係保溫袋。

行過幾間 $12 店，淨係得銅鑼灣店有呢款保溫袋，我特別鍾意佢
款式較為好之外，最重要係質料無咁 “兒戲”，心理上
覺得比其他款式較為穩陣耐用。

而且內櫳又夠大，放個 6 吋蛋糕都夠呀！

螞蟻上樹

上次整西汁雞球時，同毛豆傾開關於追尋味道，尋找回憶嘅嘢，我提到我自己另一個想追尋兒時味道嘅餸菜就係螞蟻上樹，呢個餸都真係無食
N 年咁耐啦！

 

點解咁記得呢個餸？因為媽咪第一次煮時講個餸名俾我聽，我覺得好恐怖，形住好似將啲蟻一揸一揸咁放入口，好核突！點知到食嘅時候就覺得好好食，可能係因為我好鍾意食粉絲啦！

 

不過媽咪無講過呢個餸點煮，因為當時我仲係好細個呀！今晚就憑自己嘅味覺記憶，加上基本烹飪技巧，再加上少少想象力及創造力去煮番出嚟啦！

 

 

 

材料：

免治豬肉

四季豆

粉絲

蒜蓉

薑蓉

蔥花

 

醃料：

鹽

糖

生抽

紹酒

粟粉

油

 

調味料：

鹽

糖

紹酒

清雞湯

辣醬

生抽

老抽

麻油

 

- 豬肉用醃料醃好；四季豆兩側粗纖維撕去，洗乾淨後切粗粒；粉絲用清水浸軟，備用。

- 燒熱油，先放肉碎落鑊兜炒，之後轉細火慢慢炒至有少少焦香，灒酒，兜炒均勻後盛起。

- 將四季豆放鑊內兜炒，之後加入蒜蓉同薑蓉繼續兜炒至香味出。

- 倒入適量清雞湯，然後冚上鑊蓋將豆煮至微腍，毋需煮至乾水。

- 肉碎回鑊，加入鹽、糖同辣醬拌勻，之後放入粉絲。

- 加入適量生抽及老抽，將所有材料兜炒均勻，煮至粉絲熟透及汁乾即可。

- 最後灑上麻油及蔥花，拌勻後就可以上碟。

印象中記得媽咪好似係有落到青豆去襯色，但係我由細到大都唔鍾意食青豆，
覺得佢嘅味道好似臭臭哋，所以我自己就改咗用四豆季。當然呢個
唔係最正宗嘅做法啦，但可以為菜式點綴之餘，
有肉又有菜蔬，令營養更均衡嘛！

 

Notes：

- 粉絲落鑊後記得不斷兜炒，以免黐底。

- 若果唔想太濃味的話，可用清水代替部份清雞湯。

頂角方包

因為遲啲會借個多士模俾 Winnie 玩，所以趁佢仲係我身邊時用多幾次。

 

其實都唔再諗住整方包㗎喇，因為次次都整唔到，試過已經發酵到有微微酸味及酒味，證明已經發酵過度，但係都一樣唔掂，所以已經完全放棄佢！點知，今日準備整普通山形麵包多士時
……

你睇，居然整到方包喎！

 

因為我平時整嚫多士麵包都多數發得唔太好，發成個幾兩個鐘都只係得多士模八成滿，所以我今日都將個模蓋冚到實，由佢自生自滅，到個零鐘後走去打開個蓋𥄫一𥄫個麵糰發成點，發現個麵糰黐實咗個蓋，打開睇清楚，原來都已經差唔多九成滿，心諗：好，反正都發到咁犀利，就再發多 15 分鐘，睇吓今次又頂唔頂到角先！之後再無睇佢喇，就咁就掟入爐焗，到焗好出爐後打開一睇，居然有驚喜喎，呵呵！所以真係無講錯，凡事都唔使強求，一切隨緣反而仲會遇到驚喜哦！

不過其實都唔係真係咁完美㗎，睇吓呢兩幅相就知道並唔係完全頂角。

 

今次又係整番我最鍾意嘅碎蛋多士，除咗碎蛋之外，
仲有粟米粒同牛油果㖭，加埋日式沙律醬同
wasabi 一齊撈勻，好味到呢 ………

 

睇番之前嘅製作，原來整咁多次多士，凡係跟《百變麵包
DIY》整嘅都比較靚、比較成功，好似芝麻麻糬多士同乾果多士咁，兩個都發得幾好。一直都以為係自己嘅焗爐或酵母有問題，但原來關鍵係個食譜本身！而且，我亦從中得出一個結論，原來用直接法嚟整多士麵包係最好，除咗正話講嗰兩個多士麵包外，上個禮拜整嗰個香蕉多士麵包同樣都係用直接法整，所以成品都係相對比較靚，唔怪得知絕大部份嘅麵包食譜都係教用直接法整多士啦！不過可惜用直接法整出嚟嘅麵包保質期超短，第二日食已經又乾又嚡，針真係無兩頭利㗎！

兒時味道 — 西汁雞球

Motonako A. 見到個兒時味道咁興奮，我今晚都一樣係追尋兒時味道呀！

記得以前讀中學時，初初係出街食嘅，但係因為我一向都唔太鍾意食街外嘢，而且食得多都厭啦！所以後來我就變咗帶飯返學食。

嗰陣時，媽咪堅持要提早起身煲飯，我話反正夜晚都煮多少少餸，點解唔煮埋多少少飯呢，咁咪唔使特登早起身洗米煲飯囉。但媽咪話食隔夜嘢無益喎，餸就話煮唔切啫，煲飯就好易，洗落米、撳飯煲就攪掂，唔嘥得幾多時間，話哂都係新鮮煮嘅飯好啲。

記得有次打開個飯盒，立即傳來陣陣香味，原來媽咪煮咗西汁雞球俾我做 lunch，但我好記得之前一晚係無食過呢味餸嘅，所以好肯定係媽咪特別再提早起身煮呢個餸俾我，當時真係既開心又感動，呢個畫面我一直念念不忘，即使事隔廿年有多嘅今日依然歷歷在目。媽咪，好掛住妳呀！

今晚就試試自己煮吧！

其實都無乜太大難度，最主要係調好個汁，有茄汁、喼汁同OK
醬，之後再加鹽、糖調味就攪掂。








媽咪以前係將個汁煮到乾，每件雞球都做到 "掛汁"，我今晚就專登
煮多少少汁，仲加埋洋蔥同番茄一齊煮，用嚟伴意粉食。

Louisa 送嘅 muesli

早前 Louisa 送咗盒 muesli 俾我。

佢話最啱就係用嚟整
granola bar，趁開爐焗麵包，順手放埋入去一齊焗！

我自己再額外加入肉桂粉、橙皮茸同朱古力粒，味道香到呢 ……

用佢嚟整granola bar 真係好方便，唔使左量右量，唔使預先焗果仁，一盒攪掂哂！

 

有興趣整 granola bar 的話，可以參考以下食譜：

- 黑豆燕麥方塊

- 杏仁乾果燕麥方塊

- 香蕉乾果仁燕麥條

香蕉多士麵包 Banana Toast

前幾日搵食譜整麵包，無意間見到個香蕉麵包食譜，好有興趣試試，因為用香蕉整甜品、蛋糕、餅乾都試過，就係未試過整麵包，但最重要嘅係，屋企啱啱好有幾隻梅花點香蕉呢！

 

 

材料：

高筋麵粉  
250 克

香蕉   75 克

新鮮酵母   7.5克

糖     35 克

鹽     3
克

蛋液   25 克

水     約 60 毫升

橄欖油    
10 克

 

- 將麵粉、酵母、香蕉、蛋液、鹽同糖倒入食處理器內混合，逐少加水搓至起筋。

- 之後加油，開機繼續搓成麵糰。

- 將麵糰拎出，放上已灑粉嘅枱面，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 60分鐘。

- 麵糰排氣後平均分割成 2 份，分別滾圓，靜置鬆弛 25 分鐘。

- 將麵糰壓平，用擀麵棍將麵糰擀薄，然後捲成長條形，捏緊收口，之後再輕輕將麵糰搓長。

- 將兩條長形麵糰交叉扭纏，做成辮狀，捏緊兩端收口。

- 麵糰放入多士模內發酵至八分滿，之後喺表面搽上蛋液。

- 放入已預熱至 190 ℃
嘅焗爐內，焗約 40 分鐘即可。

- 出爐後立即移至架上攤凍。

 

食譜參考自王傳仁嘅《天然、無添加的手作麵包》。

 

第一次整呢個做形，真係又靚又好玩！

掂呀！聞到淡淡嘅香蕉香味，食落就有濃濃嘅香蕉甜味！

 

Notes：

- 原食譜材料及用量：

  奶粉 7.5 克

  鮮奶 25 毫升

  冰水 37.5毫升

  牛油 25 克

- 由於麵糰比較黏手，所以喺搓揉時要適量地加入手粉。

- 作者喺食譜中提到一個觀點，都幾有趣，想同大家分享一下。

  作者話呢個麵糰唔適合用嚟做方包多士或小餐包，因為整方包多士時會將多士模蓋上，焗出
  嚟嘅麵包只會同一般多士麵包一樣，只有小麥味，無乜香蕉味，要等到1日之後至會散發出
  香蕉味；若做成小餐包的話，由於麵糰體積較細，麵包表面烤至上色焦化嘅面積相對變大，
  因為呢個原因，表面嘅焦香味就會完全蓋過香蕉味，所以做成不帶蓋嘅多士就最適合不過。

咖喱魚蛋豬皮蘿蔔

前兩日突然間好想食咖喱豬皮蘿蔔，咁今晚就滿足一下自己嘅慾望啦！

一路煮，一路聞到咖喱香，真係引死人呀！

有興趣整的話就睇睇《咖喱豬皮魚蛋》啦！

果仁雜豆豐水梨湯

早兩個禮拜買咗個超巨型嘅豐水梨，用咗兩個嚟供佛，供完佛之後嘅水果我多數都唔會就咁食，因為擺足十五日後仲點會好食至得㗎！所以我就用咗佢嚟煲湯，再加埋其他果仁同雜豆，啱哂依家咁乾嘅天氣飲呀！

 

材料：

紅腰豆

三角豆

栗子

合桃

腰果

紅蘿蔔

豐水梨

冬菇蒂

 

- 豆類洗淨後用清水浸過夜，倒去水之後再過一次水。

- 栗子放入焗爐內用180
℃ 焗 15 –
20 分鐘至爆殼，趁熱去殼去衣，然後略沖洗。

- 果仁洗淨，用抹手紙索乾水份，之後放入焗爐內，用140
℃ 焗約 15 分鐘至香味出。

- 紅蘿蔔刨皮後切件；豐水梨去皮去芯，切開四份；冬菇蒂洗淨後用清水浸至軟身。

- 所有材料凍水落煲，煲滾之後轉慢火煲至材料完全出味即可。

嘩，啲湯甜到呢，連老竇都話非常之清甜。
想湯水夠甜，記住一定要凍水落料呀！

比較細食嘅女仕，淨係飲湯兼食湯渣已經係一頓豐富又有益嘅晚餐喇！

泡菜薄罉

今日雖然 day-off，但我都校咗鬧鐘十點起身，諗住可以做吓嘢，唔好浪費時間。

 

鬧鐘響咗，撳熄，繼續瞓；瞓到十一點零鐘醒咗，同自己講，再瞓多陣㖭啦，反正又唔使教琴；到十二點零鐘再醒，都仲係唔願起身；卒之瞓到點零鐘又醒，唔起身都唔得喇，已經嘥咗成三個鐘喇！但查實都仲係唔多願起身囉！！

 

起身梳洗過後，做完早課 (其實已經係晏課)，攪掂埋其他嘢已經兩點零鐘，”嗱嗱林” 落街買餸，返到屋企都差唔多三點鐘喇，咁就已經無咗半日喇，唉！！

 

原本諗住今日得閒，可以整辣椒油同糖漬橙皮嘅，依家個人都仲係好攰，又無乜時間同 mood，都係唔整喇，快手整個
brunch 食罷啦！

 

材料：

泡菜
適量

韭菜 適量

蔥    適量

高筋麵粉 100 克

低筋麵粉 100 克

糯米粉   50 克

鹽    3
克

糖   
10 克

水   
約 170 毫升 (連適量泡菜醃汁在內)

韓國辣醬 1 湯匙

 

- 泡菜切細；韭菜同蔥洗淨後切細段，備用。

- 所有粉類、鹽同糖用打蛋器攪拌混合，之後逐少加入泡菜醃汁及水開成麵糊。

- 加入辣椒醬，繼續用打蛋器攪拌至辣醬完全溶於麵糊內。

- 將泡菜、韭菜同蔥加入麵糊內，攪拌均勻。

- 燒熱油，將適量麵糊放入平底鑊內，用中慢火煎熟。

- 當麵糊邊緣煎至乾身及離鑊時就可以翻面。

- 繼續煎至完全離鑊即可，切件上碟。

當麵糊煎到咁樣，邊緣離哂鑊就可以翻轉煎另一面喇！

味道調得啱啱好，唔會太辣，食到泡菜同韭菜嘅爽口，仲有淡淡嘅
韓國辣醬風味㖭！不過我就覺得質地略為黏口，
下次要減少糯米粉至得。

Notes：

- 如果有中筋麵粉的話，可直接取代高、低筋麵粉使用。

- 鹽、糖、辣椒醬嘅用量可依個人口味調整。

- 依呢個粉類比例做出嚟嘅薄罉，質地會略為軟糯黏口，如果唔鍾意的話，可減少糯米粉用
  量，以麵粉代替即可。

- 製作泡菜方法，可參考《自家醃製韓式泡菜》。

焦糖豆漿布甸 Caramel Soymilk Pudding

        早前 Winnie 問有冇焦糖布甸食譜，令我諗番起原來想整好耐但又無咗件事，真係要多謝佢提一提，我先至會醒起呢個簡單易做但又好好味嘅甜品。
 

檸檬玉米蛋糕 Lemon Polenta Cake

       記得好耐之前曾經喺 Youtube 度睇過 Nigella 教整 lemon polenta cake，一直都好想試，不過之前因為有其他嘢要先整，所以一直都未動手整。後尾到我買埋個檸檬準備開工時，發覺條片無咗，揭極都搵唔番，唯有將個蛋糕擱置，打入 To Do List 內繼續慢慢等。

        直到近排突然間諗到 Nigella 會唔會有個官方網頁，點知上網一 search，真係有喎！跟手就即刻 search 埋有冇 lemon polenta cake 個 recipe，又有喎！！哈，咁啱個雪櫃又有個擺咗 N 世咁耐嘅檸檬，可以即刻開工整喇喂！

 

 

提子香蕉朱古力蛋糕

最近 blog 友緊張大師-小女人喺我個 blog 度搵到個香蕉朱古力蛋糕食譜，佢話個蛋糕超好食，一星期內已經整咗幾次，仲有送俾好友分享。不約而同，Ernest 媽咪咁啱喺言談間又提到呢個蛋糕，我自不然諗到自己都好耐無整過，就趁今晚比較得閒，整番個嚟做飯後甜品先。

用咗疏乎厘盅嚟代替蛋糕模，做出嚟個效果有啲似朱古力布甸。

 

今次只係做咗食譜嘅一半份量，啱啱好
做到兩個疏乎厘盅大細嘅蛋糕。

睇見蛋糕表面比較乾身 ………

………但裡面就比較濕潤，且香蕉味同朱古力味都非常香濃，
今次仲用咗提子乾代替香蕉粒㖭！

想要食譜的話，睇番《肉桂香蕉朱古力蛋糕》個食譜啦！