因為遲啲會借個多士模俾 Winnie 玩，所以趁佢仲係我身邊時用多幾次。
其實都唔再諗住整方包㗎喇，因為次次都整唔到，試過已經發酵到有微微酸味及酒味，證明已經發酵過度，但係都一樣唔掂，所以已經完全放棄佢！點知，今日準備整普通山形麵包多士時
……
你睇，居然整到方包喎！
因為我平時整嚫多士麵包都多數發得唔太好，發成個幾兩個鐘都只係得多士模八成滿，所以我今日都將個模蓋冚到實，由佢自生自滅，到個零鐘後走去打開個蓋𥄫一𥄫個麵糰發成點，發現個麵糰黐實咗個蓋，打開睇清楚，原來都已經差唔多九成滿，心諗：好，反正都發到咁犀利，就再發多 15 分鐘，睇吓今次又頂唔頂到角先！之後再無睇佢喇，就咁就掟入爐焗，到焗好出爐後打開一睇，居然有驚喜喎，呵呵！所以真係無講錯，凡事都唔使強求，一切隨緣反而仲會遇到驚喜哦！
不過其實都唔係真係咁完美㗎，睇吓呢兩幅相就知道並唔係完全頂角。
今次又係整番我最鍾意嘅碎蛋多士，除咗碎蛋之外，
仲有粟米粒同牛油果㖭，加埋日式沙律醬同
wasabi 一齊撈勻，好味到呢 ………
睇番之前嘅製作，原來整咁多次多士，凡係跟《百變麵包
DIY》整嘅都比較靚、比較成功，好似芝麻麻糬多士同乾果多士咁，兩個都發得幾好。一直都以為係自己嘅焗爐或酵母有問題，但原來關鍵係個食譜本身！而且，我亦從中得出一個結論，原來用直接法嚟整多士麵包係最好，除咗正話講嗰兩個多士麵包外，上個禮拜整嗰個香蕉多士麵包同樣都係用直接法整，所以成品都係相對比較靚，唔怪得知絕大部份嘅麵包食譜都係教用直接法整多士啦！不過可惜用直接法整出嚟嘅麵包保質期超短，第二日食已經又乾又嚡，針真係無兩頭利㗎！
你住我隔離,你可以有飯吃我就有包食.....大家都幸福.
回覆刪除我剛同朋友講起白神山鮮酵母,你有用來整麵包的,對嗎?
[緊張大師-小女人回覆10/29/2012 17:50:18]哦,明白了.
[版主回覆10/28/2012 02:10:50]我無用新鮮酵母，只係上兩次個 friend 俾咗少少我試整咋！不過我唔太鍾意新鮮酵母嘅酸宿味道。
鬆軟無比⋯仲要起晒角
回覆刪除[版主回覆10/28/2012 02:07:08]都係撞手神咋！
下次整十七小時的保質期耐D架 ! 你一日食唔晒就拎過黎俾我嘛 !
回覆刪除[版主回覆10/28/2012 02:08:39]我無 KM / KA，所以整唔到 17 小時中種呢！
好啦，下次有下欄包包就俾妳啦！
不強求幾時都係我認同兼做緊既....從來都深信,係你既遲早都會得到, 唔係你既,就算暫時得到都好快會失去 !凡事都隨遇而安啦, 無謂難為自己
回覆刪除如果呢個整湯種, 更加正呀
[版主回覆10/28/2012 02:12:37]係呀，我依家都無咁多追求，嚟到咪接受囉！
我其實前幾次整多士都係用湯種，不過就發得唔好囉！
好靚哦!
回覆刪除一日點食得晒呀!!!!!!!! 等我們這一家幫吓你喇!
[版主回覆10/29/2012 03:11:49]乜咁抵得諗呀！
用直接法整包包, 只要水份多, 食到第3天也很好吃架,
回覆刪除我依家做牛奶吐司個食譜, 水 + 蛋 差不多是100% ~~