2012年10月26日星期五

頂角方包



因為遲啲會借個多士模俾 Winnie 玩,所以趁佢仲係我身邊時用多幾次。


 



其實都唔再諗住整方包
㗎喇,因為次次都整唔到,試過已經發酵到有微微酸味及酒味,證明已經發酵過度,但係都一樣唔掂,所以已經完全放棄佢!點知,今日準備整普通山形麵包多士時
……






你睇,居然整到方包喎!



 

因為我平時整嚫多士麵包都多數發得唔太好,發成個幾兩個鐘都只係得多士模八成滿,所以我今日都將個模蓋到實,由佢自生自滅,到個零鐘後走去打開個蓋𥄫𥄫個麵糰發成點,發現個麵糰黐實咗個蓋,打開睇清楚,原來都已經差唔多九成滿,心諗:好,反正都發到咁犀利,就再發多 15 分鐘,睇吓今次又頂唔頂到角先!之後再無睇佢喇,就咁就掟入爐焗,到焗好出爐後打開一睇,居然有驚喜喎,呵呵!所以真係無講錯,凡事都唔使強求,一切隨緣反而仲會遇到驚喜哦!



不過其實都唔係真係咁完美
㗎,睇吓呢兩幅相就知道並唔係完全頂角。



 



今次又係整番我最鍾意
嘅碎蛋多士,除咗碎蛋之外,
仲有粟米粒同牛油果
㖭,加埋日式沙律醬同
wasabi 一齊撈勻,好味到呢 ………

 




睇番之前
嘅製作,原來整咁多次多士,凡係跟百變麵包
DIY
》整嘅都比較靚、比較成功,好似芝麻麻糬多士乾果多士,兩個都發得幾好。一直都以為係自己嘅焗爐或酵母有問題,但原來關鍵係個食譜本身!而且,我亦從中得出一個結論,原來用直接法整多士麵包係最好,除咗正話講嗰兩個多士麵包外,上個禮拜整嗰個香蕉多士麵包同樣都係用直接法整,所以成品都係相對比較靚,唔怪得知絕大部份嘅麵包食譜都係教用直接法整多士啦!不過可惜用直接法整出嘅麵包保質期超短,第二日食已經又乾又嚡,針真係無兩頭利


6 則留言:

  1. 緊張大師-小女人2012年10月27日 上午9:36

    你住我隔離,你可以有飯吃我就有包食.....大家都幸福.
    我剛同朋友講起白神山鮮酵母,你有用來整麵包的,對嗎?
    [緊張大師-小女人回覆10/29/2012 17:50:18]哦,明白了.
    [版主回覆10/28/2012 02:10:50]我無用新鮮酵母,只係上兩次個 friend 俾咗少少我試整咋!不過我唔太鍾意新鮮酵母嘅酸宿味道。

    回覆刪除
  2. 鬆軟無比⋯仲要起晒角
    [版主回覆10/28/2012 02:07:08]都係撞手神咋!

    回覆刪除
  3. 下次整十七小時的保質期耐D架 ! 你一日食唔晒就拎過黎俾我嘛 !
    [版主回覆10/28/2012 02:08:39]我無 KM / KA,所以整唔到 17 小時中種呢!
    好啦,下次有下欄包包就俾妳啦!

    回覆刪除
  4. 不強求幾時都係我認同兼做緊既....從來都深信,係你既遲早都會得到, 唔係你既,就算暫時得到都好快會失去 !凡事都隨遇而安啦, 無謂難為自己
    如果呢個整湯種, 更加正呀
    [版主回覆10/28/2012 02:12:37]係呀,我依家都無咁多追求,嚟到咪接受囉!
    我其實前幾次整多士都係用湯種,不過就發得唔好囉!

    回覆刪除
  5. 好靚哦!
    一日點食得晒呀!!!!!!!! 等我們這一家幫吓你喇!
    [版主回覆10/29/2012 03:11:49]乜咁抵得諗呀!

    回覆刪除
  6. 用直接法整包包, 只要水份多, 食到第3天也很好吃架,
    我依家做牛奶吐司個食譜, 水 + 蛋 差不多是100% ~~

    回覆刪除