焦糖豆漿布甸 Caramel Soymilk Pudding

        早前 Winnie 問有冇焦糖布甸食譜，令我諗番起原來想整好耐但又無咗件事，真係要多謝佢提一提，我先至會醒起呢個簡單易做但又好好味嘅甜品。
 

 

焦糖漿

材料：
糖          80 克

水          2 茶匙
熱水      2 湯匙

- 將糖同水倒入煲內加熱，邊煮邊搖晃煲身直至糖溶。

- 繼續加熱，直至煮到自己想要嘅焦糖色。

- 熄火後倒入熱水，搖晃煲身令焦糖與水能均勻混合。

- 趁熱將焦糖漿倒人容器內。

- 放入雪櫃雪至焦糖凝固，待用。

 

豆漿布甸

 

材料：
豆漿              400 毫升
糖                  60克
雲呢嗱枝      1/2 枝
雞蛋              3 隻

蛋黃              1 個

- 將豆漿同糖倒人煲內加熱；切開雲呢嗱枝，刮出雲呢嗱籽。

- 將雲呢嗱籽加入豆漿內一齊煲，當糖煮到完全溶解後就可以立即熄火。

- 雞蛋同蛋黃拂打成蛋液，之後將豆漿逐少倒入，邊倒邊攪拌均勻成布甸液。

- 將布甸液過篩至容器內，然後放上烤盤上。

- 烤盤內倒入熱水，放入已預熱至 150 ℃ 嘅焗爐內，焗約 40 分鐘至熟透凝固。

- 出爐攤凍後放入雪櫃雪至稍為硬身。

- 用竹簽喺布甸與容器之間繞一圈，然後倒扣到碟上享用。

以上材料份量可做布甸 4 – 5 杯。

 
 

用豆漿整果然比起用 cream 整清爽好多，但係我覺得成個布甸嘅
靈魂係個焦糖漿，無咗佢肯定遜色不少，好鍾意焦糖嗰種
香濃味道，而且唔會好甜，甜中帶少少苦味。

Notes：
- 製作焦糖漿時要特別小心，因為焦糖漿極之高溫，將熱水倒入時會猛烈四濺。

- 煮豆漿時不可煮得太熱，約 60 ℃ 即可，否則倒入蛋液時會將蛋液煮熟凝固。

- 若烤盤內嘅熱水已完全蒸發但布甸又未焗熟的話，記得注入熱水繼續蒸焗。