兒時味道 — 西汁雞球

Motonako A. 見到個兒時味道咁興奮，我今晚都一樣係追尋兒時味道呀！

記得以前讀中學時，初初係出街食嘅，但係因為我一向都唔太鍾意食街外嘢，而且食得多都厭啦！所以後來我就變咗帶飯返學食。

嗰陣時，媽咪堅持要提早起身煲飯，我話反正夜晚都煮多少少餸，點解唔煮埋多少少飯呢，咁咪唔使特登早起身洗米煲飯囉。但媽咪話食隔夜嘢無益喎，餸就話煮唔切啫，煲飯就好易，洗落米、撳飯煲就攪掂，唔嘥得幾多時間，話哂都係新鮮煮嘅飯好啲。

記得有次打開個飯盒，立即傳來陣陣香味，原來媽咪煮咗西汁雞球俾我做 lunch，但我好記得之前一晚係無食過呢味餸嘅，所以好肯定係媽咪特別再提早起身煮呢個餸俾我，當時真係既開心又感動，呢個畫面我一直念念不忘，即使事隔廿年有多嘅今日依然歷歷在目。媽咪，好掛住妳呀！

今晚就試試自己煮吧！

其實都無乜太大難度，最主要係調好個汁，有茄汁、喼汁同OK
醬，之後再加鹽、糖調味就攪掂。








媽咪以前係將個汁煮到乾，每件雞球都做到 "掛汁"，我今晚就專登
煮多少少汁，仲加埋洋蔥同番茄一齊煮，用嚟伴意粉食。