2013年7月2日星期二

超值沙律菜

之前喺電視度睇到肥媽介紹中環咸街街市有檔專賣外國沙律菜嘅菜檔,價錢合理相宜,當時我已經好想即刻飛去睇睇,之後上網又成日見到啲人話去買沙律菜好抵,比起超市平好多,我越睇就越心思思想去,可惜自己住得遠,打埋東費都差唔多!


 


今日七‧一紅假,晨咁早七點鐘起身過銅鑼灣同跑馬地教琴,所以教完哂都仲係好早,卒之都有機會去嘉咸街 朝聖喇!其實大部份人都係介紹「華記菜檔」,但我去到沿住嘉咸街一路向上行,其實都有好多檔買沙律菜,反而就見唔到「華記」,可能係因為依家「市建局」進行重建工程,地盤位正正就係之前「華記」,所以搵唔到,但我見到地盤對面有檔買嘅種類相對其他菜檔比較多,而且又見到網友相片中英文嘅價錢牌,我估應該係搬咗過去對面啩,就入去呢間買吧





嘩嘩嘩,真係好平,平過超市好多,如果無老人癡呆的話,羅馬生菜
$ 16 ,而沙律菜就賣 $ 26 ,我呢度買咗一大棵羅馬生菜
3 棵沙律菜,你呢籃菜要幾錢?全部夾埋都係
$24 咋,係咪勁吸引呢?棵生菜仲大到
要分兩餐食呀!








我自己就整咗個 Italian dressing 嚟撈沙律,啲菜真係好正,又新鮮、又清甜呀!







今晚晚餐有雜菜沙律、香草煙三文魚伴牛油果、忌廉海鮮蘑菇湯加黑麥包,
甜品係麵包布甸,美中不足
嘅係無親自煮湯,開罐罐頭湯算數,
因為個人好
攰,唔想再攪咁多喇!雖然好求其又一餐,
但食得開心又滿足哦!


6 則留言:

  1. 嘩!!!
    真係超抵wo....平日買開好貴架...
    因為我日日都係sald做lunch....!!!! 所以有時都唔捨得...只係買西生菜咋....!!
    你可以比exact個地址我嘛...??? thx^^
    [版主回覆07/07/2013 19:37:59]食哂 lu!整三文治嗰日仲好爽甜呀!
    [梁少奶 ^v^回覆07/05/2013 20:05:47]kaka...今日食晒未呀~~
    我打算聽日去買~~
    [版主回覆07/03/2013 19:02:09]3 日喇!
    [梁少奶 ^v^回覆07/03/2013 18:22:28]HEHE...好呀...些些你~~
    你宜家D羅馬生菜放左幾多日呀~~
    [版主回覆07/02/2013 15:14:03]咁我又唔知喎!不過我平時買餸都會買定放雪櫃,只要將菜攤開略吹至乾身,之後用紙袋或報紙包好再放入膠袋,可以放到好幾日㗎!妳咪先買少少做一次實驗,睇吓最耐可以放到幾多日,之後先再大手入貨囉!我依家呢棵羅馬生菜都只係食咗一半,另一半包好放雪櫃。
    [梁少奶 ^v^回覆07/02/2013 15:08:40]收到!!!
    我係到諗....如果我星期日去..一次過買晒星期一至四既沙律菜...會唔會變壞架好易~~~
    [版主回覆07/02/2013 15:03:54]係呀,真係超抵,以後多啲機會食喇!
    地址咪就係皇后大道中直上嗰條嘉咸街囉!成條街都有好幾檔買沙律菜㗎!

    回覆刪除
  2. 唔係求其, 係好靚 !
    [版主回覆07/03/2013 19:03:28]仲唔求其呀?樣樣都唔使煮,布甸都只係放入爐焗,唔使理佢!

    回覆刪除
  3. 嘩⋯個餐又靚又正!
    [版主回覆07/04/2013 12:37:20]係呀,我自己都食得好開心呀!

    回覆刪除
  4. 緊張大師-小女人2013年7月4日 下午5:36

    街市又平又靚又抵,但好似你講係中環咁鬼遠,特意過來車資好貴,但行開不妨買多少少都無妨.你呢餐好合我心水呢.完全好似在大酒店的食法,無得彈
    [版主回覆07/07/2013 19:36:56]好彩我個個禮拜都過港島教琴,所以都算叫做順路,總好過專程走過去買啦!
    搵次約妳喺港島區見面,之後可以一齊過去買呀!

    回覆刪除
  5. 我都成日係果到買沙律菜, 真係好抵又新鮮~
    加埋牛油果食, 都好味架 :)
    [版主回覆07/07/2013 19:35:09]我本來都諗住加埋牛油果落去,不過覺得都係夾三文魚好食啲!

    回覆刪除
  6. 嗰檔嘢真係好吸引 又多外國食材賣
    [版主回覆07/07/2013 19:34:06]係?我又唔多覺,可能其實我去嗰間唔係「華記」啦!

    回覆刪除