2014年10月8日星期三

焗爐版 Fish & Chips

        炸魚薯條呢樣嘢真係無諗過自己整,因為我由細到大都唔係太好煎炸食物,但最主要原因都係要開鑊油炸,係我至憎做嘅動作!好耐之前已經知道咗薯條可以用焗爐做成免炸少油版,而最近又喺 Masa 個網站度見到連可樂餅都可以用焗爐做到,真係超吸引,一定要試試!
 
        傳統 Fish & chips嘅炸魚應該係用脆漿包住魚柳嚟炸,但係要入爐焗的話就無可能用脆漿喇,所以唯有用吉列做法啦!
 
 

薯條

材料:
薯仔

- 薯仔去皮後切條,放入大兜內,加適量油拌勻至每條薯條都沾上油。

- 將薯條倒入已墊牛油紙嘅烤盤上,放入已預熱至 240 嘅焗爐內焗 30 - 40 分鐘

- 中途記得將薯條翻 2 – 3 次,使薯條能均勻受熱焗至香脆。

 
吉列魚柳

材料:
急凍魚柳
日式麵包糠
麵粉
雞蛋

醃料:

黑椒

- 魚柳解凍後洗乾淨,瀝乾水份之後再用抹手紙徹底索乾水份。

- 雞蛋拂打成蛋液;麵包糠加適量油拌勻。

- 魚柳用醃料醃好後,先撲上薄薄一層麵粉,蘸上蛋液後再均勻沾上麵包糠。

- 將魚柳放上已墊牛油紙嘅烤盤上,放入已預熱至 240 嘅焗爐內焗約 15 分鐘至表面
  金黃
 
- 翻轉魚柳,再焗多 10 - 15 分鐘即成。


薯條可能因為落唔夠油去撈,唔係好夠脆身,但個魚柳
就超正,外面非常脆口,裡面就仲好 juicy 㗎!






呢日個焗爐真係用到佢盡,開足幾粒鐘,之前已經焗咗一轉
全麥 foccacia 喇,再整個簡單沙律,咁又一餐喇!





Notes
- 由於魚柳唔係用油炸嘅關係,所以必須將水份完全索乾,否則好難焗脆。

- 他他醬做法,請參閱《他他醬》。



10 則留言:

  1. 咁正,我又第一,應該有份食喎!

    回覆刪除
    回覆
    1. 小月妳咁醒,霸到頭位,就獎妳食啦!

      刪除
  2. 回覆
    1. 其實除咗菲傭姐姐外,我諗都無乜邊個會鍾意開油鑊炸嘢!

      刪除
  3. 其實我中意食煎炸嘢架,不過唔敢成日食,係屋企通常以焗代炸,所以通常出街先食炸嘢~~
    最尾個張相個餐好吸引喎:)

    回覆刪除
    回覆
    1. 我就反而同人相反,唔多鍾意食煎炸嘢,間唔中一次咁啦!人家成日話好食嘅嘢多數無益,但我發覺自己好多時都鍾意食啲人哋認為唔好食嘅嘢,咁係咪即係我食得相對健康呢?哈哈!!

      咁求其又一餐都話吸引!?

      刪除
  4. 焗好呀,好怕係屋企炸嘢。

    回覆刪除
    回覆
    1. 我都係咁話,炸完之後鑊油都唔知點處理好,倒又唔係,唔倒又唔係,好似好浪費,又要洗!!

      刪除
  5. 原來魚柳要焗時間同其他肉差不多喎. ^^

    回覆刪除
    回覆
    1. 其實我都唔知係咪用呢個時間,只係參考平時焗肉個時間咋,不過焗完之後又唔會太老喎!

      刪除