2014年11月10日星期一

老將終於要退役喇!

        真係越窮就越見鬼!
 
        呢季開始電費同差響都無咗政府補貼,要自己交番,一下子又多成千蚊支出;上個月好友結婚,買禮物又用過千;呢個禮拜部洗衣機漏水情況越見嚴重,睇住呢頭入水,嗰頭就流番出嚟,水位根本都未達指定標準,都唔緊要,最弊係我要不斷拖地索水!!一個人一個禮拜先開一次機洗衫,仲要係低水位都俾多咗佢,咁你話我有得幾多件衫要晾呀!?所以呢幾個月基本上用嚟拖地索水嘅時間仲多過晾衫嘅時間,前幾日情況仲突然加劇,想唔換機都唔得啦,咁又唔見 $3000 喇!!
 
 
其實部機功能係完全無事㗎,一直都運作正常,
只係純粹漏水!不過呢位老將都服侍咗屋企
超過廿年喇,都係時候要光榮退役囉!
 





呢部「樂聲‧愛妻號」真係古董㗎,淨係睇個
英文名仲係叫做「National」就知啦!
 




當年嘅「樂聲」都仲係正日本製造,效能真係好好多,
用到今時今日都仲機件運作正常,如果唔係
漏水的話,我估都仲有排玩呀!
 




       今次唔用 日軍喇,反正其實都係強國製造,而且價錢又差唔多,又試吓僱用 韓兵。老實講,唔係身邊有人用過好,我絕對唔敢試「LG㗎,就算係用韓國貨都買「Samsung」啦!不過見好多人都用佢,Winnie 又話佢洗完衫後啲衫無咁纏埋一堆,加上相熟電器舖老闆都建議我用「LG」多過「Panasonic」,咁就即管一試啦!

10 則留言:

  1. 越耐以前出o個d品質真係比較好,用左廿年先退役﹗而家o個d 用到幾年都偷笑囉...

    回覆刪除
    回覆
    1. 無錯,依家啲電器通常都只係得幾年貨仔,到叫師傅上嚟整時又話已經舊款,無零件配!

      刪除
  2. 我都覺得以前出品的電器襟用啲

    回覆刪除
    回覆
    1. 係囉,所以其實我都真係唔捨得掉㗎!

      刪除
  3. 回覆
    1. 我家不嬲用任何嘢都 keep 得好好,就算我依家著嘅衫大部份都超過十年,但真係睇唔出㗎!

      刪除
  4. 用咗廿年?真係好襟~~小財唔出,大財唔入,你可能好快搵番雙倍XD

    回覆刪除
    回覆
    1. 所以以前真係 made in Japan 嘅嘢真係好好多!

      希望承妳貴言哦!

      刪除
  5. 舊ge唔去新ge唔黎。。。。哈哈
    服務你廿年,你有賺添,嘻嘻!

    回覆刪除
    回覆
    1. 咁又唔可以話有賺嘅,因為要換洗衣機嘅關係,呢排都有上網搵資料,都見到好多網友話到依家都仲用緊「愛妻號」㗎,證明佢真係好襟用。

      刪除