雜菜薯蓉批 Veggie Shepherd Pie

        我成日都對 shepherd pie 呢個名好感興趣，點解會咁叫嘅呢？喺我心目中，pie 係指用個 crust 做批底，將鹹或甜嘅材料放入，之後再入爐焗，好明顯呢個 shepherd pie 個外觀唔係咁啦！另外，點解會用 shepherd 呢個字呢？唔通呢個批真係由牧羊人創出嚟？

 

        近排上網睇地獄廚神 Gordon Ramsay 嘅《Ultimate Home Cooking》，今次唔係要教煮高級精緻菜式，而係教煮一啲比較簡單嘅家庭菜，包括早、午、晚三餐，每集節目最正就係煮晚餐時，要佢四個仔女分別入廚幫手，”迫” 佢哋學識一啲基本技考，就算最細嗰個都要學揸刀切嘢，咁就唔使怕佢哋連水幾時滾都唔識啦！

 

         剛好其中一集教整shepherd pie，原來正宗係用羊肉嚟整，咁就所以用咗 “牧羊人” 去命名。連牛都怕食嘅我當然就唔會用羊肉煮啦，今次試整連肉都唔用，整個素菜批吧！

 

材料：
薯仔
洋蔥
西芹
南瓜
蘑菇
紅蘿蔔
紅、黃燈籠椒
迷秩香

調味料：
白酒
上湯
茄膏
喼汁
黑椒
鹽

- 薯仔去皮、切片，蒸熟後趁熱壓爛成薯蓉，備用。

- 洋蔥去衣；西芹洗淨後略撕去粗纖維；南瓜去皮、去瓤。

- 蘑菇快手略沖洗後去蒂；紅蘿蔔刨皮、切頭尾；燈籠椒洗乾淨，去蒂、去瓤。

- 將所有材料切粒。

- 燒熱油，先將洋蔥、西芹同蘑菇落鑊爆炒，直至洋蔥稍微焦黃色。

- 加入紅蘿蔔粒及南瓜粒兜炒，灒酒略炒幾下後加適量上湯、茄膏及喼汁。

- 當湯煮滾後就加蓋，並轉用中慢火煮至紅蘿蔔腍身。

- 之後將燈籠椒同切碎迷秩香落鑊，煮至汁略為收乾即可。

- 加鹽同黑椒調味後勺入容器內，然後喺材料面鋪上一層薯蓉。

 

- 放入已預熱至 180 ℃ 嘅焗爐內，用燒烤模式 (grill) 焗約 30 分鐘至表面金黃即成。

好多人都會將薯仔洗淨後成個放入滾水內煮熟，但唔知點解

我就好抗拒呢個做法，覺得去皮其實唔太易之餘，

要成個薯仔煮到熟都要好耐，我寧願

將薯仔切片蒸熟，快熟好多呢！

 

原來薯蓉焗完之後表面會變得煙煙韌韌哦！

我自己因為鍾意食辣，所以加咗辣椒粉落去煮，超好味。

細食嘅朋友整一個批已經可以當正餐喇！