2014年11月14日星期五

新鮮熱辣黃豆餅

        印尼發酵黃豆餅都買過好幾次,一入到店內就即刻走到去雪櫃,點只搵勻都唔見有得賣,真係好少會咁,次次去到都見到有好多放喺度,於是走去問啲職員有冇得賣,點知佢叫我擰轉身睇睇,原來放咗喺對面啲紙皮盒上面。我問個職員點解唔放雪櫃內,佢話啲黃豆餅啱啱做好,仲係熱嘅,如果未攤凍就放入雪櫃的話就會變黑,果然拎上手都真係熱㗎,買咁耐都係第一次買到新鮮熱辣出爐嘅黃豆餅。
 
 
唔係講笑,個袋入面都仲有水蒸氣㗎!
 





買黃豆餅整咩?梗係整東南亞菜式啦!咁大嚿黃豆餅,
一次分兩餐食,一半用咗嚟整馬拉盞燜雜菜。





另一半就用嚟整印尼 Gado Gado 律。






Gado Gado,一定要有印尼花生糕,佢係呢個沙律嘅靈魂,
無咗佢就等於食白烚雜菜!今次俾我見到有呢款花生糕,
價錢平少少之餘,最重要係分開細件獨立包裝,
唔使自己切,更加唔使攪到成手
油淋淋,方便衛生好多。
 





參考食譜:
印尼沙律配黃薑飯

馬拉盞燜雜菜


 

6 則留言:

  1. 請問印尼發酵黃豆餅是不是只在賣印尼食品的店才有的?
    我也想試試^^"

    回覆刪除
    回覆
    1. 暫時我都只係知道得銅鑼灣「營多 Indo Market」有得賣咋,我屋企附近個屋邨商場即使同樣有「營多」都無黃豆餅賣,連地下街市幾檔東南亞食材店都無得賣,我估可能好似金不換咁唔太多人買又好易變,所以索性唔入貨。如果妳有經開其他類似舖頭或檔口即管問吓有無啦,但銅鑼灣「營多 Indo Market」就一定有,賣 $12 包。

      刪除
    2. 我琴日在沙田街市內的賣印尼食品的店買到呢,而且仲係暖的,
      我打算明天試整^.^
      唔該晒!

      刪除
    3. 嘩,咁就好喇,唔使山長水遠走到銅鑼灣買呀!

      唔好客氣啦,我都成日打攪妳哦! ^^"

      刪除