齋鹵味 (甜酸齋)

今日除咗滾節瓜湯外，我仲整咗個齋舖經典小食：

雪菜節瓜粉絲湯

        今日因為係初一，所以煮齋食呀。

材料：
雪菜
節瓜
粉絲
鮮腐皮
素雞粉

        先將雪菜浸水約15分鐘，等佢無咁鹹，然後切碎；節瓜刮皮洗淨、切件備用；粉絲用水浸至軟身；鮮腐皮略沖水洗淨。煲滾水後，先落節瓜同雪菜，等雪菜可以煲耐啲、出味啲，當節瓜差不多腍身時，就可以加埋粉絲，滾幾滾後，最後落埋鮮腐皮，滾一滾就得，如果唔係，啲腐皮就會爛哂，加少少素雞粉調味就OK 啦！唔好以為無落肉滾湯會好 "寡"，因為落咗雪菜，啖湯都幾鮮味 o架！

粟米肉碎粥

材料：
百搭米
免治豬肉
罐頭粟米蓉
鹽

醃料：
鹽
糖
生抽
粟粉
麻油

        豬肉碎用醃料預先醃好，煲滾水後落米，煲一陣間就可以放番落個真空煲度，食之前拎番出嚟再煲多兩煲，等啲米煮得更加爛，啲粥就更加綿，最後就落埋啲肉碎同粟米蓉，煲到豬肉熟透就可以食啦！

 

銀芽椒絲炒魚片

材料：
芽菜
炸魚片
三色椒
薑茸
蒜茸
鹽
糖
紹酒
仙露
即磨五色胡椒
炒香芝麻

        芽菜洗淨、摘去芽根，之後汆水，但只需好短時間，否則就會變腍，炒出嚟嘅芽菜就唔爽口；炸魚片同三色椒洗淨後切粗絲備用。先落薑茸、蒜茸起鑊，炒香啲椒絲同魚片，隨即加入芽菜快手兜兩兜，贊酒，加鹽、糖、仙露調味，即磨少少五色胡椒落去，跟住就即刻可以上碟，最後灑上芝麻，一碟色、香、味俱全嘅銀芽椒絲炒魚片就呈現喺眼前。

同鄭嘉穎拍拖！？我係咪發緊夢呀？

        真係諗都無諗過會同鄭嘉穎拍拖，佢人又靚仔又斯文，仲係明星嚟o添，發夢無咁早呀？

        同佢一齊都幾開心，幾舒服，不過因為佢係公眾人物，所以我哋唔可以太揚。有一日佢同我講：「見你成日都為咗我而避忌，好唔開心，好啦，今日我就同你拖住手出街拍拖啦！」我聽到之後就開心到成個人癲咗，跟住就…………清醒哂囉！原來係睇睇吓鄭嘉穎套電視劇o訓咗都唔知，頭先咪即係發夢囉！於是我就同媽咪、阿馳講，我正話睇睇下o訓著咗，你哋講番個劇情俾我聽呀。點知佢地都未開口講，我就突然o訓醒，成個人即刻清醒哂，原來係"夢中夢"，我發夢自己發夢同鄭嘉穎拍拖，仲可以見番媽咪o添！哎，當堂成個人"謝" 哂，同一時間失望兩次，即使醒咗，但o訓喺張床度都呆咗好耐先識得起身。其實，對於我嚟講，一日內碰到兩次唔開心嘅事並唔出奇，一不離二，二不離三都試過啦，都已經慣咗囉，但係就未試過同一時間兩次失望啫。

        有時我都喺度諗，依家生活都唔知為乜，好有等 "走人" feel，想快啲見番媽咪，我諗呢種感覺唔係人人都體會到，只會覺得我個人咁灰。但係相信即將隨「神七」升空嘅航天員劉伯明就會好明白我嘅心情，因為當年佢媽媽過身時，爸爸為免影響佢情緒而考唔到做航天員上太空，於是將媽媽過身嘅消息忍暪，等佢完成考試後先話俾佢聽，由於劉伯明由細到大同媽咪感情非常之好，所以因未能見媽媽最後一面而感到非常悲痛，當局仲為佢請咗個專家幫佢做咗好長時間嘅心理輔導。

        依家生活落去，都只不過係等日子過咁，好彩都仲有樣嘢 "吸引" 到我，就係 "食" ！本來我成世人最大興趣就係音樂，但係依家興趣都淡咗好多，可能係因為自己已經做咗呢行十幾年，加上最近搵工又唔如意啦，所以提唔起興趣，反而比較有興趣煮食，唔通媽咪真係咁錫我，臨走前都幫我發掘番一樣興趣，等我唔駛咁悶咁生活落去？

        媽咪，thank you very much, I miss you, I love you forever!!

絲瓜豆腐麵豉湯

材料：
絲瓜
硬豆腐
味噌(木魚味)
薑片

        絲瓜刨皮，用滾刀切件；豆腐切大粒備用。煲滾水後，先加入薑片同適量嘅味噌，當所有味噌都溶於水時，再落埋絲瓜同豆腐，滾幾滾就完成，絲瓜最好保持爽口，勿過腍。

四椒炒豬膶肉片

材料：
彩椒
枚頭瘦肉
豬膶
黑椒汁
糖
鹽

醃料：
生抽
糖
鹽
紹酒
薑汁
粟粉
油

        所謂四椒，就係三種唔同顏色嘅燈籠椒加黑椒汁囉！主材料就好簡單，只係得三樣嘢，但係味道都唔差 o架。

        豬膶瘦肉洗淨、切片，用一般調味料醃好，但因為豬膶會有腥味，所以特別加入紹酒同薑汁去醃；三色椒洗淨後開邊去籽，然後切條。先將瘦肉炒至八成熟，盛起備用，跟住炒豬膶。豬膶係其中一種比較難煮嘅食材，過熟會好硬，唔夠熟又會 "返生"，不停 "標" 血水，所以都係一個幾大嘅挑戰。當豬膶都差唔多熟透時，就可以加埋啲三色椒一齊炒，由於燈籠椒係可以生食，所以唔駛煮太耐，跟住將啲肉片回鑊，加埋黑椒汁、糖、鹽調味，再埋一個薄芡，大功告成。

        黑椒汁令到成碟餸都好惹味，曾幾何時，我想試吓自己跟食譜煮黑椒汁，但最終都係放棄咗，因為實在太麻煩費時，工序又多，所以都係買現成嘅算數。豬膶就熟咗少少，比較實，不竟都係我嘅第一次，火侯仲未掌握到。

煎豆渣薯餅

材料：
薯仔
黃豆渣
榨菜
冬菇
鹽
糖
粟粉

        整完豆漿之後，唔想將啲豆渣就咁就揼咗佢，覺得好嘥，所以之前已經喺網上搵定一啲用豆渣做材料嘅食譜，呢個煎薯餅就係其中一款。由於我唔係煮完豆漿之後就即刻煎呢個薯餅，為咗避免佢變壞 (豆類製品係特別容易變壞，加上天氣又咁熱呢 )，所以要用白鑊炒至乾身熟後，先至可以保存耐啲，炒完之後就係咁嘅樣：

        好啦，開始講吓做薯餅嘅步驟。首先將薯仔刨皮，略沖洗後切粒，排放喺隻碟上面，然後隔水蒸至熟透，之後就趁熱用叉將佢搓爛成薯蓉；冬菇浸軟、切粒；榨菜沖洗咗表面嘅紅色醃料後，將佢切粒，然後浸水約 15-30 分鐘，等佢唔好咁鹹，之後瀝乾水備用。將所有材料混合攪勻，加入鹽、糖調味後，手掌濕少少水，將混合好嘅豆渣薯蓉搓成球形，再稍為壓扁成薯餅，喺表面醮上粟粉，之後就可以放落平底鑊度煎至兩面金黃色。

        我發覺原來淨係喺表面醮粉係唔夠嘅，一定要將啲粉撈埋落啲薯蓉度一齊搓先至夠挺身，因為當我準備將薯餅翻轉面煎時，薯餅仲係好軟身，好易爛，所以下次會記得落粉搓。

        隔咗夜嘅薯餅就放喺烤爐度烤番熱嚟食，一樣咁香口好味，真係唔講都唔知係一個素菜！

P.S. 蒸熟咗嘅薯仔要趁熱搓成薯蓉，因為會比較容易搓爛。

爆香燒肉

材料：
隔夜燒肉
老抽
糖

        其實都唔算得上係煮餸，只不過係我老豆之前去完 "坎" 之後，攞咗啲燒肉返嚟，隔過夜之後煮番熱，加啲老抽同糖爆番香佢，唔知你哋有無其他方法去處理啲隔夜燒肉呢？

素雜菜湯

材料：
蕃茄
南瓜
紅蘿蔔
洋蔥
豆渣
茄膏
月桂葉 (Bay Leave)
糖
鹽

      先將蕃茄、南瓜、紅蘿蔔、洋蔥洗淨切件，將以上4種蔬菜落油鑊爆香，盛起備用。喺湯煲內燒熱少少油，將茄膏爆香及收乾水份，之後將之前爆過嘅蔬菜放落煲，加入適量清水，攪勻茄膏，再放入豆渣，為防黏底，最好稍為攪拌，最後放埋月桂葉，煲約10分鐘度，便可放入真空煲，到夜晚食飯前再拎番出嚟煲兩三個字，加糖、鹽調味就OK啦！

        唔知係咪因為落咗豆渣，啲湯煲出嚟好濃好香，加上茄膏同月桂葉，好有街外餐廳煲嘅雜菜湯 feel，好好味呀，第二日我仲用佢嚟煮通心粉o添，Oishi！

豆漿 Mocha

材料：
豆漿
即溶咖啡粉
朱古力粉

        因為我係唔飲奶嘅，所以試下用豆漿代替奶去沖咖啡。

        好特別的一杯豆漿Mocha，味道好得意，唔似飲緊咖啡，似飲緊一杯咖啡味嘅豆漿多啲，可能自製嘅豆漿黃豆味特別濃，最特別嘅係當杯咖啡凍咗時，面頭會形成一層薄薄嘅 Mocha 腐皮，好過癮！

        其實之前媽咪一早已經喺 Openrice 度 search 到一間叫 "豆咖漿啡" 嘅食店，專門沖豆漿咖啡，本來都諗住搵日陪媽咪去試吓嘅，點知無幾耐佢已經發病，無機會 lu！

簡易涼瓜兩吃 — 涼瓜炒蛋 & 豉椒炒涼瓜

        首先係涼瓜炒蛋，非常簡單嘅一道菜，主要材料就只有兩樣：涼瓜同雞蛋。

材料：
雞蛋
涼瓜
鹽

        先將雞蛋略為打散，加入適量嘅鹽、涼瓜拌勻。之後燒熱油 (需要多啲油去炒蛋，以免黏鑊)，將蛋同涼瓜倒入鑊中，快手炒至蛋汁凝固便可上碟，完成啦！

        跟住到豉椒炒涼瓜，同樣都係好簡單。

材料：
涼瓜
花椒粉
薑茸
紅辣椒
豆豉醬
 

       涼瓜洗淨，切片備用。將花椒粉、薑茸、紅辣椒粒用油爆香，再將啲涼瓜放埋入鑊，炒幾炒，加入適量豆豉醬、鹽、糖調味，最後灑上少許麻油，搵掂。

蝦乾冬菇蒸肉餅

材料：
免治豬肉(水腱及枚頭)
蝦乾
冬菇

醃料：
鹽
糖
生抽
粟粉
油

        冬菇浸軟、洗淨、切粒；蝦乾先用水洗淨，再用熱水浸軟，浸過蝦乾嘅水記得唔好倒咗去，可以留番嚟醃肉；豬肉用醃料醃好。將所有材料撈勻，就可以拎去蒸，不過點解會有咁多水走出嚟呢，唔知係熟過頭出哂啲肉汁，定係倒汗水太多呢？

        本來我係諗住整梅菜蒸豬肉嘅，但係當我打開雪櫃先發覺原來啲梅菜已經用哂，又唔記得買番啲喺屋企，咁咪唯有改用冬菇蝦乾囉，仲惹味啲 o添啦！雖然呢個係一個好普通嘅家常菜，但係要煮得好食都唔易呀！火侯唔夠啲豬肉會唔熟；蒸得太耐啲豬肉又實又嚡，所以蒸嘅時間要掌握得好好。

P.S. 我之所以用兩種唔同嘅豬肉，係因為如果淨用水腱會比較嚡，但只用枚頭又怕太膩，所以選擇兩溝。

凍蜜桃麥茶

材料：
罐頭蜜桃(連糖漿)
凍麥茶

        見之前罐蜜桃煮完餸、整完甜品都仲有剩，於是諗吓點樣用埋佢，見到浸住蜜桃嘅糖漿，突然靈機一觸，不如做杯凍飲啦！於是就將蜜桃切粒，連糖漿一齊倒落杯度，但因為就咁飲會好甜，所以喺雪櫃度攞咗樽麥茶出嚟，倒落去溝淡佢，果然味道即刻變得啱啱好，一杯冰凍嘅水果茶就咁樣 "誕生" 啦！

蜜桃香橙糕

        根據魚膠粉包裝盒上嘅香橙糕食譜而變化出嚟，因為煮紅酒蜜桃燴雞時用剩咗啲罐頭蜜桃，所以就加埋入去囉。

材料：
罐頭蜜桃
魚膠粉
橙味啫喱粉
雞蛋
豆漿
熱水
砂糖

        首先將魚膠粉、啫喱粉、砂糖倒入煲內，加入少量凍水攪勻，然後加入熱水，用最細火將佢煮溶。等所有材料都煮溶後，打散雞蛋成蛋汁，然後慢慢倒入溶液中，其間要不斷攪拌，以免雞蛋煮熟成蛋花 (其實正確做法係唔駛開火煮嘅，不過我怕生雞蛋有菌，所以用最慢火煲住佢)，熄火之後再加埋雪凍咗嘅豆漿 (正常應該係用鮮奶，但因為我唔飲奶嘅，所以用豆漿代替，用雪凍咗嘅豆漿會令液體快啲凝固)，最後放埋切咗粒嘅蜜桃，攤凍後放入雪櫃雪至凝固，咁就大功告成！食之前可加上少許椰絲，風味更佳。

(乜最尾呢兩句咁有寫食譜 feel 嘅！？)

海帶綠豆粥

材料：
綠豆
百搭米
海帶
片糖

        原本我係想煲海帶綠豆沙嘅，點知去到花檔諗住買臭草時，事頭婆話無得買，咁我就問佢過兩日會唔會有呀，佢就話俾我聽：「依家仲邊有人會賣臭草呀，成百幾蚊斤，你買唔買呀！」佢話暫時都唔會賣住 o架啦，叫我食住海帶先喎，咁唯有係咁啦，依家通漲真係厲害。但後尾我喺度諗，無咗臭草硬係好似 "掙" 咁啲嘢咁，碗綠豆沙好似失色咗，所以就改變 "策略"，改為煲綠豆粥，等到有番臭草賣先再煲過綠豆沙啦。

        綠豆要浸過夜，米就洗淨浸一陣；海帶就先洗清面頭啲海鹽，然後浸至發大兩三倍，再切成粗條備用。煲滾水後，將綠豆、米同海帶一齊放落煲度，煲大約15分鐘到就放番落個真空煲度，到食之前拎番出嚟再煲多十零分鐘，與此同時，另外再煲少量水，用嚟煲溶啲片糖，因為片糖比較多雜質，所以分開煲，方便等
啲雜質沉澱，到將啲糖水倒落去啲粥度時就避免倒埋啲雜質，之後滾多幾滾就掂啦。

        因為今日係中秋節，所以我都煮咗啲湯圓供佛 (媽咪以前逢親中秋、冬至都有咁做 )，你哋睇到粥裡面有粒白色同淡黃色嘅物體就係花生同芝麻湯圓啦，不過就唔係我自己做，係買返嚟啫，睇吓遲啲有冇咁嘅閒情日緻做湯圓先！

自製鮮豆漿

材料：
黃豆
清水
砂糖

        好簡單o架咋，將啲黃豆浸6個鐘或以上，或者隔晚夜，之後過幾次水直至啲水變清同無泡，跟住放入攪拌機度，加適量清水，將黃豆攪碎至微粒，咁就變成豆漿啦，將啲豆漿隔渣，倒入煲內先用大火煲滾 (記得邊煮邊攪拌，因為好容易黏底)，之後要轉細火繼續煲，因為未熟透的豆漿內有一種物質叫做 "皂素"，對身體有害，所以一定要徹底煲熟先可以飲，唔好以為煲滾就算數。跟住依個人口味加入適量嘅砂糖，再攪拌至所有砂糖完全溶哂，咁就飲得o架啦！

        以前見媽咪用布隔渣，要好用力咁將啲豆漿榨出，非常辛苦，好彩後來佢買咗部攪拌機連埋個隔渣網，我先至敢試吓整，如果叫我用手榨，咁就真係慳啲啦唔該，我寧願唔飲囉！或者俾貴啲錢喺街買嚟飲算數。依家試過成功整到，除咗可以飲到既新鮮又啱自己口味嘅豆漿之外，仲慳番唔少錢，因為原來 $8 就可以買到成斤黃豆，可以做到好多杯豆漿o架啦，喺街買一支最少都 $5 支啦！

蕃茄火腿蛋意粉

材料：
扁意粉
蕃茄
火腿
雞蛋
蒜茸
茄汁
喼汁
鹽
糖
奧勒崗香草(Oregano)

        先用鹽水將意粉烚熟，然後過冷河 (我自己比較鍾意食扁意粉，因為比普通意粉煙韌，較有 o趙頭)；蕃茄同火腿洗淨、切件備用；雞蛋打散成蛋液。先將蛋液炒成蛋餅，然後切件，跟住再加多少少油，爆香蒜茸同火腿，加埋蕃茄，落少少水煮一陣間，然後落埋啲意粉一齊煮，最後加入茄汁、喼汁、鹽、糖調味，灑上奧勒崗香草，上碟！

P.S. Oregano 跟蕃茄係一個好好嘅配搭。

紅酒蜜桃燴雞

紅酒蜜桃燴雞

材料：
急凍雞扒
罐頭蜜桃
青蘋果
鹽
糖
紅酒
蜜桃糖漿

醃料：
鹽
糖
老抽
胡椒粉
英式芥辣
雜香草
粟粉

        雞扒解凍洗淨，去皮切成兩件，然後用醃料醃兩個鐘或以上；青蘋果批皮、切件；蜜桃隔去糖漿、切件，跟蘋果大細相約；蜜桃糖漿留用。先將雞扒煎至六成熟，且表面金黃：

       

        之後加入青蘋果、蜜桃同煮，跟住倒入適量紅酒及蜜桃糖漿，並加鹽、糖調味，轉細火慢炆至紅酒汁稍為收乾就OK o架啦，都幾容易煮呀，仲好好味 o添！尤其係啲蘋果同蜜桃，煮腍咗後入哂味，yummy yummy！

始終打破唔到我嘅宿命！

        唉！估都估唔到，係9月1號嘅學生開學日，對於我嚟講，不但只唔係一個新開始，反而係一個失落的日子！

        今日收到一個家長嘅電話，通知我佢個囡唔再學琴，我覺得好意外，因為佢學習都幾穩定，於是我便主動問佢原因 (平時我係唔會問原因，佢鍾意講就講，唔講就算，反正佢都決定咗唔再學，況且佢講嘅原因都未必係真)，佢話個囡最近係學校入咗樂團，識到人介紹一個喺佢屋企附近嘅老師，所以想試吓咁話，但其實我知道呢個唔係真正原因囉，因為我係上門教佢個囡，根本毋須要搵個喺屋企附近嘅老師，不過無所謂啦，我條命就係咁o架啦！

        每一次我收到一個新學生時，總會有一個舊學生走；又或者新收學生學費嘅總和同即將走嘅舊學生學費總和一樣，所以我會覺得好唔開心，點解每次諗住可以賺到多啲錢時，總會流失番相同數目，硬係唔俾我賺多啲咁。後來，媽咪知道我經常為此而唔開心，佢就安慰我，同我講：「你試吓掉番轉嚟諗，個天已經對你好好o架啦，知你將會有學生走，佢就俾定個新生你，填補番條數，咁唔係好好咩！」我聽完之後，我就開始 "放低"，心情都輕鬆咗，所以媽咪對我嚟講真係好重要，每次我有唔開心，同佢 "呻" 完，佢都會開解我，等我個心舒服啲，但係依家已經再無呢支歌仔唱 lu！

        今次呢個學生走，其實我係已經預咗o架啦，因為最近我接咗兩份 job，喺老人中心教唱歌，同埋喺一間賽馬會社區中心度教琴，所以都預咗一定會有學生走，只不過無諗過會係呢個啫，因為佢完全無跡象會唔學，而且佢係我其中一個最錫嘅學生，我會不時買啲小禮物同小食 "氹" 佢，其他學生我都好少咁做，一來佢哋大個啲，唔係小朋友；二來我覺得練琴係佢哋嘅責任同本份，應該主動做好，唔應該 "利誘" 。

        呀，我都要多謝陳晃相老師，因為佢曾經同我講過一句說話：「學生如果有好成績，家長只會覺得係自己個囝囡叻；但若果個學生成績唔好，家長就會覺得係個老師教得唔好，需要轉過個老師啦！」呢句金句真係對我畢生受用，而且面對學生要走時亦無咁執著，唔會攪到自己咁唔開心。

蕃薯滾大芥菜湯

        呢個湯真係易到爆，相信無人不曉！

材料：
蕃薯
大芥菜
薑片
木魚湯包

        本來應該係用肉片滾湯嘅，不過今晚已經有菠蘿酸薑炒肉片，所以唔再重複用豬肉做食材，改用木魚湯包做湯底，簡單方便又好味，起碼我老豆唔會覺得似食齋呀。

        先將大芥菜洗淨、切件，蕃薯刨皮後切厚片，煲滾水後，先落薑片同湯包滾一陣，等佢出味，之後再落蕃薯，到蕃薯差唔多腍身時，最後落埋大芥菜滾多幾滾，咁就可以飲得o架啦，係咪好易呢！所以呢個湯都屬於我心目中嘅懶人食譜。