蜜桃香橙糕

        根據魚膠粉包裝盒上嘅香橙糕食譜而變化出嚟，因為煮紅酒蜜桃燴雞時用剩咗啲罐頭蜜桃，所以就加埋入去囉。

材料：
罐頭蜜桃
魚膠粉
橙味啫喱粉
雞蛋
豆漿
熱水
砂糖

        首先將魚膠粉、啫喱粉、砂糖倒入煲內，加入少量凍水攪勻，然後加入熱水，用最細火將佢煮溶。等所有材料都煮溶後，打散雞蛋成蛋汁，然後慢慢倒入溶液中，其間要不斷攪拌，以免雞蛋煮熟成蛋花 (其實正確做法係唔駛開火煮嘅，不過我怕生雞蛋有菌，所以用最慢火煲住佢)，熄火之後再加埋雪凍咗嘅豆漿 (正常應該係用鮮奶，但因為我唔飲奶嘅，所以用豆漿代替，用雪凍咗嘅豆漿會令液體快啲凝固)，最後放埋切咗粒嘅蜜桃，攤凍後放入雪櫃雪至凝固，咁就大功告成！食之前可加上少許椰絲，風味更佳。

(乜最尾呢兩句咁有寫食譜 feel 嘅！？)