2010年2月1日星期一

Kenwood 食物處理器

    平時我都好少送禮物俾人 ( 收人禮就多,哈哈! ),更加唔好講話送禮物俾自己,機會幾乎係零!不過今次就破例買咗份 "大玩具" 俾自己,真係好 "大" o架!話時話,我發覺每次買嚫 "玩具" 俾自己都好鬼大份 o架喎,好似微波焗爐同鋼琴咁,真係超重量級呀!


今次件玩具係部食物處理器,上個禮拜六收到 o架喇!





你睇,係咪真係好大份呢!


 


    呢部食物處理器係 Kenwood FP920,應該係喺香港有得賣嘅型號之中最 top o架喇!之前 Louisa 一早已經買咗,我見佢有好多好好用嘅功能,包括切片、切絲、切條、榨汁,打蛋、搓粉、乾磨、攪肉等等,部機都只係賣 $1488,覺得都唔算貴,合理啦!所以一早已經決定要買 o架喇,因為整起嘢食上真係慳到唔少時間、功夫同 "力水" 呀!原本諗住買部低model o架,一來慳錢,二來就係依家呢個 model 其實同我屋企用緊果部攪拌機有好多功能都係重覆咗,但係當我睇過實物之後,發覺原來低model 果幾部唔單只係功能少啲,連容量同摩打馬力都細好多,咁所以最後都係決定買番最 top 呢個 model 囉!而且又諗住依家用緊果部攪拌機始終都會有壞嘅一日,咁到時咪可以改用呢部囉! 


    我買呢部機其實都幾抵呀,因為我有 Compass VISA,所以可以用「即享錢」去「豐澤」度買嘢當錢駛,原價  $1488,扣咗 $600 多「即享錢」,即係只需俾 $888 度就攪掂。而且屋企附近個屋邨商場最近又新開咗間「豐澤」,1月8 號前買嘢滿 $1000,仲可以用張 $50 coupon  o添!





扣埋呢張  coupon 果 $50,係咪真係好抵呢,差唔多半價咁滯!


 





仲有本靚靚食譜跟機 o添!


 





本食譜係法國著名「藍帶廚藝學院」所編寫 o架!


 





裡面嘅食譜都唔錯 o架,Louisa 都係咁話。


 


    唔知部機幾時剪采呢?而頭號處理嘅食物又會係邊樣呢?麵包?甘荀蛋糕?蘿蔔糕?蔥油餅?甜薯批?哈哈,我自己都未知呀!不過整乜都係假,最重要都係自己唔好懶,唔係部機買番嚟就得個擺字!!


    大家拭目以待啦!


8 則留言:

  1. 唔知過多幾年,你會唔會買KA 整包添呢?你咁鍾意食包~
    到時果部又大又貴,可能係你新寵!
    等緊睇你D成品架!
    [版主回覆02/01/2010 23:31:00]        嘩,如果你真係見到我買埋 KA,咁你真係要戥我高興啦,因為肯定買 咗新屋兼有個大廚房呀!果部機咁大,真係無哂位擺啦。如果要用,我會去Louisa 度用佢部 KMix 囉!         吓,你都幾知我心意喎,我買呢部機最主要都係要佢個搓粉功能咋,因為我真係好想多 啲整包包呀!到時再請你食呀!

    回覆刪除
  2. 呢個食物處理器真係超多function!
    [版主回覆02/01/2010 23:33:00]       係呀,超好用呀!妳有無買呀?

    回覆刪除
  3. 好似好好玩wor~~~~~
    不過好大部下.........我家冇位放佢啦~!!!!!
    [版主回覆02/06/2010 23:40:00]        呢部大玩具霸 咗 我足足一格櫃呀!

    回覆刪除
  4. 我最近都在找 food processor啊~ 唔知買特福好定kenwood好。 你用左覺得點啊~
    [版主回覆06/27/2010 14:02:00]        我覺得我呢部「Kenwood」幾好用喎!幾乎你講得用 嘅 功能都有。因為我無用過「Tefal」,所以無得比較。         我個 friend 好似到依家都未出讓佢部 food processor 呀,同我呢部一模一樣,如果妳有興趣就話我知,等我再問清楚佢。

    回覆刪除
  5. 我都留言左俾你呀~ 你朋友架機幾時買ga?過左保養味?
    [版主回覆06/29/2010 02:02:00]        係上年買 o架,我 諗應 該未過 啩!不過佢買 咗都無乜點用!

    回覆刪除
  6. 想問下如搓粉, 你係用邊d 配件, 都係用大刀那種嗎..
    [版主回覆07/03/2010 02:29:00]        妳睇番幅相,我係用玻璃攪拌杯前面果個塑膠攪拌刀 嚟攪粉呀, 我都係跟說明書 o架咋!

    回覆刪除
  7. 緊張大師-小女人2012年3月9日 上午8:10

    Kestrel其實睇咁耐都唔明部機有乜大用途,但我見到食譜書就心動啦....
    [緊張大師-小女人回覆03/30/2012 22:28:48]啊...哈哈,明白晒
    [版主回覆03/30/2012 15:35:02]吓,部機我成日都用o架喎!!搓麵糰最正!
    哦,嗰部係我個friend o架,我幫佢喺blog度出讓咋嘛!
    [緊張大師-小女人回覆03/12/2012 08:53:40]嘩~又幾好用喎,但你又唔用既?我看到你出售呀?
    [版主回覆03/10/2012 20:36:43]妳咪當係一部萬能廚房工具囉,換上唔同零件,可以切片、刨絲、打蛋、榨汁、搓麵糰、攪碎………

    回覆刪除
  8. 你好呀,睇返你呢個舊POST,我想問你呢架機仲係咪用緊?? 打完麵糰會否過熱呢?
    [版主回覆02/18/2013 19:42:35]咁其實係睇妳買邊隻型號啫,我呢隻差唔多係在港有售中最 top 個一、兩部喇,馬力夠㗎,如果唔係我都唔會用到依家啦!咁當然,如果妳同KA / KMix 比,咁就梗係唔及啦,始終嗰啲係專業搓粉機嘛!如果要買埋其他 attachment 就貴好多囉!
    [包包阿盲回覆02/18/2013 18:20:09]thx! 我等你回覆之際,又搵到另一個目標喎,見d blog友仔話food processor 唔係太夠力,想睇下 bosch mum 5 系列
    [版主回覆02/18/2013 15:07:05]係呀,我一直靠哂佢幫我做前期工作,如果要我由零開始,我就寧願唔搓包喇,麵糰未成形之前嗰種黐手法真係又討厭、又難受!!
    麵糰唔會過熱㗎,因為每開機搓 20 秒鐘,我就會停機,一方面當然係避免麵糰過熱啦,另一方面係一直唔停機咁整我怕會燒摩打哦!況且搓夠 20 秒後就要將個麵糰一分為二,唔停機都唔得啦!

    回覆刪除