復活節派對

        噚日一早去探完阿爺、阿嫲同表舅父後，就去咗 Louisa 屋企玩，當然唔少得 Winnie 同明仔啦！好友聚頭，梗係又試整嘢食啦！

首先出場，係 Louisa 整嘅薯蓉湯，好creamy，
但又唔會太濃太膩，啱啱好！

 

呢個係集體製作嘅 Quiche Lorraine，餡料有煙肉、洋蔥、雞蛋、
忌廉同 mozerella cheese。

 

印象中應該係第一次食鹹批，味道唔錯，下次自己整吓先！

 

        呢碟就係明仔指定要我整俾佢食嘅無錫排骨，個個都讚好食呀！Winnie 仲話下次要整雙份，俾份佢拎番屋企食喎！最攪笑仲係 Jovy，見到我整就即刻問我點煮，反正我有帶個食譜去，又有英文說明，我索性俾咗佢算數，估唔到連菲傭都咁欣賞喎！我今次專登買咗包紅麴米嚟整，顏色果然靚好多，望落個賣相都 prof. 好多。

 

呢個係明仔同 Winnie 一齊整嘅黑森林蛋糕。

 

有冇覺得呢個黑森林蛋糕係個 A 貨呢？因為有人偷懶，唔願
整朱古力碎，咁咪求其灑朱古力粉喺面就算囉！

 

蛋糕包括咖啡海綿蛋糕、朱古力 mousse 同酒浸櫻桃，個人覺得
酒味過濃，食完後唔係好妥，Louisa 話我係第一個
食蛋糕食到醉嘅人！

 

明仔整好帶過去嘅綠茶豆腐布甸。

 

呢個布甸超正，又香又滑，不過豆腐味較濃，蓋過哂綠茶味，
如果再甜番啲就更加 perfect 喇！

牛油果三文魚帶子焗飯

        早前買咗兩個牛油果，其中一個用咗嚟整沙律，剩番嗰個今晚又再用嚟整海鮮焗飯。

今次我有買到帶子整喇！

 

        除咗加入帶子，仲加埋洋蔥 o添！磨菇湯就改咗用火腿磨菇湯，
所以味道更加香濃。

 

        想知道材料同做法的話，請睇番之前嘅《牛油果忌廉三文魚焗飯》啦！

雙色紅麴發糕

        聽日會去探阿爺、阿嫲同表舅父，所以今日專登整定個發糕帶過去俾佢哋。

        見上次整紅麴發糕都唔係真係發得咁勁，所以今次想試吓其他食譜，我揀咗 blog 友琦♥橋媽媽個食譜嚟試，因為見佢個成品真係發得勁高、勁靚呢！

材料：
粘米粉          150 克
低筋麵粉      60 克
泡打粉          6 克
梳打粉          1 克
砂糖              90 克
溫水              210 毫升
紅麴粉          4 茶匙 

- 麵粉及泡打粉過篩後與粘米粉混合好；溫水與糖混合拌至糖溶。

- 糖水倒入粉料內拌勻成麵糊，然後平均分成兩份。

- 其中一份麵糊拌入紅麴粉。

- 先將白麵糊倒入模內約四成滿，之後再將紅麴麵糊倒入至八成滿。

- 煲滾水，將模放上蒸籠，用大火蒸約 15 分鐘即可。

以上材料份量約可做發糕 6 個。

食譜參考自琦♥橋媽媽嘅三色發糕。

雖然今次係發得好過上次，但係始終都發唔到好似 "東南西北" 咁款！

 

咁啱今日整兩樣嘢都無用到蛋，係全齋，所以即刻諗到
要同媽咪一齊分享。

 

Notes：
- 粘米粉毋須過篩，因粉粒本身已經非常幼細。

- 蒸糕時必須要用大火才可做到靚靚裂紋。

- 發糕蒸好後須趁熱脫模放涼，否則糕底會因積聚水氣而變得過濕。

      你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

杏仁乾果燕麥曲奇 Almond, Dried Fruit & Oat Cookie

        今朝起咗身之後無乜嘢做，無所事事，即刻又試 "病發" 想搵嘢嚟整，見好耐都無整過燕麥曲奇，於是就決定整佢。

        上次整嗰個燕麥紅莓杏仁曲奇係參考《日嚐甜品》而做，今次想試吓用其他食譜嚟整，睇吓效果有咩唔同，最後就參考咗《香港人氣甜品》裡面個食譜。

材料：
固體菜油          50 克
糖霜                  20 克
黃糖                  30 克
原粒燕麥片      60 克
椰絲                  25 克
低筋麵粉          65 克
梳打粉              1/8 茶匙
糖漬橙皮          35 克
紅莓乾              35 克
杏仁片              25 克
水                      約 30 毫升
即食燕麥片      適量

- 杏仁片放入焗爐用 140 °C 焗 15 分鐘至香；低筋麵粉及梳打粉過篩 3 次。

- 將固體菜油、糖霜及黃糖混合，打至軟滑，拌入粉類、原粒燕麥片同椰絲。

- 加入乾果及杏仁片拌勻，之後加水搓成麵糰。

- 將麵糰平均分成 12 份，搓圓、按扁，然後沾上即食燕麥片。

- 將麵糰放上已鋪入爐紙嘅烤盤上，放入已預熱至 190 °C 嘅焗爐內焗 15 分鐘即
  成。

以上材料份量可做直徑約 6 厘米曲奇 12 塊。

食譜參考自鄭慧芳、胡玉玲編著嘅《香港人氣甜品》。

焗緊嘅時候已經聞到好香椰子味同橙味。

 

呢個食譜一樣做到好鬆脆嘅燕麥曲奇。

 

Notes：
- 原食譜材料為牛油、糖粉同牛奶。

- 水份用量要因應麵粉及燕麥片嘅吸水情況而增減。

- 選用原粒燕麥片 ( rolled oat ) 搓入麵糰而唔用即食燕麥片 ( oatmeal )，係因為即
  食燕麥片吸水後比較容易變腍並溶入麵糰中，會失去口感層次。

        你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

紅豆朱古力蛋糕 Azuki Chocolate Cake

        放假喺屋企無嘢好做，老竇又上咗深圳幫個朋友整嘢，所以今晚連飯都唔駛煮，無聊得滯，整完朱古力麻糬波波之後，繼續朱古力第三擊，今次輪到整洋菓子喇！

        其實呢個紅豆朱古力蛋糕想整好耐 o架喇，一直都係喺我個 To Do List 入面高據頭幾位 o架，連紅豆餡都已經一早整好哂放定喺冰格度，但係因為之前有啲係必定要做，又或者係突然間要搶先整咗先，所以一直拖到依家先輪到佢出場囉！

朱古力麻糬波波 Chocolate Pontikege

        呢排都唔知攪乜鬼，學哂明仔咁勁鍾意食朱古力㖭！ 繼上次整完麻辣朱古力之後，今日輪到第二擊，整咗我嘅心頭好 — 麻糬波波。

        睇番啲舊 blog，原來對上一次整麻糬波波已經係年半前嘅事喇！上次整嗰個係黑芝麻麻糬波波，不過我覺得嗰個食譜整出嚟嘅成品比較乾身，可能就係因為咁，無咩興趣再整第二次。直到最近，睇到《頭條日報》刊登咗韋太本《小食多滋味》裡面個朱古力麻糬波波食譜，心郁郁又想試吓整，趁今日 dayoff 得閒，咁就整嚟試吓啦！

材料：
糯米粉                  120 克
木薯粉                  15 克
可可粉                  5 克
鹽                          1/4 茶匙
糖                          30 克
橄欖油                  30 克
雞蛋                      1 隻
水                          3 湯匙
入爐朱古力粒      40 克

- 將所有粉類混合好、過篩；雞蛋拂打成蛋液。

- 將鹽同糖與粉類拌勻之後，加入油及蛋液，拌勻。

- 水逐少加入、攪拌均勻，加入朱古力粒後用手搓成糰。

- 將粉糰分成細份、搓圓，之後放上已鋪入爐紙嘅烤盤上。

- 放入已預熱至 180 °C 嘅焗爐內焗約 20 分鐘即成。

以上材料份量可做直徑 5 厘米麻糬波波約 8 個。

食譜出自韋太嘅《小食多滋味》。

粒粒都焗到脹卜卜，仲有好香濃嘅朱古力味㖭！

 

味道唔錯呀！今次比起上次個黑芝麻麻糬波波
較為濕潤， 外面煙韌，裡面較軟身。

 

 

        話就話今次比較濕潤，但始終都係未及「A1 Bakery」嗰啲咁軟身，睇佢個樣似係用唧袋唧出嚟咁款，可能就係因為水份材料多，唔能夠直接搓成糰，亦因為咁而比較軟身，下次試試加多少少水份，睇吓有冇幫助先！

 

 

 

Notes：

- 材料中嘅橄欖油同水，原食譜為牛油溶液及鮮奶。

 

- 由於糯米粉同木薯粉本身已經非常幼細，所以過篩時用匙羹喺篩內攪拌即可，
  如果用篩麵粉嘅手法，粉類會好容易散佈喺空氣之中。

- 粉糰嘅大細可隨意搓成，但要注意入爐烘焗嘅時間需略作更改。

麻辣朱古力 Spicy Chocolate

        今日整咗我人生中第一個朱古力，成功做到調溫，好開心呀！

        不甘平凡嘅我，當然唔會就咁溶咗啲朱古力，之後等佢凝固番就算啦，咁做實在太無聊喇！ 所以我就玩吓嘢，做個麻辣朱古力試吓先，反正 Lindt 果隻辣味朱古力咁貴，我一定唔捨得買，但係一直又好想試，咁咪又係果句：自己郁手整囉！

合桃無花果裸麥包 Walnut & Dried Fig Rye Bread

        識咗 blog 友 Keith 已經一段日子，大家都算係傾得埋，而且我哋都叫做係師兄弟 o添！不過佢玩中樂，我玩西樂，真係有機會要嚟番場 crossover 至得，哈哈！

        話雖如此，但係我哋咁耐都未見過面，只係傾過幾次電話，不過今日我會同佢見面呀，我會同埋佢一齊去探 Miss Cheng。話哂都係第一次見面，咁梗係要帶埋拌手禮先似樣啦！佢一向都好鍾意「A1 Bakery」個合桃提子裸麥包，之前仲曾經俾過一個差唔多嘅湯種食譜俾我，效果都唔錯 o架！咁所以我就諗住整番個包包送俾佢做見面禮。不過其實佢自己都已經整過兼食過，送俾佢又好似無乜驚喜，所以我就轉移目標，跟仙姐個食譜整咗個 17 小時合桃無花果麵包送俾佢，因為我知佢未試過 17 小時包包同無花果乾，咁呢個包包對佢嚟講夠哂新鮮啦！

中種麵糰

材料：
高筋麵粉      186.5 克
即用酵母      2 克
水                  106.5 克
海鹽              2.5 克

- 將所有材料混合，然後搓成麵糰。

- 將麵糰放入大碗內，用保鮮紙包好，放入雪櫃內作 17 小時低溫發酵。

- 將發酵好嘅麵糰剪成細塊備用。

主麵糰

材料：
高筋麵粉      53 克
裸麥粉          32 克
即用酵母      1 克
海鹽              2.5 克
糖                  40 克
水                  30 克
橄欖油          10 克
無花果乾      60 克
合桃              60 克

- 合桃洗乾淨，用抹手紙索乾水份，放入已預熱至 140 °C 嘅焗爐內焗 15 分鐘至
  香味出，之後切粒；無花果乾切粒備用。

- 除水及橄欖油外，將主麵糰其餘材料放入食物處理器內攪拌，邊攪拌邊放入中種
  麵糰細塊，攪打成麵包糠狀。

- 當所有中種麵糰細塊都加入後，就可以加水搓成麵糰。

- 將麵糰攤開，倒入橄欖油後，開機繼續搓至有彈性麵糰。

- 拎出麵糰，放喺已灑粉嘅枱面上繼續搓揉、摔打成光滑麵糰。

- 麵糰略壓扁，包入合桃及無花果，將材料與麵糰搓勻。

- 將麵糰放入已灑粉嘅兜內，冚好保鮮紙，發酵 30 分鐘。

- 拎出麵糰，排氣，平均分割成 4 份後逐個滾圓，冚好保鮮紙，鬆弛 20 分鐘。

- 麵糰再次排氣，捲成橄欖形狀，然後將其中一端搓成錐形。

- 麵糰放上已墊入爐防黏蓆嘅烤盤上，冚上保鮮紙，發酵約 45 分鐘至兩倍大。

- 用水噴濕麵糰表面，篩上少量裸麥粉，用利刀喺表面界花紋。

- 將烤盤放入已預熱至 180 °C 嘅焗爐內，焗約 30 分鐘至金黃。

- 一入爐後就要噴一次蒸氣，10 分鐘之後再噴多一次。

- 出爐後將麵糰放上架上攤凍即可。 

以上材料份量可做約 122 克麵包 4 個。

食譜參考自獨角仙@藍色大門嘅《天然麵包香》。

 

麵包賣相係咪好靚呢！其實上個星期日我已經 pre-bake 過一次，
不過就無包到餡，純粹試一試做個麵糰，睇吓有冇需要注意
嘅地方，當日老豆食第一啖已經話好好食喇！

 

 上次通電話時，Keith 話見到我整嘅焦糖合桃抹醬好吸引，咁就啱哂喇，
反正我都唔鍾意食，佢又話想試吓味先自己親手整，咁就將
剩低果樽包裝一下，送埋俾佢做見面禮啦！

 

講起上嚟，Miss 咁耐都未試過我嘅自家製麵包呀！橫掂整開就順手
送個俾佢啦，連埋呢樽咖啡，等佢可以喺中心沖嚟飲，慢慢歎。

 

Notes：
- 原食譜材料係用牛油、新鮮酵母及奶粉。

- 總用水量為原食譜嘅 76.5%。

- 由於麵糰內有裸麥粉，所以會比較濕，需視乎實際情況而加減水份。

- 新鮮酵母與即用酵母用量之間的轉換方法，請參考《不同種類酵母用量之調
  整》。

- 詳細做法，可參考白麵包多士嘅製作步驟圖片。

        你哋亦都可以喺Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

P.S.    正當打緊呢篇 blog 時，咁啱 Keith 打電話俾我，佢話佢聽日唔可以同我一齊去探 Miss，因為佢爸爸突然間病得好嚴重，仲入埋醫院，希望 uncle 吉人天相，無事出院啦！