2012年6月23日星期六

蟲草花素腐皮卷



如果話每個人嘅生日係「母難日」,咁逢端午節就應該係我嘅「兒難日」!



記得媽咪仲係住喺醫院時,西醫已經 放棄佢,將佢轉介到中醫部,當 時 醫師都話佢身體非常差,咁媽咪就問佢可以食啲咩,醫師話最好食冬蟲草。我哋兩母子聽完當然即刻無哂反應啦!之後媽咪即刻同醫師講,我哋負擔唔起,有無其他嘢可以代替,醫師就話可以用北芪代替,但我倆都心知效果差得遠。



 



之後我都有去過睇冬蟲草嘅價,原來下價貨色價錢都唔係想像中咁 惡哽,當時約 $28XX 一兩已經有交易。我返屋企同媽咪講,點知佢話叫我唔駛買喇,咁平 一兩 嘅冬蟲草肯定作用唔大,叫我唔好亂洗錢喇!其實當時媽咪已經知道自己無可能逆轉劣勢,食乜都無用,加上佢知道之前我已經為咗佢洗咗唔少錢同心機,反正自己始終都係要走,倒不如叫我儲起啲錢留番以後生活。

媽咪,
今日我特登用蟲草花為妳做咗呢個素腐皮卷,希望妳收到我份心意!

 



材料:

蟲草花

素雞

冬菇

甘荀

鮮腐皮





調味料:

五香粉

鹽焗雞粉





素蠔油





-
蟲草花略沖洗後瀝乾水;素雞切條;冬菇用清水浸軟後切絲;甘荀刨皮後切絲。


- 燒熱油,將以上材料全部落鑊,加入五香粉及鹽焗雞粉,兜炒片刻。


-
加入其餘調味料,兜抄均勻後加少量水,冚上鑊蓋煮至入味及收乾水份後盛起。


- 將鮮腐皮對摺,之後將煮好餡料放上,將鮮腐皮捲起包好,放上已墊牛油紙嘅碟上。


-
隔水蒸 5 - 8 分鐘即可。



腐皮卷味道清淡,餡料口感層次豐富,係熱天時最啱食嘅涼菜。



除咗腐皮卷,我仲整埋甜酸齋鹵味,以表自己心意。
祝願媽咪喺西方極樂早日修成正果!





Notes

-
可用乾腐皮代替鮮腐皮,但之前先要用濕布抹一抹腐皮,然後搽上清水或煮餡料時剩餘嘅汁
  料,令腐皮軟化,方便摺疊,蒸嘅時間亦要加長。




-
想縮短冬菇浸軟嘅時間,請參考《浸發冬菇方法》。




-
腐皮卷雪凍後會變得比較挺身,方便切開之餘更可保持形狀。

5 則留言:

  1. Pandora 香傭講法文2012年6月23日 下午6:26

    愛心腐皮卷
    [版主回覆06/23/2012 19:13:35]多謝妳呀!

    回覆刪除
  2. 相信你呢份心意你媽咪一定收到哂兼心感安慰
    [版主回覆06/23/2012 20:29:18]希望啦!
    多謝妳呀,毛豆!

    回覆刪除
  3. 敬如在。你媽媽一直在你的心中,你們也就一直在一起了。
    [版主回覆06/24/2012 00:45:05]對,幾年時間已經過去,心情算是已經平伏,媽咪永遠在我心中。

    回覆刪除
  4. 妳咁有媽咪心 , 佢一定收到而且仲好開心添0架 .
    [版主回覆06/24/2012 00:44:01]多謝妳呀,ak!

    回覆刪除
  5. 原來你一早整左咁有心思兼充滿愛心及思念既食物!
    [版主回覆06/24/2012 13:44:07]係呀,應該每年都會係咁,反正依家都無乜可以做到喇!

    回覆刪除