蟲草花素腐皮卷

如果話每個人嘅生日係「母難日」，咁逢端午節就應該係我嘅「兒難日」！



記得媽咪仲係住喺醫院時，西醫已經 ”放棄” 佢，將佢轉介到中醫部，當 時 醫師都話佢身體非常差，咁媽咪就問佢可以食啲咩，醫師話最好食冬蟲草。我哋兩母子聽完當然即刻無哂反應啦！之後媽咪即刻同醫師講，我哋負擔唔起，有無其他嘢可以代替，醫師就話可以用北芪代替，但我倆都心知效果差得遠。

 

之後我都有去過睇冬蟲草嘅價，原來下價貨色價錢都唔係想像中咁 “惡哽”，當時約 $28XX 一兩已經有交易。我返屋企同媽咪講，點知佢話叫我唔駛買喇，咁平 一兩 嘅冬蟲草肯定作用唔大，叫我唔好亂洗錢喇！其實當時媽咪已經知道自己無可能逆轉劣勢，食乜都無用，加上佢知道之前我已經為咗佢洗咗唔少錢同心機，反正自己始終都係要走，倒不如叫我儲起啲錢留番以後生活。

媽咪，今日我特登用蟲草花為妳做咗呢個素腐皮卷，希望妳收到我份心意！

 

材料：

蟲草花

素雞

冬菇

甘荀

鮮腐皮

調味料：

五香粉

鹽焗雞粉

鹽

糖

素蠔油

- 蟲草花略沖洗後瀝乾水；素雞切條；冬菇用清水浸軟後切絲；甘荀刨皮後切絲。


- 燒熱油，將以上材料全部落鑊，加入五香粉及鹽焗雞粉，兜炒片刻。


- 加入其餘調味料，兜抄均勻後加少量水，冚上鑊蓋煮至入味及收乾水份後盛起。


- 將鮮腐皮對摺，之後將煮好餡料放上，將鮮腐皮捲起包好，放上已墊牛油紙嘅碟上。


- 隔水蒸 5 - 8 分鐘即可。

腐皮卷味道清淡，餡料口感層次豐富，係熱天時最啱食嘅涼菜。

除咗腐皮卷，我仲整埋甜酸齋鹵味，以表自己心意。
祝願媽咪喺西方極樂早日修成正果！

Notes：

- 可用乾腐皮代替鮮腐皮，但之前先要用濕布抹一抹腐皮，然後搽上清水或煮餡料時剩餘嘅汁
  料，令腐皮軟化，方便摺疊，蒸嘅時間亦要加長。

- 想縮短冬菇浸軟嘅時間，請參考《浸發冬菇方法》。

- 腐皮卷雪凍後會變得比較挺身，方便切開之餘更可保持形狀。