海苔豆渣曲奇 Nori & Okara Cookie

仍舊係人腦同病時嘅舊作。

小弟真係好鍾意和菓子食譜，唔係因為我特別鍾意食，而係因為於相對中式或西式甜品，用油量相對地少，甚至係無油份，咁就最啱我喇，除咗因為我比較忌油之外，整完之後清洗工作特別容易快手。其二係因為我間中都會煮豆漿，剩落嚟嘅黃豆渣我都唔捨得丟，所以我經常都要為佢搵出路，和菓子食譜就用得最多黃豆渣㗎喇，所以絕對唔駛煩點處理啲豆渣。

 

今次呢個豆渣曲奇，就係用埋上次整完豆渣多士之後仲有剩嘅豆渣嚟整㗎喇。

 

材料：

牛油   50 克

低筋麵粉   60 克

壽司紫菜      適量

糖      30 克

鹽    少許

蛋液  2 湯匙

梳打粉    1 / 2 茶匙

水     1茶匙

黃豆渣     60 克



- 牛油室溫放軟；麵粉過篩 3 次；紫菜放入攪拌機內打碎。


- 將牛油同糖混合好，之後加入鹽及蛋液，均勻攪拌。


- 梳打粉加水調勻，倒入蛋油混合物內拌勻。


- 麵粉同豆渣分次加入，攪拌成麵糊。


- 用匙羹將適量麵糊勺上已鋪牛油紙嘅烤盤上，之後再喺麵糊表面灑上少許紫茶碎。


- 放入已預熱至 180 ℃ 嘅焗爐內，焗約 15 分鐘，出爐後放上架上攤凍。

食譜出自小 松本 太太嘅《日式和菓子》。

 

 

可能因為有豆渣嘅關係，曲奇比較易變軟，所以最好都係即做即食。

Notes：

- 原食譜糖嘅用量為 50 克。

- 想方便的話，可到日式超市買現成海苔粉。

- 蛋液最好少量多次加入糖油混合物內，避免油水分離現象出現。