朱古力慕斯 Chocolate Mousse

呢個朱古力 mousse 又係想整好耐嘅甜品，喺個 To Do List 內已經好一段日子，但遲遲都未動手做，因為一直都想搵個較為 “安全” 嘅食譜。

 

其實朱古力 mousse 食譜唔難搵，真係周街都係，但係每個食譜的用料及做法就真係有好大分別，有啲會淨用打起忌廉，有啲就加咗蛋白霜，有啲就加入蛋黃，有啲仲加埋橙酒呀、咖啡等配料，真係五花八門乜都有，而我自己就偏好加入蛋白霜的做法，因為口感輕盈啲，無咁 heavy。

 

大部份食譜嘅做法都唔會先將蛋白消毒，直接就加入材料內，咁樣我就覺得有少少驚囉，但係用 Italian meringue 整嘅食譜雖然可以解決呢個問題，但係就因為加入唔少糖去煮糖漿，又怕最終出到嚟個 mousse 會甜到爆，真係好矛盾！

 

最後，我參考咗好幾個食譜，綜合咗不同嘅材料、用量及做法，完成咗呢個朱古力 mousse。

 

材料：

朱古力 150 克

淡忌廉      125 克

橙酒   20 毫升

蛋白    100 克

糖 20 克

水 20 毫升

- 朱古力放入微波爐加熱或用熱水座溶後，加入25 克淡忌廉拌勻。

- 加入橙酒攪拌均勻，放涼備用。

- 將剩餘嘅 100 克淡忌廉用電動打蛋器打至企身。


- 先加入少量打起忌廉與朱古力混合物拌勻，之後再將其餘打起忌廉用膠刮拌勻。

- 將糖同水放入小煲內，加熱至 117 ℃ 煮成糖漿。

- 用電動打蛋器將蛋白打至起泡，之後將熱糖漿慢慢倒入，邊倒邊用打蛋器打發至九成企身。

- 先加入約 2 湯匙蛋白霜與朱古力混合物拌勻，之後再將其餘蛋白霜用膠刮拌勻。

- 將慕斯倒入容器內，放入雪櫃，雪約 2 個鐘至挺身即可享用。

 

食之前再額外灑上可可粉，味道更加香濃。

 

好成功呀，質感果然輕盈，正正係我想要做到嘅效果。 

Notes：

- 朱古力必須完全攤凍後先可以與打起忌廉混合，否則會將打起忌廉軟化，之後可先放入雪
  櫃保存。

- 蛋白最好預先放至室溫後使用，以免溫度太低，令糖漿加入時立刻凝固成糖粒。

- 建議用 70% 以上朱古力製作，以平衡番糖漿嘅甜度。


- 由於雪凍嘅朱古力會比較硬身，所以食之前最好先放室溫數分鐘，待慕斯稍軟身時食，才可
  品嘗到輕盈口感。