2012年10月9日星期二

檸檬玉米蛋糕 Lemon Polenta Cake

       記得好耐之前曾經喺 Youtube 度睇過 Nigella 教整 lemon polenta cake,一直都好想試,不過之前因為有其他嘢要先整,所以一直都未動手整。後尾到我買埋個檸檬準備開工時,發覺條片無咗,揭極都搵唔番,唯有將個蛋糕擱置,打入 To Do List 內繼續慢慢等。

        直到近排突然間諗到 Nigella 會唔會有個官方網頁,點知上網一 search,真係有喎!跟手就即刻 search 埋有冇 lemon polenta cake recipe,又有喎!!哈,咁啱個雪櫃又有個擺咗 N 世咁耐嘅檸檬,可以即刻開工整喇喂!
 
 


材料:
杏仁粉         100
玉米粉
         50
泡打粉         3/4 茶匙

牛油             75
檸檬醬
         25
                80
雞蛋             1 1/2

檸檬皮茸      1 個檸檬份量
檸檬汁          1 個檸檬份量
糖霜             50

 

- 牛油於室溫放軟;所有粉類與檸檬皮茸均勻混合;雞蛋拂打成蛋液。

- 牛油加檸檬醬及糖打發成牛油霜,之後將粉類與蛋液交替拌入牛油霜內。

- 將混合物倒入已墊牛油紙嘅蛋糕模內。

- 放入已預熱至 180 嘅焗爐內,焗約 40 分鐘。

- 出爐後連模放上放涼架上攤凍。

- 檸檬汁同糖霜倒入煲內,煮至糖溶及略濃稠。

- 用針喺蛋糕表面拮窿,然後將檸檬糖漿倒喺蛋糕表面即可。

以上材料份量可做直徑 6 吋蛋糕 1 個。

食譜參考自Nigella Lawson Lemon Polenta Cake
 
  
今次只係做咗食譜一半份量,而且仲將材料份量加加減減,
因為想清埋剩低嗰廿零克檸檬醬,所以就將
部份牛油用檸檬醬代替咗。
 
 




      記得之前睇 Nigella 條片時,佢教大家用天使麵喺個蛋糕表面拮窿,話比起用蛋糕試針嘅 殺傷力無咁勁,唔會攪到個蛋糕有好明顯嘅窿窿,又咁啱我都有天使麵喺屋企喎,咁咪照跟住做囉!但係拮拮吓最終都係放棄,因為天使麵實在太幼,成日斷之餘個窿又真係好鬼細,擔心啲糖漿根本滲唔到入去。
 
 
 
 
 
 

 


Notes
-
玉米粉即 polenta / cornmeal,係將粟米粒直接磨碎成粉狀,所以係黃色粉狀,並非一

  般煮餸用嘅白色粟粉 corn starch,粟粉正確嚟講應該叫做玉米澱粉。

- 大家可參考《粟米麵包》內玉米粉嘅相片。

- 想自己煮檸檬醬的話,請參考《自家製檸檬醬》。

- 前幾日喺 TVB 個網站度睇番 Jamie Oliver 個節目,又又咁啱有教整蛋糕兼淋糖漿,
  佢話想個蛋糕吸收多啲糖漿的話,就一定要凍蛋糕淋熱糖漿,又或者掉轉,熱蛋
  糕淋凍糖漿,你哋都不妨試試呀!
 

 

8 則留言:

  1. 跟Nigella既譜,減大半油/糖先0岩食...呢條友天生有油脂糖免疫力, 成堆食都唔怕.
    [版主回覆10/10/2012 03:11:19]妳睇番佢早期啲片,同依家比較就知佢有幾免疫啦!
    我都整過一次,但味道唔太好,我唔係咁接受到!
    妳係指呢款嗎?http://blog.yahoo.com/kestrelblog/articles/67660/index
    [毛豆回覆10/09/2012 22:20:18]Polenta煮咗攤凍煎,拌沙律,配扒都好食.

    回覆刪除
  2. 緊張大師-小女人2012年10月9日 下午8:23

    朋友,你食左未呀,呢個蛋糕甜唔甜呀,我又想整喎,但怕太甜.我其實以前成日睇到食譜講"玉米粉"真係唔太知係乜東東,現在你咁清潔解釋明白晒,又有收入添.
    [緊張大師-小女人回覆10/11/2012 14:15:52]多謝多謝你實太濶綽了
    [版主回覆10/10/2012 18:41:30]啲錢慢慢俾哂妳,咁我仲唔窮!?
    妳成個蛋糕拎走返去同老公兩個慢慢歎都得啦!
    [緊張大師-小女人回覆10/10/2012 18:14:53]no la 朋友我的確漲了好多學了不少,正呀,但你點會窮呀!你減了糖都覺得合心意那我咪要再減,你看你呢個蛋糕cut開了那件幾靚呀,試一件得唔得呀?
    [版主回覆10/10/2012 03:06:47]老友,妳荷包越來越脹,我就變得越來越窮喇!
    甜唔甜?首先,我係比一般人食得甜;第二,我將個原食譜所有糖份都刻意削減,所以我會覺得啱啱好囉!

    回覆刪除
  3. N 世咁耐嘅檸檬???

    [版主回覆10/10/2012 03:03:53]妳好驚嘛?但係仲勁多汁㗎!

    回覆刪除
  4. 好似好複雜咁呢~ 個樣好靚~
    [版主回覆10/10/2012 18:32:12]對妳呢位高手嚟講,點會複雜呀,只係材料比較多少少啫!

    回覆刪除
  5. N 世耐嘅檸檬無變縐皮柑
    [版主回覆10/12/2012 17:44:27]日日都有檸檬!?妳屋企好鍾意食檸檬咩?
    [緊張大師-小女人回覆10/12/2012 08:11:19]我家天天都有檸檬等我試下你呢個方法多謝你無私分享同教導,感恩
    [版主回覆10/10/2012 18:36:34]呢個關鍵就係:用紙袋裝住、包好,再入落膠袋,紮好個口先放雪櫃,咁就可以放好耐㗎喇,表皮完全無異樣,仲係 "立立令",汁都仲好多呀!蔬菜都可以同樣處理。
    究竟你哋點去衡量個 N 㗎?N = 幾千年?個個都咁驚!?最多咪都係擺雪櫃幾個月咋嘛!!

    回覆刪除
  6. 啱啱想問你玉米粉即係咩
    都係自己煮檸檬醬好啲...嗰日喺烘焙店見到啲檸檬醬隻色勁假...雖然多工序啲
    [版主回覆10/10/2012 18:39:21]咁妳依家見到玉米粉個樣未呀?
    係囉,反正都整開囉,唔差在整埋個醬啦,自家出保證優質嘛!反正用剩咗可以當果醬用,搽麵包、餅乾,甚至整磅蛋糕都得,唔會白癈功夫嘅!

    回覆刪除
  7. 整得好吸引, 不過, 睇到最尾, 你都無講到個蛋糕好唔好食嘅 ? 跟唔跟好呢?
    [版主回覆10/13/2012 18:35:50]哎呀,我成日都同人講,靚唔靚?好唔好食?掂唔掂?好唔好聽?容唔容易?……之類嘅問題,我都盡量唔會答,因為呢啲感覺真係好個人,最經典係食味,我覺得好好食嘅嘢,我個 friend 居然覺得難食到即刻掉落垃圾桶!相反,我覺得唔太吸引嘅,有朋友就整極都唔厭!所以最好就係自己先小份量整一次,啱口味就繼續整,唔啱嘅就一次試過算數!

    回覆刪除
  8. 緊張大師-小女人2012年12月31日 上午7:51

    朋友我終於整左呢個蛋糕啦,但我用埋糖霜係個蛋糕到,,原來係用來做面的檸檬糖漿,個蛋糕多50g糖霜,等我地甜甜蜜蜜過除夕.
    [版主回覆01/04/2013 01:43:36]完全收到哂、明白哂!
    [緊張大師-小女人回覆01/03/2013 09:00:41]第一:我爸爸真係幾威架,好多女fans捧場不得了.
    第二:他成日話食唔多,唔肯過來.(但我煮的菜全就他口味)
    第三:明天打邊爐只好去接他車佢過來,免他等巴士
    [版主回覆01/03/2013 00:15:52]第一:嘩,原來世伯係歌星呀,好威喎!
    第二:咁大家肯相就都已經好好啦!
    第三:咁妳哋車佢老人家入沙田囉!
    [緊張大師-小女人回覆01/02/2013 21:38:00]第一:爸爸成日出show或練歌好忙第二,他乜都唔食得所以成日都話唔來啦,我食粥得啦,我就他好多東西唔煮因為我想個個都可以吃,第三,佢成日話要等咁耐車入去你家吃飯,我快被佢激死啦
    [版主回覆01/02/2013 20:10:49]點解妳成日講到好難得有機會同妳爸爸一齊食飯呀?退休人仕都咁忙?
    [緊張大師-小女人回覆01/02/2013 16:14:40]對呀,我真係咁樣心情喎,大除外吃了一餐好開心又豐富既全家晚飯,難得是爸爸都有來食飯,點會唔甜
    [版主回覆01/01/2013 19:00:04]哈哈,咁咪話俾妳先生聽,個蛋糕正好反映到妳依家個心情囉!
    [緊張大師-小女人回覆01/01/2013 14:05:06]你講中了,佢話好吃仲好香杏仁味但甜了,因為連面的檸檬漿既糖霜都放了入蛋糕點會唔甜呀,.........甜到漏呀
    [版主回覆12/31/2012 22:10:13]咁妳先生覺得好唔好食?用檸檬醬拌食應該一流呀!

    回覆刪除