橙香南瓜伯爵雪芳

一直都覺得雪芳蛋糕比較難去做裝飾，當然，如果抹上打發忌廉之後就可以有多啲變化，但查實唔係太多人鍾意食 cream 囉，尤其係送禮，如果對方唔鍾意的話，咁就真係浪費心機，自己白做功夫之餘，對方又未必欣賞。但係自從上次整過抹茶豆腐雙色雪芳之後，發覺效果都唔錯，即使唔抹 cream 都唔算太差，都見得吓人。

 

聽日我約咗 Li Kien 一齊去探陳老師，自從佢搬咗新居之後，一直都未有機會去拜候佢，而且早前佢結婚時我原本係會出席佢個婚禮，點知又嚟嚴重感冒，又係失埋聲嗰隻哩，雖然個人狀態無乜事，但費事儀式進行時又咳又打乞嚏咁失禮啦，最後都係無去到！所以要整番個蛋糕做伴手禮至得呀！

材料：
熱水 55 毫升
伯爵紅茶葉 1 湯匙
南瓜 50 克
橙汁 30 毫升
低筋麵粉 80 克
蛋黃 3 個
糖 60 克
橄欖油 35 毫升
橙酒 1 茶匙

橙皮茸 1 個橙份量
蛋白 4 個

- 先將 1/2 湯匙茶葉加入熱水內攪拌，冚蓋焗 3 分鐘，之後用茶隔過濾，攤凍備用。

- 南瓜切粒，隔水蒸至半腍狀態，趁熱用叉壓爛，加入少量橙汁拌成南瓜蓉。

- 用膠刮將蛋黃打散，加入 20 克糖拌勻，加入橄欖油攪拌勻均後平均分成兩份。

- 將剩餘嘅茶葉放入攪拌機內打碎，連同 30 毫升紅茶加入其中一份蛋黃混合物內。

- 另一份則加入南瓜蓉、剩餘橙汁及橙皮茸，攪拌均勻。

- 麵粉過篩 3 次後平均分成兩等份，分別加入兩款蛋黃混合物內，攪拌成麵糊。

- 蛋白用電動打蛋器打至起泡，之後將剩餘嘅糖分 3 次加入，打成八成企身嘅蛋白霜。

- 將蛋白霜平均分成兩份，分別拌入兩款麵糊內。

- 將兩款麵糊交替地倒入模內，然後喺枱面輕敲數下，釋出較大氣泡。

- 放入已預熱至 180 °C 嘅焗爐內焗約 30 分鐘，出爐後立即倒扣攤凍。

- 脫模後即可享用。

 

以上材料份量可做直徑 17 厘米蛋糕 1 個。

激死人喇，偏偏個蛋糕係要嚟送禮，脫模時先至整爛咗個蛋糕面！！
伯爵紅茶味嘅位置完全無事，全部出事都係南瓜麵糊嗰啲位置，
我懷疑可能係因為多咗南瓜蓉會比較吸油，攪到
唔夠油份而黐模，下次再整多次時試吓唔
扣減油用量，睇吓會唔會好啲先！

唉，無理由做完一大輪功夫唔送俾人㗎！唯有遮遮掩掩啦，
希望兩位老師唔好介意喇！

Notes：
- 南瓜勿蒸得過腍，否則會大量出水；而橙汁用量則視乎南瓜蓉嘅濃稠度而調整。

- 若茶葉本身已經好碎的話，可用咖啡濾紙過濾茶液。

- 如果過濾後的紅茶份量太少的話，可加清水至 30 毫升。

- 蛋白霜拌入麵糊時，最好先取少部份與麵糊徹底混合，令到兩者密度拉近，易於拌勻。