南瓜西米綠豆沙 & 上海粗炒

        呢餐係我噚晚嘅晚餐，簡簡單單，煲咗糖水同炒麵。

上海粗炒及南瓜西米綠豆沙。

嚴格上嚟講，呢碟唔可以叫做粗炒，應該係 “中炒” 至啱，因為
我唔係買最粗嗰隻麵條，因為覺得要煮好耐先至完全煮透。
到要落老抽時，好彩望一望清楚，原來樽內已經發哂霉，
成樽唔要得，好彩只係剩番 1/4 樽度，咁咪唯有
淨係落生抽，所以好唔夠色呀！！

 

 

 

自從食過 Ernest 媽咪煲嘅綠豆沙，我就愛上咗佢嘅煮法，
加咗南瓜特別好食，今次我仲落埋西米㖭！

菜檔阿姐好介紹，呢款拳頭咁大嘅南瓜真係好粉、好好食，不過價錢唔平，
係中國南瓜嘅一倍哦！至於西米，俾著平時我一定唔會買呢包 "青 BB"
嘅西米，又細到大都好怕食啲明知落色素嘅食物，見到都周身痕，
但係我見佢包裝上面寫住天然食用色素，再睇埋英文，寫明有
2% 班蘭葉，咁就不妨一試喇，唔係化學嘢嘛！果然喜出
望外，煲好之後，打開煲蓋準備將西米過水時，嘩，
勁香班蘭味呀，果然係堅喎！如此貨色，當然唔平
啦，盛惠 $7.5 / 200g，不過試過就算，唔會再買
喇，因為過完水之後無哂班蘭味呀！！

       

        睇到呢度，有無留意到呢餐其實係全齋呢！如果完全無諗到的話，即係話俾你聽，食齋其實都唔係想象中咁難、咁寡、咁乏味，懂得煮的話，其實真係唔使太刻意話為咗食齋而去諗煮咩餸，如果只係食素的話，咁就更加易話為，蔥、蒜、韭、酒都食得，總之唔落肉就攪掂！素食唔單只有助個人健康，仲可以為地球、環境出一分力，一個禮拜食一餐都唔係真係咁難呢！大家一齊響應 Green Monday 啦！其實如果有心的話，都唔使指定禮拜一先食嘅，Green Tuesday、Green Friday 都得，由你自己話事，或者先由一個月一餐開始先囉！

       加油呀！