薑味杞子麵包 Ginger & Wolfberry Bread

Ernest 媽咪問我用咗包日本薑粉未，佢話叫我用嚟整薑餅啦，但係我一直都唔太鍾意整餅乾、曲奇，覺得整曲奇個 "Gǎn Jué" 唔係太好，好麻煩同好油膩，整完之後啲用具要洗好耐先洗得乾淨。

好啦，今日就用佢嚟整包啦！

湯種

 

材料：
高筋麵粉 9 克
水 45 毫升

- 先將水倒入小煲內，再加入高麵粉，用打蛋器拌勻。

- 用慢火加熱，邊煮邊用打蛋器攪拌。

- 當加熱到 65 °C 時就可以離火，麵糊變得濃稠兼攪拌時留有紋路。

- 煮好湯種後冚好煲蓋，攤凍備用。

 

主麵糰

 

材料：
杞子 15 克
高筋麵粉 175 克
薑粉 5 克
糖 15 克
鹽 3 克
即用酵母 5 克
雞蛋 1 隻
水 約 45 毫升

橄欖油 20 克

- 杞子洗淨後用水浸軟，瀝乾水備用；雞蛋拂打成蛋液。

- 將麵粉、薑粉、酵母、鹽、糖、湯種及 42 克蛋液混合，逐少加水搓至起筋。

- 加油繼續搓成麵糰，放上已灑粉嘅枱面，繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙封好，發酵 45 分鐘。

- 麵糰排氣後平均分割成 2 份，分別滾圓，靜置鬆弛 15 分鐘。

- 將麵糰壓平，然後用擀麵棍擀開至長度與模長度相約。

- 反轉麵糰，將麵糰慢慢捲成長條形，捏緊收口。

- 兩條麵糰放入模內，發酵至麵糰稍微高出模邊。

- 將剩餘嘅蛋液掃於麵糰表面，放入已預熱至 170 ℃ 嘅焗爐內，焗約 25 分鐘即成。

- 出爐後立即移至架上攤凍。-

 

以上材料份量可做 9 厘米 X 18 厘米 X 6 厘米麵包 1 條。

 

食譜出自陳郁芬嘅《65 ℃ 湯種麵包》。

未焗嘅麵糰有種白裡透紅嘅感覺，好可愛哦！

見到呢片麵包，你哋諗起咩呢？我諗到「嘉頓」個 logo 喎！
食到有薑味，不過可能因為我一向都食得比較辣，所以覺得
薑粉可以再落多啲，味道再濃啲會更啱我胃口呀！

Notes：
- 杞子切勿浸得太軟身，否則包入麵糰時會容易壓爛，而且瀝乾水之後最好再用手輕輕將水份榨
  乾，避免加入麵糰後令麵糰過濕而過於黏手。

- 製作湯種時，麵粉與水嘅比例為 1：5。