花生咖啡鬆餅 Peanut Coffee Muffin

    上次整嗰個香橙朱古力曲奇係應阿 Bill 嘅 order 而整，今次呢個 coffee muffin 就係 Miss Cheng 好耐之前嘅 order，噚日卒之都可以 “交貨” 喇！

 

材料：

自發粉   125 克

梳打粉   約 1/4 茶匙

雞蛋     1 隻

即溶咖啡粉   1 湯匙

淡忌廉   30 毫升
水   約 30 毫升

糖   70 克

鹽   少許

橄欖油  50 毫升

花生碎   適量

 

- 自發粉同梳打粉混合過篩 3 次；雞蛋拂打成蛋液。

- 咖啡粉先用小量熱水溶解，之後加入凍水至30 毫升。

- 糖同鹽加入粉類內均勻混合，備用。

- 將咖啡溶液、淡忌廉、蛋液及橄欖油混合好，之後倒入粉料內拌勻成麵糊。

- 將麵糊倒入紙模內，然後灑上適量花生碎。

- 放入已預熱至 200 °C 嘅焗爐內焗約 15 分鐘至熟。

 

以上材料份量可做鬆餅 6 個。

今次個 texture 真係勁鬆，可能真係好似 Louisa 咁講，用自發粉整 muffin
係會比起用普通麵粉整更加鬆軟。




表面加咗花生碎，令到  muffin 多份香氣之餘，亦可以增加口感。

 

 

Notes：

- 自發粉可用低筋麵粉代替，但要額外加入泡打粉 1 茶匙。

- 可直接用 60 毫升牛奶代替淡忌廉同水。

- 攪拌麵糊時，當所有材料大致混合好後就必須停止攪拌，以免起筋而令成品唔夠鬆。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

 

全麥香腸包

    一直以嚟我都比較少整有餡包，因為自己唔係太好，始終鍾情簡單樸素嘅歐陸包多啲，而港式嘅 “牙印包” 就更加盛惠哂喇！！唔好話 DIY，連買都唔會買嚟食呀！

 

    港式包中，我淨係會食菠蘿包、香腸包同椰絲檳，其他越多花款、越多餡料、越係軟身、越大機會留有牙印嘅包包真係避之則吉呀！

 

    呢個禮拜突然想食腸仔包，見星期五朝早比較得閒兼好晏先出動教琴，所以試一試整啦！

 

材料：

高筋麵粉   100 克
全麥粉   30 克

即用酵母   2 克

鹽     1 克

糖     15 克

蛋液   12 克

水     約 60 毫升

橄欖油     5 克

香腸   4 條

 

- 將麵粉、酵母、鹽、糖同蛋液倒入食物處理器內，逐少加水攪拌至起筋。

- 加入橄欖油，繼續搓成麵糰。

- 拎出麵糰，放上已灑粉嘅枱面上，搓揉摔打成光滑麵糰。

- 將麵糰滾圓，放入已灑粉嘅兜內，包好保鮮紙，發酵約 45 分鐘至兩倍大。

- 拎出麵糰排氣，平均分割成 4 份並分別滾圓，冚上保鮮紙，靜置 10 分鐘。

- 將麵糰分別搓成幼長條狀，之後圍住香腸繞圈，黏緊收口。

- 放上已墊入爐防黏蓆嘅烤盤上，冚上保鮮紙，發酵約 45 – 60 分鐘。

- 麵糰表面掃上剩餘蛋液，放入已預熱至 180 °C 嘅焗爐內焗約 15 分鐘即可。

以上材料份量可做麵包 4 個。

第一次試呢個做形，唔算太難，但一定要將麵糰盡量搓至幼身，
否則發酵之後就唔夠靚仔，成隻 "豬" 咁款！

Lily 完全估唔到係我自己做，仲以為係喺街買嘅，佢話叫我拎出去賣喎！

 

Notes：

- 無全麥粉的話，可全用高筋麵粉。

- 將麵糰搓成長條形時，雙手必須一邊搓一邊拉長。

- 如果唔想成品太深色的話，掃蛋液時就唔好掃太多。

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

 

 

 

 

 

香橙朱古力曲奇 Orange Chocolate Cookie

    呢個曲奇係上個禮拜五整o架喇，係應阿 Bill嘅要求整嘅。佢話佢唔鍾意食其他餅乾，淨係鍾意食曲奇，但係工人姐姐又唔肯整俾佢食，咁所以我就應承佢，等我得閒就整俾佢食啦！咁我問佢鍾意食咩味，佢就話要有朱古力粒嗰種，加上我又記得佢話過鍾意橙味，於是我就加埋橙皮茸落去一齊整，所以特別香。

 

   星期日上到去 Miss Cheng 屋企，阿 Bill 已經同爸爸、哥哥落咗去 club house 游水，淨番 Miss 一個喺屋企，咁我就見佢先試味，佢一見到就已經話阿 Bill 肯定唔駛無耐就清哂所有曲奇，果然係知子莫若母！！

 

 

 

材料：

低筋麵粉    125 克

泡打粉    1/2 茶匙

牛油    50 克

固體菜油    50 克

砂糖    30 克

黃糖    30 克

雞蛋    1 隻

橙皮茸   1/2 個橙份量

朱古力粒    適量

 

- 粉類過篩 3 次；牛油室溫放至軟身。

- 將糖、牛油及固體菜油放入兜內，用電動打蛋器打至發白。

- 加入雞蛋，打至蛋液與牛油霜完全混合。

- 篩入粉類，用膠刮拌勻成麵糊。

- 最後將橙皮茸同朱古力粒拌入麵糊內。

- 用匙羹將麵糊逐小勺上已墊牛油紙嘅烤盤上。

- 放入已預熱至 180 °C 嘅焗爐內焗約 10 - 12 分鐘即成。

以上材料份量可做直徑 2 吋半曲奇約 20 塊。

 

成品非常鬆脆，老竇一食就即刻讚！

橙同朱古力真係好夾，係繼綠茶同紅豆之後，另一對 "模範伉儷"！

 

 

Notes：

- 加入固體菜油，可令成品更加鬆脆。

- 麵糊勺上烤盤時，需預留一定空間俾麵糊膨脹。

- 出爐後，等到曲奇變得較硬身後先移到架上攤凍。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

芭堤雅燒雞

    上次跟食譜整嘅泰式煎魚餅效果唔錯，味道亦相當好，趁本書未還番俾圖書館，今晚再跟佢整多個芭堤雅燒雞先。

 

燒雞

 

材料：

急凍雞扒 1 公斤

椰漿  適量

 

醃料：

蒜茸       2 茶匙

蔥花  1茶匙

黃薑粉    1/4茶匙

咖喱粉    1/4茶匙

細紅辣椒  1隻

糖    1茶匙

鹽    少許

魚露  1 1/2茶匙

 

- 紅辣椒洗淨後切碎；雞扒解凍後洗乾淨，用抹手紙索乾水份。

 

- 將醃料全部材料拌勻，之後加入雞扒醃好，再倒入椰漿醃約 1 個鐘，醃好後瀝乾椰漿。

 

- 燒熱平底鑊，落油，先將雞皮一面煎至香脆，之後翻轉將雞肉煎熟即可。

 

 

 

蘸汁

 

材料：

紅辣椒     450 克

白醋  2 杯

糖    1/2 杯

鹽    1/3 杯

日本清酒  1/3 杯

蒜頭  1 杯

青檸  2 個

魚露  1 茶匙

紅辣椒粉  1/2 茶匙

 

- 青檸先刨皮，然後榨汁。

- 將青檸皮茸、汁及其餘材料全部放入攪拌機內打爛成醬汁即成。

食譜出自關順發嘅《辛香‧泰美味》。

今次塊雞扒煎得非常靚，勁金黃，可能係因為用咗黃薑粉
同咖喱粉醃有關。

可能因為雞扒比較厚嘅關係，雞肉唔係太入味，好彩有呢個
酸辣蘸汁 "補救"，下次再整最好都係醃上幾個鐘會較好。




醃雞時用上大量椰漿，醃好之後無理由倒咗去 o架！
所以我就用番嚟煮青咖喱雜菜。

 

 

Notes：

- 急凍雞扒可用起骨新鮮雞髀代替。

- 醃雞扒時，椰漿必須蓋過雞扒，若果係一塊雞扒份量的話，一罐細椰漿啱啱夠用。

 

- 原食譜醃料中係用芫荽碎，我自己用蔥花代替。

 

- 蘸汁做好後可以放入雪櫃儲存，同樣適合蘸其他肉類伴食。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

草莓乳酪雪糕 Strawberry Frozen Yogurt

    依家 Froyo 大行其道，但我就一次都未食過，因為都覺得幾貴，唔捨得食。

    但錢都唔係問題，最重要係我驚佢勁臊，如果真係臊到我頂唔順的話，都唔知點算好囉，又無人幫我跟手尾，唔通自己食過哂先俾人食咩！我呢世人最怕就係嘥嘢，尤其係浪費食物，真係救幾多貓狗都唔掂，到時真係貼錢買難受！！

    所以，都係繼續秉承住我句格言：想食咩，咪自己動手整囉！用自己食得到嘅乳酪嚟整，實食無黐牙啦！

材料：
草莓乳酪   400
檸檬汁   1 湯匙

- 將材料倒入容器內，之後用電動打蛋器攪拌均勻，放入冰格雪 2 個鐘。

- 拎出用電動打蛋器打鬆，放入冰格雪 1 個鐘。

- 重覆以上步驟 3 - 4 次，之後雪至硬身即可。

成品比雪糕清爽，且入口即溶。

加埋雜莓同燕麥方脆一齊食，好味！

Notes：

-  因唔同牌子嘅乳酪其甜度亦會唔同，可依個人口味加入適量糖。

- 如果用原味乳酪做的話，我加入新鮮士多啤梨或急凍士多啤梨一齊攪打。

 

 

  你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

不能盡孝愧對娘！

兒是娘的心頭肉，娘是兒的擋風牆 ……

男兒膝下有黃金，只跪天地和娘親！

洋蔥煙肉包 Pain aux Oignons & Bacon

   上次因為整 ciabatta 而預備咗一大嚿麵種，相信整多幾次麵包都夠用，今日就再跟同一本食譜整個洋蔥煙肉包。

 

    原本喺書裡面係兩個食譜嚟 o架，分別係洋蔥包同煙肉包，當我一睇到呢兩個食譜之後，真係好想兩個都整，但係我又懶，費事分開兩次整，所以就綜合咗兩個食譜一次過整出呢個洋蔥煙肉包。

 

 

材料：
高筋麵粉      150 克
即用酵母      1.5 克

鹽         2 克

水      約 90 毫升
麵種      40 克
洋蔥      20 克
煙肉      20 克

- 麵種切細件；洋蔥同煙肉切細粒，備用。

- 除洋蔥同煙肉外，將其餘材料全部放入食物處理器內攪拌成麵糰。

- 拎出麵糰，放上已灑粉嘅枱上，用手壓平麵糰，包入洋蔥同煙肉粒。

- 之後繼續搓揉及摔打成光滑麵糰。

- 將麵糰滾圓，放入已灑粉嘅兜內，用保鮮紙包好，發酵 45 分鐘。

- 拎出麵糰排氣後再次滾圓，靜置 15分鐘。

- 麵糰表面灑上少少粉，然後排氣並再次滾圓。

- 烤盤墊上入爐防黐蓆，然後再喺蓆上灑粉，將麵糰放上後用刀喺麵糰表面割紋。

- 用乾布冚住麵糰，發酵 1 小時 30 分鐘至兩倍大。

- 焗爐內放入一碗水並預熱至 220 °C，之後將麵糰入爐焗約 25 分鐘至熟。

以上材料份量可做 300 克麵包一個。

同上次個 ciabatta 一樣，外表香脆，裡面非常軟熟，
麵種嘅威力真係不容忽視。

洋蔥同煙肉嘅鹹香，好食到停唔到口！

 

 

Notes：

- 麵種做法，請參考《意大利拖鞋包》，若麵種係之前做好並放入冰格保存的話，需預先一晚
  移至雪櫃內解凍。

- 高筋麵粉可用法國麵包粉代替，做出較硬脆口感。

 

- 搓麵糰時，最好先扣起小量水，即使較為乾身亦唔緊要，因為當包入洋蔥之後，就會慢慢
  滲出水份，到時再酌量加入麵粉調整濕度。

 

 

你哋亦都可以喺 Facebook Fans Page 度搵我 o架，我間小店叫做 La Cucinadi Kestrel 呀，快啲 click 入去做我個 fans 啦！

 

 

泰式煎魚餅

            印象中好似未整過泰國菜，所以之前喺圖書館借咗本泰國菜食譜，見到個個餸都想試整，但係有啲食譜係比較煩複，今晚就整個較為簡單容易嘅煎魚餅先啦！

香蕉乾果仁燕麥條 Banana Dried Fruit & Nuts Oat Bar

        早前睇到 blog 友阿銀整咗個燕麥條非常吸引，因為用咗香蕉蓉去代替一半油嘅份量，難怪連佢都話咁樣做法就唔會太 "魔鬼"。對於一向對油脂有恐懼症嘅我，知道呢個做法之後，當然會跟住做啦！但係之前整過一次，自己就 "懶醒" 咁將全部油嘅份量都用香蕉蓉去取代哂，誓要將 "魔鬼" 化身成 "天使"，但係結果當然係失敗啦！因為完全一滴油都無又點可能焗到香脆哩，成品完全係軟身囉！！   

 

        今次加番油落去整，咁就成功喇！

蜜糖燒雞翼

    你哋咪見到燒雞翼幾隻字就以為我啱啱 BBQ 完呀，查實呢個雞翼只係叉燒嘅變奏版，唔用脢頭豬肉，改用雞全翼嚟整，個醃醬及做法同叉燒完全無分別，之係焗嘅時間縮短咗，因為雞翼易熟好多嘛！

出爐後放咗喺枱面，香到連老竇都即刻喺房度走出嚟睇吓我整乜！

食落口感覺好似有叉燒味嘅雞翼！

做法請參考蜜汁叉燒及淮鹽七味雞翼。

美式甘筍蛋糕 American Carrot Cake

        一直以嚟，我都認為甘筍蛋糕係 “美國嘢”，但原來原本係 “英國貨”，後來傳到美國之後大受歡迎，美國佬仲加上一層 cream cheese 喺面頭，做成美國特色嘅甘筍蛋糕。

       呢個美式甘筍蛋糕係我噚日整嘅，面頭嗰層 cream cheese 當然唔係正貨啦，都係同樣用豆腐整㗎！不過我驚上次整嗰種豆腐 cream cheese 會太瀉身，所以就跟著同一本書裡面另一個用豆腐整嘅打發忌廉，因為佢加咗大菜落去整，咁就會挺身好多喇！

是時候了……

        早幾日收到 Yahoo!Blog 寄嚟嘅 e-mail，話兩日後就進入升級嘅第二階段，如果仲未升級到新版 blog 的話，就唔可以再 update 新 blog。

        喺咁嘅情況下，想唔轉都唔得啦！其實睇到其他 blogger 轉用新版之後，好多原有嘅功能都無咗，而且 blog 友欄都無埋，好多都 "失去聯絡"，真係唔係好想轉！ 不過依家 "死期" 都到喇，咁咪唯有死死氣搬家罷啦！

        早前聽 T&P 講，佢搬家都搬咗成幾粒鐘先搬得完，唔知我又要搬幾耐呢？Anyway，各方友好，新 blog 見喇！

乾果仁朱古力 Dried Fruits & Nuts Chocolate

    發覺自己自從識整嘢食之後，真係買少咗好多現成食品，連常備左右嘅朱古力都無買到，但係自己一直又懶整，所以已經 "餓" 朱古力 "餓" 咗一排，依家已經 "餓" 到頂唔順喇，所以整個簡單易做嘅朱古力止一止 "餓" 先！！

材料：
原粒杏仁 20 克
花生 20 克
紅莓乾 10 克
糖漬橙皮      10 克
冧酒       適量
調溫朱古力   150 克

- 杏仁同花生略沖洗，之後放白鑊內炒香，花生去衣，備用。

- 紅莓乾同糖漬橙皮用少量冧酒醃一陣，然後瀝乾。

- 朱古力隔熱水座溶，然後調溫。

- 將乾果及果仁拌入，然後將材料倒入已墊入爐紙嘅容器內，用膠刮掃平表面。

- 於室溫凝固後，即可切件享用。

呢個朱古力簡直係簡單易做又好食。

 

不單只口感豐富，仲有淡淡嘅冧酒味 o添！ 

Notes：
- 可隨自己喜好選擇其他果仁及乾果。

- 果仁亦可放焗爐內，用 140 °C 焗約 15 分鐘至熟及香味出。

- 朱古力調溫方法，可參考軟心朱古力 (咖啡味) 朱古力外殼做法。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

意式玉米糕 Polenta

    上次整豆羹，毛豆喺 Facebook 度睇到相時，佢仲以為係 polenta！嗰一刻我先諗起，原來 polenta 其實都係喺我個 To Do List 入面，不過因為太耐已經唔記得咗佢，今晚就即刻整嚟食啦！

材料：
水   900 毫升
鹽   適量
糖   適量
粟米粉   150 克
橄欖油   20 克
即磨黑椒粉   少許

- 水加鹽、糖煲滾後轉慢火，邊攪拌邊倒入粟米粉。

- 邊煮邊攪拌，直至粉糊變得濃稠，需時約 15 分鐘。

- 加入橄欖油及黑椒粉拌勻後，趁熱將粟米糊倒入容器內，攤凍後切件。

- 燒熱平底鑊，加少許油將粟米糕煎至金黃即成。

是晚意、法 crossover dinner：polenta, ciabatta & ratatouille。

 

粟米糕 cut 完模之後，將剩低嘅不規則部份切細，加埋落雜菜度一切煮，
既可 "清理現場"，粟米糕又吸收哂醬汁嘅味道，正呀！ 
 

Notes：
- 粟米粉 (cornmeal) 係黃色粉粒，由乾燥粟米磨粉製成，並非平時用開白色嘅粟粉
  (corn starch 粟米澱粉)

- 煮粟米糊時一定要不停攪拌，以免黐底。

- 橄欖油可用牛油代替，並加入適量芝士。

    你哋亦都可以喺 Facebook Fans Page 度搵我 o架，我間小店叫做 La Cucina di Kestrel 呀，快啲 click 入去做我個 fans 啦！

意大利拖鞋包 Ciabatta

        Ciabatta 都買過嚟食過幾次，但係就唔係太多麵包書有教整。咁啱早前喺圖書館見到有本麵包書教整呢款包，我當然會即刻借番屋企跟食譜整啦！

        雖然呢本食譜係「法國藍帶廚藝學院」出版，理應相當信得過，不過我都有睇過吓整過 ciabatta 嘅 blog 友 comment，佢哋都話個麵糰好濕，所以我就 "醒水" 喇，搓包時刻意扣起少少水，費事到時攪到 "哩咁 hea"，而且食譜都一樣有教預留少少水份，作為調整麵糰軟硬度之用。