意大利拖鞋包 Ciabatta

        Ciabatta 都買過嚟食過幾次，但係就唔係太多麵包書有教整。咁啱早前喺圖書館見到有本麵包書教整呢款包，我當然會即刻借番屋企跟食譜整啦！

        雖然呢本食譜係「法國藍帶廚藝學院」出版，理應相當信得過，不過我都有睇過吓整過 ciabatta 嘅 blog 友 comment，佢哋都話個麵糰好濕，所以我就 "醒水" 喇，搓包時刻意扣起少少水，費事到時攪到 "哩咁 hea"，而且食譜都一樣有教預留少少水份，作為調整麵糰軟硬度之用。

 

麵種

 

材料：
高筋麵粉      250 克
水                約 160 毫升
即用酵母     1 克
鹽                4 克 

 

- 所有材料放入食物處理器內攪拌成麵糰。

 

- 拎出麵糰，放上已灑粉嘅枱上，繼續搓揉及摔打成光滑麵糰。

 

- 將麵糰滾圓，放入已灑粉嘅兜內，用保鮮紙包好，發酵至少 4 個鐘或以上即可。

 

 

 

主麵糰

 

材料：
高筋麵粉      115 克
全麥粉          10 克
水                 約 80 毫升
即用酵母      2 克
鹽                 2.5 克
麵種             100 克
橄欖油          2 茶匙

 

- 除麵種及橄欖油外，將其餘材料全部放入食物處理器內攪拌成麵糰。

 

- 拎出麵糰，放上已灑粉嘅枱上，用手壓平麵糰，將麵種包入。

 

- 之後放番入食物處理器內攪拌，然後加入橄欖油搓勻。

 

- 拎出麵糰，放上已灑粉嘅枱上，繼續搓揉及摔打成光滑麵糰。

 

- 將麵糰滾圓，放入已灑粉嘅兜內，用保鮮紙包好，發酵 2 個鐘。

 

- 枱面上灑多少少粉，放上麵糰，再喺麵糰表面灑上粉，然後用手壓扁麵糰、排氣。

 

- 烤盤墊上入爐防黐蓆，再喺蓆上灑多少少粉，然後放上麵糰。

 

- 麵糰表面同樣灑粉，之後用乾布冚住，發酵 45 - 60 分鐘至兩倍大。

 

- 焗爐預熱至 230 °C，之後放入烤盤及一碗水，焗約 30 分鐘至熟。

 

以上材料份量可做 320 克麵包一個。

 

食譜出自法國藍帶《法國麵包基礎篇》。

 

 

 

似拖鞋嗎？我覺得似一隻無咗 "人" 字膠帶嘅人字拖！

 

 

 

 

 

 

雖然個包徬晚已經整好，不過到夜晚食時，一切開都仲有
好香嘅味道，而且包肉都非常軟熟。

 

 

 

 

 

 

Notes：
- 原食譜係用法國麵包粉；而主麵糰材料中嘅水用量原為 65 毫升加牛奶 15 毫升。

- 若麵種係預先一晚整定的話，則麵種麵糰室溫發酵只需 2 個鐘，之後放入雪櫃內繼
  續低溫發酵。

- 用剩嘅麵種可以用保鮮袋包好，然後放上冰整保存，用之前解凍變軟即可。

- 建議用初榨橄欖油，因為可以為麵包帶點橄欖油香氣。