美式甘筍蛋糕 American Carrot Cake

        一直以嚟，我都認為甘筍蛋糕係 “美國嘢”，但原來原本係 “英國貨”，後來傳到美國之後大受歡迎，美國佬仲加上一層 cream cheese 喺面頭，做成美國特色嘅甘筍蛋糕。

       呢個美式甘筍蛋糕係我噚日整嘅，面頭嗰層 cream cheese 當然唔係正貨啦，都係同樣用豆腐整㗎！不過我驚上次整嗰種豆腐 cream cheese 會太瀉身，所以就跟著同一本書裡面另一個用豆腐整嘅打發忌廉，因為佢加咗大菜落去整，咁就會挺身好多喇！

豆腐打發忌廉

材料：
實豆腐          250 克
檸檬 汁         1/2 茶匙
蜜糖              2 湯匙
麥芽糖          1 1/2 茶匙
水                 100 毫升
大菜粉          1 茶匙
鹽                 1/8 茶匙
檸檬皮茸      1/2 個檸檬份量

- 豆腐先放水內煮一陣或隔水蒸熱，盛起、瀝乾水。

- 將 150 克豆腐加入檸檬汁，放入攪拌機內打成豆腐蓉。

- 將其餘材料放煲內加熱，直至大菜粉完全溶解，之後過篩倒入豆腐蓉內拌勻。

- 當混合物攤凍並凝固後，放入攪拌機內，連同剩餘嘅 100 克豆腐一齊攪爛。

- 之後放入雪櫃內雪凍數小時即可。

以上材料份量可做豆腐打發忌廉約 400 毫升。

食譜出自 Patricio Garcia de Paredes 嘅《不使用砂糖的自然派 sweet 甜點》。
 

 

甘筍蛋糕

材料：
合桃             55 克
甘筍             230 克
雞蛋             2 隻
黃糖             160 克
橄欖油         135 毫升
低筋麵粉      140 克
泡打粉         1 1/4 茶匙
梳打粉         1/4 茶匙
肉桂粉         1 1/2 茶匙
薑粉             1/2 茶匙
豆寇粉         1/2 茶匙
鹽                 少許

- 合桃略沖洗，之後用抹手紙索乾水份，放入焗爐用 140 °C焗香，出爐後切碎。

- 甘筍去皮後刨絲；雞蛋拂打成蛋液，備用。

- 將糖同油混合好，略拂打；所有粉類過篩 3 次。

- 將一半粉類加入糖油混合物內混合好，然後將剩餘嘅粉類與蛋液交替拌入。

- 加入甘筍絲及合桃粒，拌勻後將麵糊倒入模內。

- 放入已預熱至 180 °C 嘅焗爐內焗約 40 - 45 分鐘，出爐後攤凍。

以上材料份量可做 7 吋 X 7 吋方形蛋糕一個。

參考食譜：The Complete Book of Home Baking by Heilie Pienaar.

組合
 
- 將蛋糕表面拱起部份切去。

- 喺蛋糕表面抹上適量豆腐打發忌廉，然後再灑上少許橙皮茸作裝飾。

啱啱焗好出爐嘅甘筍蛋糕，顏色好靚、好金黃。

灑上橙皮茸後，令蛋糕多一份清新味道。

味道唔錯，不過我略嫌香料味道唔夠重，下次要落重手少

 

Notes：

- 由於我自己無大菜粉，所以我就用咗 5 克大菜絲代替。由於大菜絲比大菜粉難溶，所
  以要酌量加多少少水煲長啲時間。

- 食譜上寫住，如果豆腐打發忌廉製成後係用嚟裝飾、抹cream 或擠花的話，豆腐要加
  到 300 克，蜜糖要用3 茶匙，而大菜粉就要用 1 1/4 茶匙。

- 甘筍係西式紅蘿蔔，並非煲中式湯嗰種。