天氣凍咗之後，瞓醒起身確係一件難事，所以攪到好晏先落街買餸，咁就自不然有好嘢都唔輪到你啦！
去到超市，想搵嚿見得吓人嘅脢頭都無，唔係肥到死嘅就係瘦到阿媽都唔認得，喺咁嘅情況下，我當然寧願揀嚿瘦㗎啦！
好彩焗完出嚟都叫做似模似樣！
呢嚿脢頭真係瘦到幾乎無肥咁滯，好彩食落都唔會韌咋！
與 blog 友交流煮食心得，分享生活點滴。
2012年12月30日星期日
新鮮熱辣叉燒出爐呀！
味噌煙三文魚蛋糕 Miso Smoked Salmon Cake
仲記得之前我話喺圖書館度借咗幾本鹹點食譜嗎？今日又再同大家分享另一本喇！
咁啱早前去「IKEA」訂書櫃時，見到食品部啲煙三文魚做特價，$69 減到 $49，跟手就買咗兩 pack，加上屋企已經有味噌同木魚花，只要買埋洋蔥同蘑菇就可以開工整蛋糕喇喂！！
材料：
紫洋蔥 30 克
蘑菇 30 克
煙三文魚 50 克
低筋麵粉 90 克
高筋麵粉 45 克
泡打粉 4 克
鹽 6 克
糖 20 克
雞蛋 3 隻
赤味噌 30 克
水 50 毫升
橄欖油 40 克
木魚花 適量
- 洋蔥去衣，沖洗後切幼絲；蘑菇洗乾淨、切片；燒熱油，將洋蔥同蘑菇炒至略軟身，攤凍。
- 三文魚切細件；麵粉同泡打粉混合過笙 3 次；雞蛋拂打成蛋液。
- 將鹽、糖同味噌放入蛋液內，用打蛋器拂打直至完全溶入蛋液內。
- 加水同油，攪拌均勻，之後將粉類一次過倒入，用膠刮攪拌均勻。
- 將洋蔥同蘑菇拌入麵糊內，然後將麵糊勺入紙杯內約五分滿。
- 三文魚片放入麵糊內，兩將麵糊勺入至 8 分滿。
- 喺麵糊表面灑上木魚花，然後逐一放上烤盤上。
- 放入已預熱至 180 ℃ 嘅焗爐內，焗 15 分鐘，之後將烤盤調轉再焗多15 分鐘即可。
以上材料份量可做直徑 5.5 厘米蛋糕 8 個。
食譜出自馮嘉慧嘅《第一次做鹹點心就成功》。
蛋糕比想像中軟熟得多，可惜味道過鹹，可能因為我用嘅味噌係比較鹹啦！
你哋睇，用料幾豐富！
Notes：
- 原食譜係用牛奶，我自己就改用水；油嘅用量為 55 克；食譜內亦無用到糖。
- 原本食譜係將洋蔥同蘑菇直接加入麵糊內，但我自己怕生洋蔥的辛辣味道，所以預先將兩者炒
過。
- 由於味噌本身已帶鹹味，所以要因應其鹹度而調節鹽嘅用量。
2012年12月24日星期一
薯仔香草麵包 Potato Herbs Bread
呢兩日都得閒無嘢做，於是就可以瞓到自然醒為止，真係好耐未試過咁歎喇！
今日又唔使煮飯，見咁得閒，就郁手整麵包。呢個薯仔香草包其實係參考咗一個甜包食譜整成，除咗麵粉同薯蓉份量比例外，其餘材料都幾乎改頭換面，變成一個鹹包。
材料：
蒸熟薯肉 100 克
法國麵包粉 90 克
全麥粉 10 克
糖 15 克
鹽 2 克
即用酵母 3 克
混合香草 適量
蛋液 25 克
水 約 30 克
- 先將蒸熟薯肉用叉壓爛成薯蓉，加入麵粉、鹽、糖、香草同酵母混合。
- 加入蛋液拌勻，之後逐少加水攪拌成麵糰。
- 枱面灑粉，放上麵糰，加人適量手粉，輕手搓成光滑麵糰。
- 將麵糰滾圓，放入已灑粉嘅兜內，用保鮮紙封好，發酵 75 分鐘。
- 麵糰排氣後滾圓，靜置鬆弛 15 分鐘。
- 將麵糰收口向上，壓扁排氣，將上、下、左、右依次向內摺入，之後捏緊收口。
- 麵糰再次滾圓，放上已墊入爐防黏蓆嘅烤盤上，蓋上帆布，發酵 90 分鐘。
- 連同一小杯水，放入已預熱至 200 ℃ 嘅焗爐內，焗約 25 分鐘即成。
-
焗好出爐時見到個面咁深色，就立刻明白點解原食譜個甜包麵糰要塗上
一層法國白芝士，但其實食譜中相片見到成品都唔淺色得去邊哦！
好彩切開裡面非常之靚，而且濃烈嘅香草味立即湧上，
麵包質地亦因水份高而非常軟熟。
刻意買多啲薯仔做芥末煙肉蛋薯仔沙律，今晚嘅晚餐就有著落喇！
Notes：
- 由於加入薯蓉嘅麵糰非常之濕同黏手，所以需根據實際情況去增減水份用量。
- 麵糰會越搓越濕，最好就係用不斷重覆摺入動作取代搓揉，而且仲會用比較多手粉。
- 成品焗好後會比較深色，所以要不斷留意情況，以免麵包表面焗得太燶。
2012年12月23日星期日
蜜糖雜乾果燕麥英式烤餅 Honey & Muesli Scone
整好咗果醬，最好就係跟手整埋 scone，兩者絕對係絕配！
今次呢個 muesli scone 除咗係因為想試試果醬味道而整之外，最重要係順便可以清一清包 muesli，皆因當平常燕麥嚟食真係唔多討好！
材料：
雜乾果燕麥 20 克
低筋麵粉 75 克
高筋麵粉 50 克
泡打粉 1 茶匙
糖 1 茶匙
鹽 少許
牛油 10 克
肉桂粉 適量
豆蔻粉 適量
椰絲 適量
蜜糖 30 克
豆漿 60 克
- 雜乾果燕麥放入焗爐，用 140 ℃ 焗 15 分鐘，攤凍備用。
- 麵粉、泡打粉、鹽同糖拌勻，加入牛油，用手指捽成麵包糠狀。
- 將雜乾果燕麥、肉桂粉、豆蔻粉及椰絲加入混合。
- 蜜糖同豆漿倒入混合物內，用刀將材料切拌，直至全部材料完全混合。
- 輕手將混合物搓成麵糰，然後壓扁至約 2 厘米厚。
- 用直徑 5 厘米圓模 “級” 出麵糰，並排於已鋪牛油紙嘅烤盤上。
- 將剩低嘅麵糰再次輕手搓成糰並重覆以上步驟，直至所有麵糰用完。
- 喺麵糰表面掃上少量豆漿，然後放入已預熱至 220 ℃ 嘅焗爐內焗 15 分鐘即成。
以上材料份量可做直徑 5 厘米烤餅 6 個。
因為我係用較深色嘅荔枝蜜去整，所以焗好之後色澤非常之靚。
Scone 外脆內軟，本身已經有蜜糖嘅香甜味，配埋自家製
紅茶橙皮果醬一齊食，真係正到無朋友呀！
Notes：
- 如果唔用雜乾果燕麥的話，可用一般燕麥片代替。
- 搓麵糰時必須輕手、快手，避免產生筋性，影響烤餅口感。
- 搓好嘅麵糰可直接用刀切開幾份，省卻用圓模 “級” 出麵糰。
- 如果鍾意比較乾脆口感的話，麵糰就唔好並排而放，麵糰之間需留有空位。
紅茶橙皮果醬 Black Tea Marmalade
屋企啲果醬都已經食得七七八八，又喺時候整果醬喇！
每次整果醬，首選都係 marmalade，因為我係橙精嘛，不過我又不甘平凡，硬係想玩吓嘢，於是今次就試吓唔用水煮果醬，改用紅茶嚟煮。
2012年12月17日星期一
鬆軟厚 pancake
Pancake 好多時都會整，尤其係當晏晝嗰餐重未有著落，個人懶起上嚟唔想攪咁多，但屋企一下子又無乜材料存貨時，我就會煎 pancake 嚟食，貪佢簡單方便又快趣嘛，除非屋企連雞蛋麵粉都無啦！
我一直都好想整到厚厚 pancake，試過好幾個食譜都唔係好得。一次上 Youtube 睇嘢時無意中發現有個教整 pancake 嘅 video，原來係 Ricky Cheung 教整無花果熱香餅，見到佢嘅成品都幾厚身，抱著即管一試嘅心態去整，點知真係做到心目中嘅厚 pancake，而且質感都唔錯，好鬆軟㗎，所以想同大家分享一下個食譜。
材料：
自發粉 70 克
泡打粉 1 克
糖 20 克
菜油 10 克
蛋液 60 克
水 20 毫升
- 先將粉類、糖同油拌勻，之後加入蛋液同水，攪拌成軟滑麵糊。
- 燒熱平底鑊，將適量麵糊勺入鑊內，用匙羹背喺麵糊上輕手打圈，將麵糊推開。
- 當麵糊表面產生氣泡後就將佢翻轉，煎至另一面都金黃、熟透，即可上碟。
食譜出自 Ricky Cheung嘅無花果熱香餅。
咁樣整嘅 pancake 除咗鬆軟之外，蛋香味亦比一般做法香濃好多，
真係值得推介呀！
Notes：
- 原食譜係用軟牛油及奶，我自己就改為菜油同水；無自發粉的話，可用 70 克低筋麵粉加 3/4
茶匙泡打粉代替。
- 一隻雞蛋一般都會係約 50 克重，如果唔想為咗 10 克蛋液又去打多隻蛋，可以加入同等份量
清水代替。
- Ricky Cheung 建議麵糊唔好攪太耐，否則麵糊起筋就唔可以做到鬆軟效果。
- 煎麵糊時最好用中慢火去煎，如果火力太猛的話，會容易煎燶，成品亦較為乾身。
2012年12月12日星期三
十榖饅頭
十榖粉 50 克
泡打粉 4 克
老麵 50 克
糖 25 克
即用酵母 2.5 克
水 約 160 毫升
- 粉類、老麵、糖同酵母放入食處理器內混合，逐少加水搓成麵糰。
- 將麵糰拎出，放上已灑粉嘅枱面，繼續搓揉及摔打成光滑麵糰。
- 將麵糰滾圓，放入已灑粉嘅兜內，用保鮮紙封好，發酵 15 分鐘。
- 之後將麵糰排氣，用擀麵棍擀薄成長方形，喺較長嘅一邊卷起成長條狀，捏緊收口。
- 將麵糰切件，每件約重 50 克，靜置鬆弛 15分鐘。
- 煲滾水，將麵糰放入蒸籠或放於碟上，隔水以中慢火蒸約 8 - 10分鐘即成。
以上材料份量可做饅頭約 10 個。
雖然十穀粉並無特別味道，但就為饅頭額外增添營養及纖維。
加咗老麵整嘅饅頭份外鬆軟哦！
Notes：
- 老麵製作方法，請參考《燕麥包》。
- 若果有中筋麵粉的話，可直接使用取代高、低筋粉。
- 蒸籠或蒸碟上必須墊上牛油紙防黏，若用蒸籠的話，需先將牛油紙插孔，讓蒸氣穿透。
2012年12月7日星期五
黑芝麻雪芳蛋糕 Black Sesame Chiffon Cake
Ernest 媽咪俾咗啲黑芝麻粉同十穀粉我，我即刻就諗到用黑芝麻粉嚟整雪芳蛋糕就最啱不過。
今日比較得閒，就郁手整黑芝麻雪芳啦！
材料：
低筋麵粉 80 克
蛋白 4 隻蛋份量
他他粉 少許
糖 60 克
蛋黃 3 個
水 50 毫升
黑芝麻粉 25 克
麻油 30毫升
- 麵粉過篩 3 次。
- 蛋白加他他粉用電動打蛋器打至起泡，之後將糖分 3 次加入，打至 9 成企身嘅蛋白霜。
- 蛋黃打散，加水拌勻，之後加入芝麻粉及麻油混合。
- 將麵粉分次篩入蛋糊內，攪拌均勻成柔滑麵糊。
- 先將 1/3 蛋白霜加入麵糊內，攪拌至完全融合為止。
- 將剩餘嘅蛋白霜分次加入，用膠刮輕手切拌混合，避免將麵糊內空氣打散。
- 將麵糊倒入模內，放入已預熱至 180 ℃ 嘅焗爐內，焗約 30 分鐘至熟透。
- 出爐後立即將蛋糕模倒扣，當完全攤凍後就可以脫模。
加入他他粉打蛋白霜，做出嚟嘅麵糊比較綿密柔滑兼有光澤。
蛋糕超香濃芝麻味哦！聽日拎過去 Miss Cheng 中心度
同 Miss、同事及學生一齊開 party 呀！
Notes：
- 打好嘅蛋白霜可先放入雪櫃內暫存，以免置於室溫太耐而消泡。
- 加入他他粉可令蛋白霜穩定性提高，減低消泡情況，亦可用數滴檸檬汁或白醋代替。
- 想方便的話，可買現成黑芝麻醬代替芝麻粉及麻油，黑芝麻醬亦可自家製作，請參考
《自製黑芝麻醬》。
2012年12月1日星期六
2012年11月25日星期日
香橙朱古力蛋糕 Cake chocolat à l'orange
材料：
牛油 150 克
雞蛋 6 隻
低筋麵粉 65 克
可可粉 120 克
泡打粉 3.5 克
糖漬橙皮 120 克
朱古力 155 克
淡忌廉 120 克
糖 150 克
蜜糖 33 克
- 牛油同雞蛋於室溫放軟及回溫；粉類全部混合過篩 3 次。
- 橙皮切成長形粒狀；朱古力座熱水溶解；淡忌廉放入微波爐內加熱至 40 ℃ 左右。
- 用電動打蛋器將牛油打至鬆軟，之後加入糖，繼續打至發白成牛油霜。
- 拌入蜜糖，攪拌均勻後，將雞蛋逐隻加入攪拌，直至混合物變得柔滑。
- 加入朱古力，混合好後再倒入淡忌廉，攪拌均勻。
- 然後將粉類一次過倒入，快手將混合物攪拌成帶光澤嘅麵糊。
- 拌入橙皮後，將麵糊倒入已搽油及灑粉或已鋪牛油紙嘅蛋糕模內。
- 喺枱面輕敲焗模，排出麵糊內嘅空氣。
- 放入已預熱至 190 ℃ 嘅焗爐內，焗約 25 分鐘，之後打開爐門略為散熱。
- 調低爐溫至 170 ℃ 繼續焗多 25 – 30 分鐘至完全熟透。
- 出爐後立即將蛋糕脫模並移至架上攤凍。
以上材料份量可做8厘米X 18厘米 X 6厘米蛋糕 3 個。
食譜出自土屋公二嘅《巧克力專業師的巧克力》。
淨係望見蛋糕個顏色同聞到嘅香味，就已經知道朱古力味係幾咁香濃。
蛋糕非常鬆軟，而橙嘅香甜味同朱古力永遠都係咁夾！
Notes：
- 原食譜中糖嘅用量為215 克；蛋液 310 克。
- 糖漬橙皮做法，可參考《糖漬橙皮》或《糖漬橙皮 ( 簡易版 )》，亦可用現成品代替。
- 根據食譜，打發牛油霜時需將攪拌兜直接上火加熱至 28 ℃。
2012年11月24日星期六
韓國炒粉絲 Japchae (잡채)
韓國炒粉絲都係我個 To Do List 內想煮嘅嘢，不過買包粉絲都要成二、三十蚊，所以一直都無起心去煮，咁啱上個月「永安」一年一度嘅 sale，韓國粉絲只賣 $18.9 一包，嘩，咁筍，唔買都對唔住自己啦，吓嘩！！
2012年11月21日星期三
無花果葵花籽全麥包 Fig & Sunflower Seed Whole Wheat Bread
材料：
高筋麵粉 200 克
全麥粉 50 克
老麵 50 克
鹽 4.5 克
黃糖 20 克
即用酵母 2 克
水 約 160 毫升
橄欖油 10 克
葵花籽 30 克
無花果乾 50 克
- 葵花籽放入已預熱至 140 °C 嘅焗爐內焗 15 分鐘至香味出；無花果乾切碎備用。
- 將粉類、、酵母、鹽同糖倒入食處理器內混合，逐少加水搓至起筋。
- 之後加油，開機繼續搓成麵糰。
- 將麵糰拎出，放上已灑粉嘅枱面，繼續搓揉及摔打成光滑麵糰。
- 將葵花籽及無花果乾包入麵糰內，將麵糰重覆摺疊直至餡料均勻分佈於麵糰。
- 將麵糰滾圓，放入已灑粉嘅兜內，用保鮮紙封好，發酵 60 分鐘。
- 拎出麵糰，壓扁排氣後，將上下左右向中間摺入，放番入兜內發酵 30 分鐘。
- 完成第二次發酵後，將麵糰分割成 4 份，之後將麵糰滾圓，冚上保鮮紙，靜置 20 分鐘。
- 將左右兩邊 1/3 麵糰摺入，捏緊收口，做成欖核形。
- 麵糰放上已墊入爐防黏蓆嘅烤盤上，發酵約 60分鐘直至麵糰發大約 2 倍。
- 發酵完成後，喺麵糰表面灑上少量高粉，之後用利刀割紋
- 放入已預熱至 220 °C 嘅焗爐內焗約 20 分鐘。
- 其間每隔 7 - 8 分鐘就要喺爐內噴水 1 次，共噴水 2 次。
- 出爐後放上架上攤凍。
以上材料份量可做麵包 4 個。
一大一細，兩個都發得好好，脹卜卜，割紋亦爆得好靚。
加咗全麥粉，包質相對比較結實，但仍然相當鬆軟。
Notes：
- 老麵做法，請參考《燕麥包》。
- 天氣涼嘅時候，可將麵糰放入電飯煲內，用煲溫功能幫助加快發酵，唯需留意各款電飯煲的保
溫溫度，必需控制喺 40 °C 以下，否則酵母會因高溫而死亡。
2012年11月18日星期日
再用 muesli 整 granloa bar
試過用 Louisa 送俾我嗰盒 muesli 當普通麥皮咁沖嚟食，諗住有乾果又有果仁，應該會幾好食，誰不知一啲都唔好食，寧願自己用普通燕麥片沖嚟食好過，唔怪得之Louisa 話最啱就係用嚟整燕麥條啦！
今次就加咗橙皮茸同椰絲落去整，焗出嚟勁香！
跟住再加重麥芽糖同蜜糖，果然實淨好多，切開時無咁易散。
今次主要係整俾 Miss Cheng 同其他老師及職員食，因為 Miss 係好鍾意
食 granola bar，佢話佢喺美國留學時成日都會買嚟食，
好過成日食朱古力喎！
訂閱：
文章 (Atom)