糖漬橙皮 Ecorce d'orange confite

        仲記得我有儲橙皮嘅習慣嗎？儲吓儲吓，不經不覺已經儲咗兩大袋喺冰格，霸咗冰格唔少空間，係時候要清一清佢至得喇！

材料：
橙皮              5 個橙份量
水                 800 毫升
糖                 600 克

雲呢嗱枝      1 枝 

- 煲滾水 (份量以外)，將橙皮放入，等到水再滾起時，撈起橙皮瀝乾水份。

- 將水倒去並將煲沖洗乾淨，重複以上步驟 3 次。

- 將材料中的水、糖及整枝雲呢嗱枝放入煲內，加熱至水滾，之後熄火。

- 放入橙皮，冚好蓋，置室溫 1 日。

- 將篩網架於煲上，撈起橙皮放入篩內，等到糖漿瀝乾為止。

- 移開篩網，將煲內糖水煲滾，之後熄火。

- 將橙皮放回糖水內，冚好蓋，置室溫 1 日。

- 每日重複這個步驟，約 10 – 12 個禮拜就完成。

食譜出自辻點心專門學院嘅《基礎糕點大全》。


 

啱啱製作咗幾日時的橙皮亦然好挺身，糖水並未完全滲入橙皮內，
不過整煲糖水已經香到爆喇，勁想飲咗佢呀！！


 

雖然啲橙皮只係浸漬咗兩個禮拜，但係效果都唔錯，完全入哂味，只係仲有啲
橙皮嘅苦澀味，可能因為啲橙皮之前雪藏過，解凍後質地已經變得非常
軟身，所以糖水比較容易滲入。如果用新鮮橙皮嚟整，我諗可能
真係好似食譜咁講，要成 10 – 12 個禮拜先至攪掂，
我真係無咁好耐性服侍佢囉！

 

Notes：
- 根據食譜說明，若有糖度計可用的話，開始時糖水糖度為 40% Brix，當糖度變為 70%
  Brix   時，糖漬橙皮已經做好。

- 雲呢嗱枝毋需切開將雲呢嗱籽刮出，直接將整枝雲呢嗱枝放入即可。

- 若嫌呢個方法較為繁複的話，大家亦可參考《糖漬橙皮 (簡易版)》。

- 食譜說明，長時間浸漬嘅橙皮表面非常黏手，用之前可先用水清洗表面糖漿，用紙索
  乾水份後才用。