自家製辣椒油

        之前買落一大包辣椒粉，主要用嚟醃製泡菜，間中會用嚟煮餸同調味，但係每次用量都唔算多，用極都用唔哂。而且同用韓國辣椒粉整嘅泡菜味道唔係好同，所以嚟緊都打算 “斥資” 買過包正宗韓國辣椒粉嚟醃泡菜。 

        咁呢包辣椒粉可以點樣快啲清哂去呢？唔 ………… 整辣椒油啦！

材料：
乾蔥頭
蒜頭
花生油
辣椒粉

- 乾蔥頭同蒜頭去衣，然後剁成茸，備用。

- 將油倒人煲內，加熱至約 120 - 130 ℃ 後，分別放入油內炸至金黃，盛起。

- 辣椒粉放入耐熱容器內，將炸過蔥、蒜嘅滾油倒入，略為攪拌。
 

- 待辣椒油完全攤凍後就將炸過嘅蔥、蒜加入，即成。

今次係第一次炸蔥蒜，之前成日睇到啲烹飪節目話呢兩樣嘢
好搶火、好易燶，攪到我一直都唔敢炸呢兩樣嘢，
但實情都唔係嘅！！！

嘩嘩嘩，香到呢！！真係聞到都想即刻飲番羹！味道係點

就暫時未知喇，因為仲未有機會用到。Motonako A.，

妳睇完之後，記住抹番乾淨個 "Mon" 前面灘口水呀！

 

 

Notes：
- 由於乾蔥同蒜頭受熱溫度唔同，所以必須分開炸至金黃。

- 其實用任何油都可以製作辣椒油，不過用花生油整味道會香濃好多。

- 如果用新鮮辣椒整的話，需先將辣椒切粒，之後放入油內兜炒至出味。